Qazax rayon Elmar Hüseynov adına Mərkəzi Kitabxananın Uşaq şöbəsi AXC-nin 100 illliyinə həsr olunmuş “Gülüstan, Azad Azərbaycan!” adlı ədəbi-bədii gecə keçirib
24 may 2018 ci il tarixdə Mərkəzi Kitabxananın Uşaq şöbəsi açıq havada AXC-nin 100 illiyinə həsr olunmuş “Gülüstan, Azad Azərbaycan!” adlı ədəbi-bədii gecə keçirib. Təbirdə Qazax şəhər M. Hüseyn adına məktəb-lisey, 2, 3, 4 və 5 saylı tam orta məktəbin şagirdləri, təhsil və mədəniyyət işçiləri, fəal oxucular iştirak ediblər.
Tədbir məktəblilərin ifasında Azərbaycanın Dövlət Himninin səslədirilməsi ilə başlanıb. Uşaq şöbəsinin müdiri Firəngiz Abdıyeva tədbiri açaraq Azərbaycan Xalq Cümhuriyətinin tarixindən qısa və ətraflı məlumat verib: 1918- ci il 28 may günü Azərbaycan tarixinə İstiqlal Bəyannaməsinin elan olunduğu gün kimi qızıl hərflərlə yazılıb. Müsəlman Şərqində ilk Demokratik Parlamentli Respublika yaradılıb. 1991-ci ildə Azərbaycan Demokratik Respublikasının tarixi varisliyi üzərində Azərbaycan yenidən Dövlət Müstəqilliyini bərpa edib.
Tədbirin bədii hissəsində şəhər məktəblilərindən Əhmədli Rəvan, Hacalıyev Ceyhun, Tatlıyeva Nərmin, Vəliyeva Xədicə, Cəfərov Səid, Cəfərova Solmaz və başqalarının ifasında şeirlər dinlənilib. Şəhər 4 saylı tam orta məktəbin müəllimi Vüsalə Əhmədovanın rəhbərliyi ilə 2-ci sinif şagirdlərinin bayrama həsr olunmuş ədəbi kompozisiyası alqışlarla qarşılanıb: qəlbi milli vətənpərvərlik hissi ilə çırpınan məktəblilər “Azərbaycan” nəğməsinin sədaları altında rəqs edərək simvolik olaraq parçalardan üçrəngli bayraq yaradıblar.
AXC-nin tarixinə dair keçirilən əyləncəli viktorina uşaqlarda bilik yarışması kimi böyük həvəs yaradıb. Şən mahnı və rəqs edən uşaqlar Müstəqil, Gülüstan, Azad Azərbaycanın övladları kimi əsl bayram sevinci yaşayıblar.
28 may – Respublika Günü münasibəti ilə Quşçu Ayrım kənd kitabxana filialı sərgi, N. Nərimanov qəsəbə kitabxana filialı məruzə keçiriblər. Bayram tədbirində fəal oxucular şairlərimizin ulu öndər Heydər Əliyevə, Vətənə,Şəhidlərimizə həsr etdikləri şeirlərdən misralar söyləyiblər.