Bakı Musiqi Akademiyasının 100 illiyi münasibətilə təntənəli yubiley konserti keçirilib
Üzeyir Hacıbəyli adına Bakı Musiqi Akademiyası bu il 100 yaşını qeyd edir. Prezident İlham Əliyevin tərəfindən əlamətdar yubileyin dövlət səviyyəsində qeyd olunması məqsədilə 26 may 2021-ci il tarixində sərəncam imzalanıb. Bu münasibətlə keçirilən konfrans və konsertlərdə bir əsr yaşı olan təhsil ocağının keçdiyi yola nəzər salınır, Azərbaycan musiqi mədəniyyətinin inkişafındakı xidmətiləri bir daha xatırlanır.
Noyabrın 19-da Müslüm Maqomayev adına Azərbaycan Dövlət Akademik Filarmoniyasında gerçəkləşən təntənəli gecə də Bakı Musiqi Akademiyasının 100 illiyinə dəyərli yubiley töhfəsi olub.
Yubiley konsertində Prezident Administrasiyası Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, təhsil naziri Emin Əmrullayev, mədəniyyət naziri Anar Kərimov, xarici işlər naziri Ceyhun Bayramov, Dövlət İmtahan Mərkəzi Direktorlar Şurasının sədri Məleykə Abbaszadə, ölkəmizdən və Rusiyadan tanınmış incəsənət xadimləri, o cümlədən, BMA-nın professor-müəllim heyəti, ictimaiyyət nümayəndələri iştirak edib.
Konsert proqramı Üzeyir Hacıbəyli adına Azərbaycan Dövlət Simfonik Orkestrinin parlaq çıxışı ilə başlanıb. Kollektiv dirijor, Xalq artisti Rauf Abdullayevin rəhbərliyi ilə dahi Üzeyir bəyin "Koroğlu" operasından uvertüranı səsləndirib.
Sonra Əməkdar artist Əyyub Quliyevin dirijorluğu ilə tanınmış vokal ifaçısı, Xalq artisti Samir Cəfərovun ifasında Ü.Hacıbəylinin "Sevgili canan", Xalq artisti Ülviyyə Hacıbəyovanın ifasında İ.Hacıbəyovun "Cəngi", Xalq artisti Gülnaz İsmayılova, Əməkdar artist Səbinə Əsədova F.Əlizadənin “İntizar” operasından “Bulaq başında” gəlinlərin dueti, Xalq artisti Elçin Həşimov, Əməkdar artist Elnur Əhmədovun ifasında H.Rzayevin "Çahargah rapsodiyası", Xalq artisti Şükür Səmədovun ifasında isə K.Kartnerin “Konsertino” əsərləri səsləndirilib.
Tamaşaçıların gurultulu alqışlarından sonra Böyük Britaniyadan tanınmış skripka ifaçısı Dmitri Sitkovetskinin dirijorluğu ilə Q.Qarayevin “Yeddi gözəl” baletindən “Vals və yürüş” ifa olunub.
Daha sonra Əməkdar artist Fuad İbrahimovun dirijorluğu ilə Dmitri Sitkovetski M.Ravelin "Qaraçı qız", Xalq artistləri Fərhad Bədəlbəyli və Murad Adıgözəlzadə S.Raxmaninovun “İki fortepiano və simfonik orkestr üçün 2 saylı süita”sını (işləməsi A.Varnberq – III, IV hissələr) ifa ediblər.
Xalq artisti Yalçın Adıgözəlovun rəhbərliyi ilə Xalq artistləri Yeganə Axundova və Murad Hüseynovun ifasında F.Pulenkin “İki fortepiano və simfonik orkestr üçün konsert”i – II və III hissələr), bədii rəhbəri Xalq artisti Gülbacı İmanova olan Azərbaycan Dövlət Xor Kapellasının, solistlər – xanəndələr Mirələm Mirələmov və Kamilə Nəbiyevanın ifasında V.Adıgözəlovun “Qarabağ şikəstəsi” oratoriyası dinləyicilərə əsl musiqi bayramı havası yaşadıb.
Ü.Hacıbəyli adına Bakı Musiqi Akademiyasının yubiley konserti tamaşaçıların yaddaşına xoş təəssüratlarla həkk olunaraq gurultulu alqış sədaları altında başa çatıb.
