F.Köçərli adına Respublika Uşaq Kitabxanasının 50 illik yubiley tədbiri keçiriləcək
22 dekabr 2015-ci il tarixdə saat 13.30-da Beynəlxalq Muğam Mərkəzində F.Köçərli adına Respublika Uşaq Kitabxanasının 50 illik yubiley tədbiri keçiriləcəkdir.
1965-ci il yanvar ayının 1-də Azərbaycan SSR Nazirlər Sovetinin qərarı ilə M.Qorki adına kitabxananın fondu əsasında yaradılmış F.Köçərli adına Respublika Uşaq Kitabxanası, hazırda respublikamızda fəaliyyət göstərən uşaq kitabxanaları üzrə elmi-metodiki mərkəz funksiyasını yerinə yetirir.
Kitabxana fəaliyyət göstərdiyi 50 il ərzində ölkəmizdə uşaq ədəbiyyatının təbliği, uşaqlarda mütaliə vərdişlərinin yüksəlməsi üçün müstəsna xidmətlər göstərmişdir.
Müstəqillik dövründə F.Köçərli adına Respublika Uşaq Kitabxanası uşaqlarda təfəkkür tərzinin və mütaliə şüurunun yeni tərzdə formalaşdırılması üçün fəaliyyətini müasir tələblərə uyğun olaraq qurmuşdur.
Kitabxana ölkədə keçirilən tədbirlərdə fəal iştirak etməklə yanaşı, MDB və dünyanın bir çox inkişaf etmiş dövlətlərində təşkil olunan tədbirlərdə respublikamızda yüksək səviyyədə təmsil etmiş, İsveçrə, Türkiyə, Moldova, Almaniya, Rusiya, Gürcüstan, Ukrayna, Yaponiya və digər ölkələrin kitabxana cəmiyyətləri ilə interaktiv əlaqələr yaratmışdır.
Beynəlxalq Uşaq Kitabı Şurasının üzvü olan F.Köçərli adına Respublika Uşaq Kitabxanası tərəfindən gənc nəslin hərtərəfli inkişaf etməsi və kamilləşməsi, uşaqlarda vətənpərvərlik hisslərinin daha da güclənməsi, təhsilə marağın artırılması məqsədilə “Göy qurşağı” adlı uşaq jurnalı təsis edilmişdir.