Biləsuvarda Azərbaycan musiqi sənətinin görkəmli nümayəndəsi, Xalq artisti, ustad sənətkar Hacıbaba Hüseynovun 100 illik yubileyi qeyd olunub.
Tədbirdə Biləsuvar Rayon İcra Hakimiyyətinin başçısı Mahir Quliyev çıxış edərək Hacıbaba Hüseynovun Azərbaycanın muğam və qəzəl sənətinə verdiyi əvəzsiz töhfələrdən söz açıb.
Əməkdar artist Azad Şükürov Xalq artisti Hacıbaba Hüseynovun həyat və yaradıcılığı barədə geniş məlumat verib, usta sənətkarla bağlı xatirələrini bölüşüb.
Qeyd olunub ki, Hacıbaba Hüseynov rast muğamının "Üşşaq", "Hüseyni" və “Novruz-rəvəndə” şöbələrinin, digər muğamlarda "Şah Xətai" şöbələrinin ilk ifaçısı olub. Ustad sənətkarın təşəbbüsü ilə “Bayatı-şiraz” muğamının "Dilruba" şöbəsi dərsliyə əlavə edilib.
Rəsmi hissədən sonra Azərbaycan Respublikası və Naxçıvan Muxtar Respublikasının Əməkdar artisti, xanəndə Ehtiram Hüseynov, Biləsuvar, Salyan və Neftçala Uşaq İncəsənət məktəblərinin müəllim və şagirdləri maraqlı konsert proqramı ilə çıxış edib, xanəndələr sənətkarın oxuduğu qəzəlləri və muğamları səsləndiriblər.