Şəki Regional Mədəniyyət və Turizm İdarəsinin müəssisələrində 20 Yanvar faciəsinə həsr olunmuş tədbirlər keçirilmişdir
17 yanvar 2018-ci il tarixdə Qax rayon Mədəniyyət Mərkəzində “Qəhrəmanlıq və iftixar tariximiz” adlı anım mərasimi keçirilmişdir. Tədbir iştirakçıları ilk öncə Mərkəzin foyesində 20 Yanvar faciəsini əks etdirən sərgi ilə tanış oldular..
Tədbiri giriş sözü ilə açan Mədəniyyət Mərkəzinin direktoru K. Məcidova 20 Yanvarı tariximizin şərəfli səhifələrindən olduğunu, Azərbaycanda azadlığın 20 Yanvar ağrısından, 20 Yanvar qeyrətindən doğulduğunu qeyd etdi və şəhidlərin ruhu bir dəqiqəlik sükutla yad edildi. Çıxışçılardan Qax Gün Ərzi Qayğı Mərkəznin direktoru Səfiyyə xanım Süleymanova da öz növbəsində 20 Yanvar faciəsindən doğan ağ gündən söz açaraq, bu tarixi hər zaman yadda saxlamağın hər birimizin borcu olduğunu qeyd etdi.
Sonra “20 Yanvar - 1990” adlı video çarx nümayiş olundu. Mədəniyyət Mərkəzinin İ.Dağıstanlı adına Xalq teatrı üzvlərinin hazırladığı ədəbi- bədii kompazisiya hər kəsi riqqətə gətirdi. Üvertüranın sədaları altında başa çatan kompzisiyada iştirakçılarla birlikdə “Qoynunda bu qədər şəhidlərin varsa sabahın üçün heç bir narahatlığın olmasın can Azərbaycan” sədaları altında hər kəsi mübarizəyə səslədilər. Yekunda D.Əzizova çıxış edərək qeyd etdi ki, “20 yanvar nə qədər dəhşətli bir gün olsa da, həm də iftixar günümüzdür. Şəhidlərimiz heç zaman unudulmayacaq və hər zaman iftixar hissi ilə anılacaqdı”.
Oğuz rayon Heydər Əliyev Mərkəzində 20 yanvar faciəsinin 28-ci ildönümü ilə əlaqadar olaraq “20 Yanvar - Tariximizin qəhrəmanlıq səhifəsi” adlı tədbir keçirildi. Tədbirdə Oğuz rayon İcra Hakimiyyətinin, Oğuz rayon Gənclər və İdman İdarəsinin, YAP Oğuz rayon təşkilatının, rayon tarix-diyarşünaslıq muzeyinin, rayon Uşaq İnkişaf Mərkəzinin, Heydər Əliyev Mərkəzinin nümayəndələri, rayon məktəblərinin müəllim və şagird kollektivi iştirak etdi.
Tədbiri giriş sözü ilə Heydər Əliyev Mərkəzinin direktoru M.Abbasova açdı. Məruzəçi 1990-cı il yanvarın 19-dan 20-nə keçən gecə Bakı şəhərinə və Azərbaycanın bir neçə rayonuna keçmiş Sovet İttifaqının qoşun hissələrinin fövqəladə vəziyyət elan edilmədən yeridilməsi, dinc əhaliyə divan tutulması, yüzlərlə insanın qətlə yetirilməsi haqqında məlumat verdi.
Azərbaycanın müstəqilliyi və istiqlaliyyəti yolunda canlarını qurban vermiş şəhidlərin xatirəsi bir dəqiqəlik sükutla yad edildi. Daha sonra Mərkəzin bələdçisi S.Musayeva “Qanlı yanvara gedən yolun başlanğıcı” mövzusunda çıxış etdi. Tədbirdə Oğuz rayon Uşaq İnkişaf Mərkəzinin şagirdləri 20 yanvar faciəsi ilə bağlı ədəbi-bədii kompozisiya təqdim etdilər. Tədbirdə 20 Yanvar hadisələrinin tarixi, həmin günlərdə xalqının səsinə səs verən Ümummilli Lider Heydər Əliyevin 20 Yanvar hadisələrinə ilk hüquqi-siyasi qiymət verməsindən bəhs edən videoçarx təqdim edildi. Tədbir iştirakçılarına “20 Yanvar –Tariximizin qəhrəmanlıq səhifəsi” adlı bukletlər təqdim edildi.
Sonda Oğuz rayon Gənclər və İdman İdarəsinin müdiri R.Mahmudov çıxış edərək 20 Yanvar gününün faciə günü deyil, xalqımızın azadlıq və müstəqillik uğrunda mübarizə apardığı qəhrəmanlıq və qürur günü olduğunu vurğuladı.
17 yanvar 2018-ci il tarixində Zaqatala rayon Heydər Əliyev Mərkəzində Humanitar fənlər gimnaziyası və Heydər Əliyev Mərkəzinin birgə təşkilatçılığı ilə qanlı 20 Yanvar faciəsinin 28-ci il dönümü ilə əlaqədar olaraq tədbir keçirilmişdir. Tədbiri giriş sözü ilə Mərkəzin direktoru Famil Rəhimov açıq elan etmişdir. Tədbir iştirakçıları açılışdan sonra şəhidlərin xatirəsinin bir dəqiqəlik sükütla yad etdilər. Daha sonra həmin hüzünlü gün haqqında Mərkəzin əməkdaşı Leyla Məmmədova məruzə etmişdir. Məruzə dinlənildikdən sonra şagirdlər “Tarixin qan yaddaşı” adlı ədəbi-bədii kompazisiya ilə çıxış etdilər. Kompazisiyanı məktəbin tarix müəlliməsi Feyzullayeva Aida təşkil etmişdir. Tədbirin sonunda 20 Yanvara aid “Heç kim unudulmur, heç kim yaddan çıxmır” adlı slayda baxış olmuşdur.