Azərbaycan fortepiano məktəbinin tanınmış nümayəndəsi və təbliğatçısı Pərvin Muradovanın təşkilatçılığı ilə görkəmli bəstəkar, Azərbaycan Respublikasının Xalq artisti Cövdət Hacıyevin xatirəsinə həsr edilmiş gənc ifaçıların Florida KeysI Beynəlxalq musiqi müsabiqəsi keçirilmişdir.
Müsabiqədə Azərbaycanı kiçik yaş qrupunda təmsil edən gənc pianoçu, Qara Qarayev adına Mərkəzi İncəsənət Məktəbi fortepiano şöbəsinin V sinif şagirdi Alıyeva Münəvvər parlaq çıxışı ilə fərqlənərək münsiflər heyətinin qərarı ilə birinci yerə, məktəbin məzunu, Prezident təqaüdçüsü Cavid Yusifzadə isə professional yaş qrupunda müvəffəqiyyətlə çıxış edərək birinci yerə və münsiflər heyətinin qərarı ilə “Amerika bəstəkarı əsərinin ən yaxşı ifaçısı” adına layiq görülmüşdür.
Hər iki istedadlı azərbaycanlı musiqiçi 17 noyabr 2018-ci il tarixində Nyu-Yorkda dünyanın mötəbər konsert zalları sırasında özünəməxsus yeri olan Karnegi hollda qaliblərin yekun konsertində uğurla çıxış etmişdir.