Belçikada Avropa İttifaqı - Azərbaycan Əməkdaşlıq Komitəsi çərçivəsində alt-komitənin iclası keçirilib
Cari ilin 16 mart tarixində Brüsseldə Aİ - Azərbaycan Əməkdaşlıq Komitəsi çərçivəsində Məşğulluq və sosial məsələlər, ictimai səhiyyə, təlim, təhsil və gənclər, mədəniyyət, informasiya cəmiyyəti və audiovizual siyasət, elm və texnologiya məsələləri üzrə alt-komitənin beşinci iclası keçirilib.
Azərbaycan tərəfindən Təhsil Nazirliyinin həmsədrlik etdiyi iclasda Mədəniyyət və Turizm Nazirliyi, Əmək və Əhalinin Sosial Müdafiəsi Nazirliyi, Gənclər və İdman Nazirliyi, Səhiyyə Nazirliyi, Milli Elmlər Akademiyası və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndələrindən ibarət heyət iştirak edib.
İclasda Mədəniyyət və Turizm Nazirliyi Beynəlxalq əməkdaşlıq şöbəsinin böyük məsləhətçisi Ramil Abbəkirov tərəfindən təmsil olunub. İclas çərçivəsində təhsil, məşğulluq və sosial məsələlər, səhiyyə, gənclər siyasəti, mədəniyyət, tədqiqat və innovasiyalar, informasiya cəmiyyəti mövzularında qarşılıqlı müzakirələr aparılıb. Azərbaycan tərəfi sözügedən sahələrdə həyata keçirilən islahatlar və əldə olunan nəticələrlə bağlı məlumat verib. Aİ nümayəndə heyəti isə bu sahələr üzrə həyata keçirilən siyasət və nəzərdə tutulmuş dəyişiklərlə bağlı təqdimatlar edib.
İclasda həmçinin “Bakı Prosesi” çərçivəsində həyata keçirilən fəaliyyətlər, prosesin qlobal mədəniyyətlərarası dialoqda rolu, eləcə də onilliyi ilə bağlı məlumatlar əks tərəfin diqqətinə çatdırılıb.