ASAN könüllülərinin təqdimatında "Arşın mal alan" musiqili komediyası nümayiş etdirilib
“Azərbaycan gəncliyi 2017-2021-ci illərdə” Dövlət Proqramına əsasən Mədəniyyət Nazirliyi tərəfindən keçirilən ənənəvi “Gəncliyin səsi” festivalı çərçivəsində növbəti tədbir Sumqayıtda keçirildi.
Tədbirdə Sumqayıt Regional Mədəniyyət İdarəsinin rəisi Mehman Şükürov və Şəhər İcra Hakimiyyətinin şöbə müdirinin müavini Fərman Kazımov çıxış edərək gənclərə göstərilən dövlət qayğısından, onların təhsil və karyera imkanlarının inkişaf etdirilməsi və yaradılan şərait barədə məlumat verdilər.
2 fevral - Gənclər günü münasibətilə ASAN Xidmət Mərkəzi könüllülərinin təqdimatında Sumqayıt Dövlət Dram Teatrında dahi bəstəkar Üzeyir Hacıbəylinin "Arşın mal alan" musiqili komediyası nümayiş etdirildi. Tamaşa iştirakçıların marağına səbəb olub və alqışlarla qarşılanıb.
Qeyd edək ki, 2016-cı ildən "Gəncliyin səsi" festivalı Azərbaycan Respublikası Prezidenti yanında Vətəndaşlara Xidmət və sosial innovasiyalar üzrə Dövlət Agentliyi ilə birgə həyata keçirilir.