Bakıda Ümumrusiya Dövlət Kinematoqrafiya İnstitutu məzunlarının diplom tamaşası göstərilib
Aprelin 10-da “MDB ölkələrində Ümumrusiya Dövlət Kinematoqrafiya İnstitutu günləri. Dünyanın ilk kino məktəbinin 100 illiyi” layihəsi çərçivəsində Azərbaycan Dövlət Gənc Tamaşaçılar Teatrında sovet dramaturqu, ssenarist və şair, RSFSR Dövlət mükafatı və RF Prezidenti mükafatının laureatı Aleksandr Volodinin pyesi əsasında səhnələşdirilmiş “Beş axşam” tamaşası göstərilib.
Tamaşanın rejissoru tanınmış Rusiya rejissoru, kinorejissor, ssenarist, aktyor emalatxanasının rəhbəri, Rusiya Kinematoqrafçılar İttifaqının üzvü, Rusiyanın Xalq artisti və Əməkdar incəsənət xadimi Vladimir Fokindir.
Qeyd edək ki, aprelin 8-dən 12-dək Bakıda Azərbaycan Mədəniyyət Nazirliyinin dəstəyi ilə keçirilən “MDB ölkələrində Ümumrusiya Dövlət Kinematoqrafiya İnstitutu günləri. Dünyanın ilk kino məktəbinin 100 illiyi” layihəsi çərçivəsində bir sıra tədbirlər keçirilir.
Aleksandr Volodinin anadan olmasının 100 illik yubileyi ilində Vladimir Fokinin S.A.Gerasimov adına Ümumrusiya Dövlət Kinematoqrafiya İnstitutundakı buraxılış kursu bakılı tamaşaçılara psixoloji teatr janrına rəğbətlə səhnələşdirilmiş “Beş axşam” tamaşasını təqdim edib.
V.Fokinin də Bakıda olduqları bir neçə gün ərzində onlar üçün doğmalaşan bakılı tamaşaçıları və azərbaycanlı həmkarlarını salamlayaraq qeyd etdiyi kimi, “Beş axşam” tamaşası onun rəhbərliyi altında institutun məzunlarının 6 diplom işlərindən biridir. O vurğulayıb: “Bakıda bizim çox geniş proqramımız var və bu gün həmin çərçivədə Aleksandr Volodinin pyesi əsasında hazırlanmış tamaşa göstəriləcək. Bu il martın 10-da biz onun 100 illik yubileyini qeyd etdik və bir ay sonra tamaşa Bakıda nümayiş etdirilir”.
O, həmçinin qeyd edib ki, institutun tələbələri Azərbaycan Dövlət Mədəniyyət və İncəsənət Universitetindəki həmyaşıdları ilə ümumi dil tapıblar və bu, onun sözlərinə görə, göstərir ki, Azərbaycanla Rusiya arasında mədəni əlaqələr gələcəkdə də genişlənəcək və inkişaf edəcək.
V.Fokin çıxışının sonunda xatırladıb ki, tamaşada hadisələr pyesin qələmə alındığı 1958-ci ildə baş verir.
Ustad V.Fokinin rəhbərlik etdiyi gələcəyin kino ulduzları səhnədə sovet müzikli janrını canlandırmağa çalışıblar. Tamaşadakı dramatik səhnələr solo vokal nömrələri ilə vəhdət təşkil edib, mahnılar və şeirlərlə müşayiət olunub.
V.Fokin tamaşa haqqında deyib: “Mənim niyyətim Aleksandr Volodinin pyesini “təkmilləşdirmək” – onun mənaca dərinliklərinə varmaq və gənc aktyorlara öz personajlarını müqəvva kimi deyil, canlı, istiqanlı insanlar kimi görmək, onların ağrı-acısını hiss etmək, hər kiçik hallarına sevinmək və sevmək qabiliyyətini təcəssüm etdirmək imkanı yaratmaq olub.
Tamaşaçılar aktyorların ifasını hərarətlə qarşılayıblar.
