Azərbaycan Respublikası Prezidentinin fərdi təqaüdçüsü, Əməkdar mədəniyyət işçisi Aşıq İsfəndiyar Rüstəmovun 80 illik yubileyi keçiriləcəkdir
Azərbaycan Respublikası Prezidentinin fərdi təqaüdçüsü, Əməkdar mədəniyyət işçisi Aşıq İsfəndiyar Rüstəmovun cari ildə 80 yaşı tamam olur.
Azərbaycan aşıq sənətinin inkişafı və təbliğində mühüm xidmətləri olan “Əməkdar mədəniyyət işçisi” İsfəndiyar Ədil oğlu Rüstəmov (Aşıq İsfəndiyar) 1937-ci ildə Gədəbəy rayonunda anadan olmuşdur.
Ömrünün 60 ilini aşıq yaradıcılığının inkişafına, təbliğinə, bu sənətin gənc nəslə aşılanmasına həsr etmiş İ.Rüstəmov 1964-cü ildə Gədəbəydə ilk aşıq ansamblını yaratmış, respublikada və xarici ölkələrdə keçirilən müxtəlif tədbirlərdə iştirak etmişdir.
İ.Rüstəmov Moskvada “Göyqurşağı” festivalı, “Ümumittifaq Xalq Təsərrüfatı Nailiyyətləri” sərgisinin açılış mərasimi, “Özbəkistanda Azərbaycan ədəbiyyatı və incəsənəti ongünlüyü”, Dərbənddə “Narınqala” aşıq musiqisi festivalında, Türkiyə, İran və digər ölkələrdə keçirilən mədəni tədbirlərdə respublikamızı müvəffəqiyyətlə təmsil etmişdir.
Azərbaycan Aşıqlar Birliyinin İdarə heyətinin üzvü olan, aşıq sənətinin inkişafı istiqamətində bu gün də yorulmadan çalışan İ.Rüstəmov eyni zamanda birliyin Gədəbəy rayon şöbəsinə rəhbərlik edir.
Cari ilin 24 oktyabr tarixində Azərbaycan Dövlət Filarmoniyasında Aşıq İsfəndiyar Rüstəmovun 80 illik yubileyi keçiriləcəkdir. Tədbirdə respublikamızın mədəniyyət nümayəndələri, tanınmış aşıqlar çıxış edəcəkdir.