Respublika Gənclər Kitabxanası tərəfindən “Azərbaycanın Milli Dirçəliş yolu” mövzusunda tədbir keçirildi
Cəfər Cabbarlı adına Respublika Gənclər Kitabxanası Yasamal rayonundakı 21 saylı Orta Məktəbdə Milli Dirçəliş Gününə həsr olunmuş “Azərbaycanın Milli Dirçəliş yolu” mövzusunda tədbir keçirdi.
Kitabxananın şöbə müdiri Qənirə Mustafayeva xalqın istiqlal mücadiləsinin əsas mərhələlərindən biri olan 17 noyabr – Milli Dirçəliş Gününün Azərbaycanın müstəqilliyinin bərpa olunmasında tarixi rolu haqqında şagirdlərə ətraflı məlumat verdi. Milli tərəqqiyə doğru uzanan tarixi yolun başlanğıcının əsasının milli dirçəlişin yaranmasından keçdiyini dedi.
Məktəbin direktor müavini Zöhrə Yusifova Azərbaycanda 1988-ci ilin noyabr hadisələrinin əsl xalq hərəkatı, milli azadlıq hərəkatı olmasını bildirdi. Qeyd etdi ki, öz haqqı, azadlığı, torpaqlarına sahib çıxmaq arzusu xalqımızın bu müqəddəs ideallar naminə birlik və bərabərliyini bir daha bütün dünyaya nümayiş etdirdi.
Məktəbin şagirdi Murad Məmmədov milli dirçəlişimizi vətənimizin istiqlaliyyət qazanmasında əsas amil kimi qiymətləndirdi. Bütün həmyaşıdlarını vətəni sevməyə, hər qarış torpağını qorumağa səslədi. Şagirdlərdən Ziyarət Allahverdiyeva, Oqtay Əhmədov da Milli Dirçəliş gününün tarixi, xalq hərəkatında birlik, mübarizlik barədə danışdıqdan sonra Azərbaycana, müstəqilliyə, dirçəliş günümüzə həsr olunan şerlər söylədi, torpaqlarımıza yalnız sülh, əmin-amanlıq arzuladılar.
Tədbirin sonunda kitabxanada “17 noyabr Azərbaycanda Milli Dirçəliş günüdür” adlı kitab sərgisinə baxış keçirildi.