Azərbaycan Respublikası Mədəniyyət nazirinin birinci müavini, Mədəniyyət nazirinin vəzifələrini müvəqqəti icra edən Anar Kərimovun müvafiq əmri ilə Qafar-zadə Məryəm Fikrət qızı nazirliyin İnformasiya və ictimaiyyətlə əlaqələr şöbəsinin müdiri vəzifəsinə təyin edilib.
Məlumat üçün bildiririk ki, Məryəm Qafar-zadə 1980-ci ildə Bakı şəhərində anadan olub. 2006-cı ildən etibarən dövlət qulluğunda çalışır.
2009-2017 illər ərzində Fransanın Strasburq şəhərində Avropa Şurasında layihə rəhbəri vəzifəsində çalışıb, mədəni irs, gənclər siyasəti, təhsil, səhiyyə (pasient hüquqlarının qorunması), sosial bərabərlik (əlillərin hüquqlarının qorunması) və idman (idmana dair beynəlxalq konvesiyalarının monitorinqi) mövzularında müxtəlif beynəlxalq layihələri idarə edib.
80-dən artıq beynəlxalq seminar və konfransda çıxış edən M.Qafar-zadə Avropa Birliyi və Avropa Şurasının “İdmanda gender bərabərliyi” və “Uşaqların zorakılıqdan qorunması” mövzularında müştərək layihələrin spikeri və məruzəçisidir.
2019-cu ildə Avropa Şurasının Anti-Dopinq Konvensiyasına Uyğunluq Komitəsinin rəhbəri vəzifəsinə seçilib.
Son təyinatadək Azərbaycan Respublikası Gənclər və İdman Nazirliyinin Strateji planlaşdırma və beynəlxalq standartların tətbiqi sektorunun müdiri vəzifəsində çalışıb.
Azərbaycan Milli Elmlər Akademiyasının “Molekulyar Biologiya və Biotexnologiya” İnstitutunun dissertantıdır. 25 dərc olunmuş elmi məqalənin müəllifidir.
Bədən Tərbiyəsi və İdman Akademiyasının Elmi-Tədqiqat Laboratoriyasının elmi işçisidir.
Azərbaycan Basketbol Federasiyasının İcraiyyə Komitəsinin üzvüdür.
Fransız, ingilis və rus dillərini bilir.
