Oktyabrın 18-də Xalça Muzeyində V Beynəlxalq Azərbaycan Xalçası Simpoziumu çərçivəsində “Müasir incəsənət xalçalarda” və “Uçan xalça” adlı sərgilərin açılış mərasimi keçirilib.
Azərbaycan Xalça Muzeyinin direktoru Şirin Məlikova çıxış edərək sərgilərin əhəmiyyətindən danışıb. Bildirib ki, "Uçan xalça" sərgisi Mədəniyyət və Turizm Nazirliyi, Xalça Muzeyi, Dövlət Rəssamlıq Akademiyası və Vyana Tətbiqi Sənət Universitetinin təşkilatçılığı ilə gerçəkləşib. Sərginin sponsorları Avstriyadakı Azərbaycan Mədəniyyət Mərkəzi və Vyana Tətbiqi Sənət Universitetidir.
Vurğulanıb ki, "Uçan xalça" sərgisi “Crossing” (“Kəsişmə nöqtəsi”) layihəsinin yekun hissəsidir. Layihənin məqsədi Azərbaycan və Avstriyanın müasir incəsənət sahəsində əlaqələrini yaratmaq, xalqların mədəniyyətlərarası dialoq və təcrübə mübadiləsini möhkəmləndirməkdir. Avstriya tərəfindən layihənin art-məsləhətçisi rəssam, Vyana Tətbiqi Sənət Universitetinin müəllimi Barbara Qrafdır.
Muzeyin direktoru qeyd edib ki, Azərbaycan Dövlət Rəssamlıq Akademiyasının tələbələri Fərəc Yusubov, Əsmər Yusubova, Firəngiz Məcidzadə, Ləman Hətəmli və Könül Cavadova Avstriyanın paytaxtına, Vyana Tətbiqi Sənət Universitetinin tələbələri Afra Kirxdorfer, Anka Qaya Nidzqorska və Eva-Mariya Şerl isə Bakıya dəvət olunub. Xalçaçı-rəssamlar qarşılıqlı olaraq ölkələrimizin mədəniyyəti ilə tanış olmaqla V Beynəlxalq Azərbaycan Xalçası Simpoziumunun “Ənənələr və innovasiyalar” devizinə uyğun olaraq sərginin konsepsiyası üzərində birgə çalışıblar. Onların eksperimentləri üçün XIX əsrə aid qismən qorunub saxlanılan sumax xalçası əsas olub. Bildirilib ki, sərgi çərçivəsində maraqlananlar üçün tekstil dekoru üzrə ustad dərslər də təşkil ediləcək.
Şirin Məlikova "Müasir incəsənət xalçalarda" sərgisi barədə də danışaraq qeyd edib ki, bu sərgidə dörd gənc rəssamın beş əsəri təqdim olunur. Sərgi vasitəsilə hər bir rəssam xalça sənəti, onun ənənələri və müasir dövrdə yaşadılması ilə bağlı öz baxışlarını ictimaiyyətə təqdim edir.
Tədbirdə çıxış edən Xalq rəssamı Fərhad Xəlilov Azərbaycan xalçalarının incəsənətimizin inkişafına göstərdiyi böyük təsirdən danışıb. Bildirib ki, çağımızda xalça sənətinin inkişafında bir sıra rəssamlar da böyük rol oynayıb.
Sonra qonaqlar “Müasir incəsənət xalçalarda” və “Uçan xalça” sərgiləri ilə tanış oldular.
Qeyd edək ki, “Crossing” layihəsi Azərbaycan və Avstriya müasir rəssamları arasında əlaqələrin yaradılmasında mühüm addımdır. Bu, tətbiqi sənətin çox istiqamətli sahələrindən birində ənənələri və innovativ yaradıcılıq meyllərinin kəsişməsini özündə birləşdirən iki mədəniyyət arasında körpüdür.
