Bakı Xoreoqrafiya Akademiyasının əməkdaşı beynəlxalq konfransda məruzə ilə çıxış edib
Moskvada Rusiya Federasiyasının Mədəniyyət Nazirliyi və Qnesinlər adına Rusiya Musiqi Akademiyasının təşkilatçılığı ilə “İncəsənət ali təhsil müəssisələri beynəlxalq məkanda” mövzusunda beynəlxalq konfrans keçirilib. A.Y.Vaqanova adına Rus Balet Akademiyasının təklifi ilə Bakı Xoreoqrafiya Akademiyası (BXA) da konfransda iştirak edib.
Rusiya, Fransa, Litva, Böyük Britaniya, Yunanıstan, Estoniya, İspaniya, Belarus və digər ölkələrdən nümayəndələrin iştirak etdiyi konfransın plenar iclasında akademiyanın informasiya və ictimaiyyətlə əlaqələr şöbəsinin müdiri Əbülfəz Babazadə “Ali təhsil müəssisələri arasında beynəlxalq əməkdaşlığın Azərbaycan modeli: problemlər və perspektivlər” və “Bakı Xoreoqrafiya Akademiyası elm, təhsil və sənətin qovşağında” mövzularında təqdimatla çıxış edib.
Ə.Babazadə məruzəsində son 15 il ərzində ölkəmizdə həyata keçirilən məqsədyönlü təhsil və mədəniyyət siyasətindən, təhsilinin mütərəqqi nailiyyətlərindən, Prezident İlham Əliyevin bu sahəyə diqqət və qayğısından, eyni zamanda, Azərbaycan təhsilinin maddi-texniki və qanunvericilik bazalarının gücləndirilməsi sahəsində görülən tədbirlərdən danışıb.
Qeyd edilib ki, Azərbaycanda qeyri-neft sektorunun inkişafı, insan kapitalının formalaşması üzrə məqsədlər respublikada təhsilin və xüsusilə də ali təhsil sisteminin beynəlxalq standartlara cavab verməsi və beynəlxalq rəqabətliliyinin artırılması üçün münbit şərait yaradır. Odur ki, ölkə rəhbərliyi tərəfindən təhsil sahəsi üzrə yeni-yeni strategiyalar və uzunmüddətli dövlət proqramları qəbul edilir. Azərbaycanın incəsənətyönümlü ali təhsil müəssisələri barədə ətraflı danışan şöbə müdiri müsəlman Şərqinin incəsənət beşiyi olan Azərbaycanın, rəssamlıq, dekorativ-tətbiqi sənət, musiqi, teatr, kino və xoreoqrafiya sahəsində bədii təhsil nailiyyətləri barədə məlumatı konfrans iştirakçılarının diqqətinə çatdırıb.
Məruzəçinin çıxışı iştirakçılar tərəfindən maraqla qarşılanıb.
Tədbirdə, eyni zamanda, incəsənət və mədəniyyət universitetlərinin reytinqlərinin formalaşdırılması, habelə incəsənət sahəsində beynəlxalq təhsilin aktual problemləri, incəsənət universitetlərinin beynəlxalq təhsil bazarında marketinqi, beynəlxalq təhsilin infrastrukturu, birgə təhsil proqramları, yay məktəbləri, akademik mobillik və digər əməkdaşlıq məsələlərinə dair müzakirələr aparılıb.
Konfrans çərçivəsində Ə.Babazadə Qnesinlər adına Rusiya Musiqi Akademiyasının prezidenti, Rusiya Teatr Sənəti İnstitutunun, Macarıstan Rəqs Akademiyasının və Özbəkistan Dövlət Mədəniyyət və İncəsənət Universitetinin rektorları, Jurgenov adına Qazax Milli İncəsənət Akademiyasının, A.Y.Vaqanova adına Rus Baleti Akademiyasının və Moskva Dövlət Xoreoqrafiya Akademiyasının prorektorları ilə təhsil, elm və yaradıcılıq üzrə birgə layihələrin həyata keçirilməsi barədə danışıqlar aparıb.