Milli Qəhrəman Şahlar Şükürova həsr olunmuş “Bir elin Şahları” filminin təqdimatı keçirilib
Mayın 17-də Beynəlxalq Mətbuat Mərkəzində “Aşıq Şəmşir” Mədəniyyət Ocağı İctimai Birliyinin təşkilatçılığı ilə Azərbaycan Respublikası Mədəniyyət Nazirliyinin sifarişi əsasında “Salnaməfilm” studiyasında çəkilmiş, Azərbaycanın Milli Qəhrəmanı Şahlar Şükürov haqqında “Bir elin Şahları” sənədli filminin təqdimatı keçirilmişdir.
Tədbiri ictimai birliyin sədr müavini Həbib Misirov açaraq qəhrəmanın şərəfli həyat və döyüş yolu haqqında ətraflı məlumat vermişdir. Mədəniyyət Nazirliyinin əməkdaşı Almaz Sultanzadə Azərbaycan torpaqlarının bütövlüyü və azadlığı uğrunda canını fəda etmiş qəhrəman övladlarımız haqqında filmlərin gənc nəslin hərbi vətənpərvərlik ruhunda formalaşmasındakı rolundan danışmışdır. Tədbirdə filmin ssenari müəllifi Qorxmaz Şıxəliyev, rejissoru Vəli Səyyadi, Azərbaycan Dövlət Nəşriyyatının baş redaktoru Əlövsət Ağalarov, şair, fəlsəfə doktoru Adil Cəmil, şair Zakir Fəxri, polkovnik Balay Nəsibov çıxış etmişlər.
Sonra “Bir elin Şahları” filmi nümayiş olunmuş və maraqla qarşılanmışdır.
Milli Qəhrəmanın qardaşı Malik Şükürov çıxış edərək ailəsi adından filmin yaradıcı heyətinə və tədbirin təşkilatçılarına minnətdarlığını bildirmişdir.