İyun ayının 14-də Milli Kitabxanada “15 iyun - Milli Qurtuluş günüdür” adlı geniş kitab sərgisinin açılışı olmuşdur.
Tədbiri Milli Kitabxananın direktoru Kərim Tahirov açaraq qonaqları salamlamış, çıxışında söyləmişdir ki, 1993-cü ildə Azərbaycanın xilası yolunda fədakarlıq nümunələri göstərən ulu öndər Heydər Əliyev xalqın təkidli tələbləri ilə hakimiyyətə gəlmiş, ölkəmizi çətin vəziyyətdən çıxarmağa müvəffəq olmuşdur. Professor qeyd etmişdir ki, Azərbaycanda vətəndaş qarşıdurmasına birdəfəlik son qoyulmuş, ölkəmiz xaosdan, siyasi çəkişmələrdən, sosial-iqtisadi böhrandan xilas olmuşdu. Direktor Kərim Tahirov Ulu öndərin dünyada layiqli hörmət və böyük nüfuz qazandığını, onun uzaqgörən və istedadlı idarəçiliyi sayəsində Azərbaycanın hər sahədə inkişaf etməsini və bugünkü nüfuzlu mövqeyə çatmasını təmin etməsini söyləmişdir. Onu da qeyd etmişdir ki, məhz dahi liderin uğurlu siyasəti nəticəsində Azərbaycan müstəqil, demokratik, hüquqi və dünyəvi dövlət kimi inkişaf etməyə başladı. Respublikanın qarşısında duran problemlər həll olundu, əmin-amanlıq, siyasi sabitlik yarandı. İctimai-siyasi, sosial-iqtisadi, elmi və mədəni həyatda əsaslı dönüş başlandı, xalqımızın bütövlüyü, həmrəyliyi, milli birliyi təmin edildi.
AMEA-nın Fəlsəfə İnstitutu Davamlı İnkişafın Fəlsəfəsi şöbəsinin müdiri professor Sakit Hüseynov çıxış edərək söyləmişdir ki, Azərbaycançılıq məfkurəsi məhz ulu öndər Heydər Əliyevin adı ilə bağlıdır. Ulu öndərin ictimai-siyasi fəaliyyətinə nəzər salan professor Sakit Hüseynov 1969-1986-cı illəri sovet rejimi dövrü, 1987-1990-cı illəri keçid dövrü, 1991-2003-cü illəri Azərbaycanın dövlət müstəqilliyinin bərpası dövrü kimi səciyyələndirmiş, Heydər Əliyevin siyasətdə atdığı qəti və inamlı addımları təhlil etmişdir. Ulu öndərin Azərbaycanın müstəqilliyini qoruyub saxlamaq, Azərbaycanı dünyaya tanıtmaq, habelə xalqımız qarşışında sonsuz xidmətlərindən danışmış, onun mədəniyyətə, incəsənətə verdiyi yüksək qiymətdən söz açmışdır.
Sərgidə Ulu öndər, dahi lider Heydər Əliyevin ictimai-siyasi fəaliyətini əks etdirən azərbaycan, rus, ingilis və digər dillərdə 200-ə yaxın ədəbiyyat nümayiş olunmuşdur.
Sonda tədbir iştirakçıları sərgi ilə tanış olmuşlar.