Mingəçevir Turizm Kollecində “Müstəqilliyimiz daimidir, dönməzdir və əbədidir” mövzusunda konfrans keçirilib
Azərbaycan Respublikasının Dövlət Müstəqilliyi Günü Mingəçevir Turizm Kollecində silsilə tədbirlərlə bayram edilib. Dəyirmi masalar, inşa, rəsm müsabiqələri və idman yarışları təşkil olunaraq pedaqoq və tələbələrin vətənpərvər duyğularının gücləndirilməsinə xidmət edən addımlar atılıb. Bayram münasibəti ilə təşkil olunan tədbirlər tələbələrin rəsm və əl işlərindən ibarət sərgiyə baxışla davam etdirilib. Ardınca kollektiv tədbirlərin zirvə nöqtəsi olan elmi – nəzəri konfransda bir araya gəlib. Konfrans kollec rəhbərliyinin təklifi ilə Azərbaycan Respublikasının Dövlət Himninin canlı ifası ilə öz işinə başlayıb. Tədbir boyu Azərbaycan xalqının ta qədimdən müasir dönəmlərədək apardığı azadlıq mübarizəsi barədə müzakirələr aparılaraq maraqlı tarixi faktlar açıqlanıb.
“Müstəqilliyimiz daimidir, dönməzdir və əbədidir” adlı konfransı açıq elan edən kollecin direktoru Əyyub Əyyubov müasir Azərbaycan dövlətçiliyinin yaranma mərhələləri və tarixi barədə söhbət açaraq xoşbəxt xalq olduğumuzu bildirib:
“Azadlıq hər bir xalqın müqəddəs diləyi olsa da hər bir xalqa nəsib olan nemət deyil. Xoşbəxtik ki, biz azad, müstəqil dövləti olan bir xalqıq. Bu azadlığı əbədi olaraq qorumağı özümüzə şərəf işi bilməliyik. Necə ki, dövlətçiliyimizin memarı ulu öndər Heydər Əliyev bu missiyanı davam etdirməyi bizə əmanət etmişdi.”
Daha sonra konfransda digər məruzələr dinlənilib .Pedaqoqlar Ceyhun Abdullayev, Aybəniz Əliyeva və Eldar Dərişov müvafiq olaraq “18 oktyabr Azərbaycanın Dövlət Müstəqilliyi Günüdür”, “Müstəqillik dövründə Azərbaycan ədəbiyyatı” və “ Azərbaycan Respublikası müstəqillik illərində şərəfli dövlətçilik yolu keçmişdir” mövzularında çıxış edib. Səslənən fikirlərdə prezident cənab İlham Əliyevin siyasi kursuna olan dərin inam hissi öz əksini tapıb.
Konfrans həm də müxtəlif müsabiqə qaliblərinin kollec rəhbərliyi tərəfindən mükafatlandırılması ilə əlamətdar olub.
Tədbir tələbə özfəaliyyət qrupu tərəfindən təqdim edilən ədəbi-bədii kompozisiyanın nümayişi ilə davam etdirilib.
