Mingəçevir Turizm Kollecində Qara Qarayevin yaradıcılığına həsr olunmuş oxucu konfransı keçirilib
2018 - ci il Azərbaycanın görkəmli bəstəkarı Qara Qarayevin 100 illik yubileyinin keçirilməsi ilə yaddaşlarda qalacaqdır. Mingəçevir Turizm Kollecində görkəmli bəstəkarın yubileyi münasibətilə silsilə tədbirlərin keçirilməsi nəzərdə tutulmuşdur. Bu tədbirlər sırasına kollecin kitabxanasında baş tutmuş oxucu konfransı ilə start verildi.
“Bəstəkar Qara Qarayev nəslinin mədəniyyət və incəsənətimizin və dövlətçiliyimizin tərəqqisində mövqeyi” adlı konfransda pedoqoqlarla yanaşı əyani və qiyabi şöbələrin tələbələri də iştirak edirdi. Xüsusilə, bədii özfəaliyyət qrupunun üzvü olan yaradıcı gənclər öz fəallığı və mövzuya marağı ilə seçilmişdir. Oxucu konfransı fəal fikir mübadiləsi şəraitində keçirildi. İştirakçılara Qara Qarayevin Azərbaycan musiqi sənətinin incisinə çevirilmiş əsərləri haqqında ətraflı məlumatlar verildi.
Çıxışlar mövzu ətrafında maraqlı müzakirələrə yol açdı. Tədbirdə həmçinin bəstəkarın yaradıcılığına həsr olunmuş kitablar və məqalələrdən söhbət açıldı. Dolğun çıxışları, fəal müzakirələri dinləyən iştirakçılar oxucu konfransından dərin təəssüratlarla ayrıldılar.