Mədəniyyət və Turizm Nazirliyinin nəzdində olan muzey və qoruqların əməkdaşları üçün təlimlər keçirilmişdir
“Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi”nin icrası çərçivəsində Turizm Şurasının qərarına uyğun olaraq Mədəniyyət və Turizm Nazirliyinin dəstəyi ilə Azərbaycan Respublikasının Prezidenti Yanında Vətəndaşlara Xidmət və Sosial İnnovasiyalar Agentliyinin ASAN təlim-tədris mərkəzi tərəfindən Mədəniyyət və Turizm Nazirliyinin nəzdində olan, Bakı şəhərində yerləşən muzey və qoruqların əməkdaşları üçün “Müştərilər ilə (vətəndaşlar ilə) əlaqələrin idarə edilməsi” mövzusunda təlimlər keçirilmişdir.
Təlimlərdə muzey və qoruqları ziyarət edən turistlərə effektiv xidmətin göstərilməsi, onlara dolğun və düzgün informasiyaların verilməsi, ünsiyyətin qurulması, psixoloji sorğuların keçirilməsi, problemlərin vaxtında və yerində həll edilməsi və digər istiqamətlər üzrə iştirakçılara məlumatlar verilmişdir.
Həmçinin, təlimlərdə mədəni sərvət, onun qorunması, gələcək nəsillərə ötürülməsi, mədəni sərvətin turizm sektorunun inkişafına təsiri kimi mövzular da müzakirə olunmuş, beynəlxalq fondlar (Beynəlxalq Bank, UNESCO və s.), eləcə də həmin fondlara layihələrin təqdim olunması ilə bağlı məlumatlar verilmişdir.
Qeyd edək ki, Azərbaycan Respublikası Mədəniyyət və Turizm Nazirliyi tərəfindən 21 fevral 2017-ci il tarixində təsdiq olunmuş “Turizm sahəsində Milli Keyfiyyət Sisteminin tətbiqi üzrə Fəaliyyət Planı”na uyğun olaraq, ölkəyə gələn xarici turistlərə göstərilən xidmətin keyfiyyətinin artırılması məqsədi ilə bu cür təlimlərin digər sahələr üzrə də keçirilməsi nəzərdə tutulmuşdur.