Mingəçevir Turizm Kollecində görkəmli bəstəkar Qara Qarayevin 100 illik yubleyinə həsr olunmuş rəsm sərgisi və inşa yazı müsabiqəsi
Mingəçevir Turizm Kollecinin təsviri incəsənət sahəsinə böyük marağı olan və bu cəhətdən qabiliyyətləri ilə seçilən tələbələri daima ictimai tədbirlərdə öz fəallıqları ilə seçilirlər. Onlar görkəmli bəstəkar Qara Qarayevin anadan olmasının 100 illiyi münasibəti ilə keçirilən yubiley tədbirlərinə böyük coşğu ilə qoşulmuşlar. Kollecdə təşkil edilmiş “Qara Qarayev yaradıcılığı rəssam tələbələrin fırçasında” adlı rəsm sərgisində istedadlı tələbələrin əl işləri nümayiş etdirilir.Təsviri sənət müəllimi Aygün Hümbətovanın təşəbbüsü ilə hazırlanan sərginin işi fevralın 2-dək davam edəcəkdir. Həmin müddətdə kollecin müəllimləri və tələbələri həmçinin tədris müəssisəsinin qonaqları sərgidə nümayiş etdirilən rəsm işləri ilə tanış ola bilirlər. Sərgi ilk gündən kollektiv üzvlərinin ciddi maraq və diqqətinə səbəb olmuşdur.
Görkəmli bəstəkarın 100 illiyi ilə bağlı keçirilən yubiley tədbirləri çərçivəsində daha bit təşəbbüs kolecin ədəbiyyat müəllimləri tərəfindən irəli sürülmüşdür. Yanvarın əvvəllərindən başlayaraq kollecdə “Qara Qarayev bəstəkarlıq məktəbinin banisidir” mövzusunda inşa müsabiqəsi keçirilir. Müsabiqəyə bütün tədris qruplarının tələbələri qoşulmuşlar. İnşa müsabiqəsi yanvarın sonunadək davam edəcəkdir. Müsabiqədə ilk üç yeri tutan tələbələr həvəsləndirici mükafatlarla təltif olunacaq.