Nazir Əbülfəs Qarayev İndoneziyanın Azərbaycandakı səfiri Hüsnan bəy Fənani ilə görüşdü
2018-ci ilin 6 mart tarixində mədəniyyət və turizm naziri Əbülfəs Qarayev ilə
Indoneziya Respublikasının Azərbaycan Respublikasındakı Fövqəladə və Səlahiyyətli Səfiri Hüsnan bəy Fənani arasında görüş keçirildi.Görüşdə Azərbaycan və İndoneziya arasında mədəniyyət və turizm sahələri üzrə əməkdaşlıq məsələləri müzakirə olundu.
Səfir 2016-2017-ci illərdə Azərbaycanda keçirilən İndoneziya mədəniyyət festivalının təşkilində dəstəyə görə təşəkkürünü bildirdi və bu ilin sentyabr ayında bu festivalın yenidən keçirilməsinin planlaşdırıldığını qeyd etdi. O, nazirlik tərəfindən bu festivala yenidən dəstək göstərilməsini xahiş etdi.
Nazir mədəniyyət sahəsində keçiriləcək tədbirlərə nazirlik tərəfindən müvafiq dəstəyin göstərilməsində hər zaman hazır olduğunu vurğuladı.
Həmçinin səfir ölkəmizin turizm potensialına toxunaraq iki ölkə arasında turizm və mədəniyyət sahəsində əlaqələrin inkişaf etdirilməsi üçün təkliflər irəli sürdü. İndoneziyanın turizm şirkətlərinin Azərbaycanla turizm sahəsində əməkdaşlıqda maraqlı layihələrinin olduğu bildirildi.
Nazir İndoneziya Respublikası ilə bu sahədə fəal əməkdaşlıq etməyə hazır olduğunu və bu məqsədlə aidiyyəti şəxsləri təlimatlandıracağını bildirdi.
Səfir səmimi qəbula görə minnətdarlığını ifadə etdi.