“Qızıl Dərviş mükafatı” laureatı Qax Dövlət Kukla teatrının zalı tamaşaçılarla dolu idi. Zalda bağça uşaqları, məktəblilərlə birgə rayon İcra Hakimiyyətinin, idarə, müəssisə və təşkilat nümayəndələri, valideynlər iştirak edirdilər. Teatrın ədəbi-hissə müdiri Osman Abdullayev səhnə önünə gələrək, sənət bayramı münasibətilə tamaşaçıları salamladı. Dövlətimizin teatrlara, səhnə sənətinə, yaradıcı insanlara olan sonsuz qayğısından söhbət açdı. 46 illik teatrın fəaliyyəti, uğurları, repertuar tamaşaları haqda yığcam məlumat verdi.
Sonra teatrın direktoru, respublikanın əməkdar mədəniyyət işçisi Nazim Mahmudov çıxış etdi. Teatrın kollektivini, rayon ictimaiyyətini, balaca sakinləri bu əlamətdar hadisə münasibətilə təbrik etdi.
Qax rayon İcra Hakimiyyətinin məsul nümayəndəsi Mətanət Kərimova teatr işçilərini rayon icra hakimiyyəti adından salamladı. Teatrın kollekvinə fəaliyyətində uğurlar arzuladı. “Şəlalə” rayon qəzetinin əməkdaşı İlyas Mehrabov valideynlər adından teatr kollektivini təbrik etdi.
Sonra Osman Abdullayevin “Babanın nəsihəti” tamaşasının premyerası oldu.
Tamaşanın quruluşçu rejissoru Rahib Məmmədov, tərtibatçı rəssamı Əmrah Məmmədov, musiqi tərtibatçısı Yusif Abdurahmanovdur.
Uşaqlarda təbiətə məhəbbət, ətraf mühitə sevgi hisslərinin aşılanması, meşələri qorumaq, “Hərə bir ağac əkək” aksiyasına qoşulmağa çağırış tamaşanın əsas ideyasıdır.
Teatrın aktyorları Nuru Mustafayev, (Şəmistan baba və Şir), Aynurə Abbasova (Ağacdələn), Elnarə Razıyeva (Tülkü), Azər Kərimov (Ayı), Araz Mehrablı (Canavar) öz rollarını məharətlə oynamışlar. Uşaq bağçalarının müəllim və tərbiyyəçiləri belə bir səhnə əsərinə həyat verdiklərinə görə teatrın bütün kollektivini təbrik etdilər.
