Abşeron rayon Xırdalan şəhər Heydər Əliyev Mərkəzində “Gəncliyin səsi” festivalı çərçivəsində Prezident təqaüdçüləri olan gənc musiqiçilərin konserti baş tutub.
Tədbiri giriş sözü ilə açan Abşeron rayon İcra Hakimiyyətinin başçısı İradə Gülməmmədova bütün Azərbaycan gənclərini bu əlamətdar bayram günü münasibətilə təbrik edərək, onlara gün-gündən daha da inkişaf edən ölkəmizdə xoşbəxt və firavan gənclik, sağlamlıq və uğurlu gələcək arzulayıb. Ümummilli lider Heydər Əliyev tərəfindən 1997-ci ildə “2 fevral – Azərbaycan Gəncləri Günü elan edilməsi haqqında” Sərəncam imzalandığını vurğulayan başçı qeyd edib ki, Ulu Öndər daim gənclərə böyük etimad göstərib və onların qüvvəsinə güvənərək demişdir: “Gənclər cəmiyyətimizin əksəriyyətini təşkil edir, onlar bizim bu günümüz, həm də gələcəyimizdir. Biz, Azərbaycan dövləti gənclərə böyük ümidlə baxırıq”.
Tədbirdə çıxış edən Mədəniyyət Nazirliyinin Regional siyasət şöbəsinin əməkdaşı Nicat Şərifov tədbir iştirakçılarına festival haqqında məlumat verdi. Bildirildi ki, elmi və mədəni tərəqqinin müstəqil Azərbaycanın gələcəyi üçün müstəsna əhəmiyyətini nəzərə alaraq istedadlı gənclərə Azərbaycan Respublikası Prezidentinin himayəsini, onların yaradıcılıq potensialını inkişaf etdirmək üçün dövlət qayğısını təmin etmək məqsədilə ümummilli lider Heydər Əliyev “Azərbaycanda gənc istedadlara dövlət qayğısı haqqında” 1996-cı il 22 iyun tarixli 464 nömrəli Fərman imzalamışdır. Bu Fərmana uyğun olaraq Azərbaycan Respublikası Prezidentinin müvafiq sərəncamları ilə indiyə kimi mədəniyyət sahəsində xüsusi istedadı olan 124 gəncin adı Azərbaycanın gənc istedadlarının “Qızıl kitabı”na yazılmış və onlar Azərbaycan Respublikası Prezidentinin xüsusi aylıq təqaüdünə layiq görülmüşlər.
Sonra gənc musiqiçilərin ifasında Azərbaycan və dünya bəstəkarlarının əsərlərindən, xalq mahnıları və muğamlarımızdan ibarət proqram təqdim olunub.
