Rəşid Behbudov adına Dövlət Mahnı Teatrında “Sazın Gəncliyi, Gəncliyin Sazı” adlı Gənc Aşıqların Yekun Konsert Proqramı keçirildi
Rəşid Behbudov adına Dövlət Mahnı Teatrında “Folklor Ənənələrinin İnkişafına Dəstək” İctimai Birliyinin “
Sazın Gəncliyi, Gəncliyin Sazı” adlı Gənc Aşıqların Yekun Konsert Proqramı keçirildi. Tədbir Azərbaycan Respublikası Mədəniyyət və Turizm Nazirliyinin maliyyə dəstəyi və qeyd edilən ictimai birliyin təşkilati dəstəyi ilə baş tutmuşdur.Müasir dövrün sürətli inkişafı, texnologiyanın həyatımızda çox yer tutmasına baxmayaraq, qədim adət-ənənələrimiz, milli musiqilərimiz qorunmaqdadır. Layihə gənclərin bu sənətə gəlişinə dəstək olmaq, stimullaşdırmaq üçün müxtəlif tədbirlər həyata keçirir.
Aşıq sənətinin UNESCO-nun Qeyri-maddi mədəni irsin qorunması üzrə reprezentativ siyahısına daxil edilməsi yeni bir uğurun yaranmasına gətirib çıxardı. Bu da milli irsimizin dünyəviliyini, bəşəriliyini, ona irqindən, dinindən asılı olmayaraq, bütün millətlərin maraq göstərməsini təsdiqlədi.
Tədbirdə qeyd olunduğu kimi, xalqın tarixi dəyəri və mənəvi inkişaf səviyyəsi həmin xalqa mənsub yaradıcı şəxslərin yaradıcılıq fəaliyyət nəticələri ilə müəyyən olunur. Təbii ki, Azərbaycan xalqının yaradıcılıq istiqamətlərindən bir də çoxəsrlik aşıq musiqisində təzahür olunur. Bu, xalqın fəlsəfi mədəniyyətinin formalaşdığı xüsusi bədii təfəkkür sahəsidir. Bu incəsənət növündə poeziya, musiqi, rəqs, ifaçılıq sintezi özünü göstərir.
Layihənin ərsəyə gəlməsində əsas məqsəd və nəticə aşıq sənətinin böyük mənəvi dəyər olaraq qorunub saxlanılmasıdır. Bu sənətin bölgələrdə geniş şəkildə yayılmasını təşkil etməklə sənətə yeni simalar gətirilmiş, gənclərin aşıq sənətinə marağı artırılmış və gənc istedadlar üzə çıxarılmışdır.