Dünya İrs Komitəsinin bu ilin 30 iyun - 10 iyul tarixlərində Bakıda keçiriləcək 43-cü sessiyası çərçivəsində Azərbaycan daha bir beynəlxalq foruma ev sahibliyi edir. Belə ki, dünyanın 30 ölkəsini təmsil edən 30 gənc irs mütəxəssisi 24 iyun – 02 iyul tarixində Bakıda baş tutacaq Ümumdünya İrs Gənc Peşəkarlar Forumunda iştirak edəcəkdir. Son illər Dünya İrs Komitəsinin illik sessiyaları çərçivəsində ənənəvi olaraq təşkil olunan Gənc Peşəkarlar Forumunun bu ilki mövzusu “Ümümdünya İrsi: Qlobal Çağırışlar üçün Yerli İdeyalar” olacaqdır.
23 iyun tarixində təşkilatçılar tərəfindən Forum iştirakçılarının qarşılanması və Boulevard Baku Otelində yerləşdirilməsi həyata keçirilmiş, onlara Forumda iştirakla bağlı bütün zəruri məlumatlar verilmişdir. Günün sonunda, Forum iştirakçıları üçün Dağüstü Parka səfər təşkil edilmişdir. Burada onlar həmçinin Şəhidlər Xiyabanını da ziyarət etmişlər.
Gənc Peşəkarlar Forumunun ümumi məqsədi 21-ci əsrdə dünyada irsin idarəedilməsində mövcud problemlər və imkanların üzə çıxarılmasıdır. Forumun proqramı rəngarəngliyi ilə seçilir. Belə ki, tədbirin ilk 4 günü fərqli məkanlarda baş tutacaqdır: 1. Azərbaycan Memarlıq və İnşaat Universiteti, 2. "İçərişəhər" Dövlət Tarix-Memarlıq Qoruğu İdarəsi, 3. Qobustan dövlət tarixi-bədii qoruğu və 4. tarixi Qəbələ-İsmayıllı-Lahıc bölgəsi. Əcnəbi və yerli irs ekspertlərinin iştirakı ilə bir sıra təqdimatlar ediləcək, dəyirmi masalar yolu ilə iştirakçılar 1972-ci il Dünya Mədəni və Təbii İrsinin Qorunması ilə bağlı Dünya İrs Konvensiyasına dair praktiki biliklər əldə edəcəklər və həmçinin Dayanıqlı İnkişaf Məqsədləri və Yeni Şəhər Gündəliyinin qlobal konsepsiyaları ilə tanış olacaqlar. Sonda Forum iştirakçıları Dünya İrs Komitəsinin 43-cü sessiyasında öz Bəyannamələrini təqdim edəcəklər.
