Muzey Mərkəzi və "dOM" Teatrı Mikayıl Müşfiqin xatirəsinə həsr edilmiş "Etiraf" adlı tədbir təqdim edəcək
24 dekabr tarixində saat 19.00-da Mədəniyyət Nazirliyi, Dövlət Muzey Mərkəzi və "dOM" Teatrının təşkilatçılığı, "ASAN Radio"nun informasiya dəstəyi ilə Muzey Mərkəzində Azərbaycanın görkəmli şairi Mikayıl Müşfiqin xatirəsinə həsr edilmiş "Etiraf" adlı tədbir keçiriləcək. İnteraktiv üslubda baş tutacaq gecədə tamaşaçılar bütün gedişatın ayrılmaz hissəsinə çevriləcəklər. Qeyd edək ki, tədbir Mədəniyyət Nazirliyinin “Söz” ədəbi layihəsi çərçivəsində keçirilir.
dOM Teatrı Tərlan Rəssulov tərəfindən 2016-cı ildə teatr aləmində yeni və alternativ metodika və üslubların yaradılması və inkişaf etdirilməsi məqsədilə yaradılmışdı. İndiki zamanda dOM Teatrı Azərbaycanda ilk və hələ ki, yeganə interaktiv teatrdır. Teatrın işləri siyahısında Əlilliyi olan insanlar üçün İcma Teatrının yaradılması, BMT-nin Qaçqınlarla iş üzrə Ali Komissarlığının dəstəyi ilə “Limbo” immersiv tamaşası, “Poliqon” yaradıcılıq platforması və s. vardır.