Respublikamızın bölgələrində regional mədəniyyət idarələrinin təşkilatçılığı ilə Milli Qurtuluş Gününə həsr edilən silsilə tədbirlər keçirilib
Azərbaycan xalqının taleyində böyük əhəmiyyət daşıyan elə günlər var ki, həmin günlərdə onun gələcək həyatını müəyyən edən mühüm başlanğıcların əsası qoyulub. Belə günlərdən ən önəmlisi tariximizə qızıl hərflərlə yazılmış 15 İyun – Milli Qurtuluş Günüdür. Milli Qurtuluş Günü Azərbaycan xalqı üçün sadəcə təqvim bayramı deyil, böyük ictimai, siyasi və tarixi əhəmiyyətə malik bir gündür. İyunun 15-i xalqımız üçün əsl qurtuluş tarixidir. Bu tarixi yaradan isə Azərbaycanın müstəqilliyinin qorunub saxlanmasında, möhkəmlənməsində, inkişafında müstəsna rol oynayan, daim xalqına arxalanan və xalqına arxa, dayaq olan bir insan - Heydər Əliyevdir.
Bu gün münasibətilə respublikamızın bölgələrində Mədəniyyət Nazirliyinin regional mədəniyyət idarələrinin təşkilatçılığı ilə silsilə tədbirlər keçirilmişdir.
Təşkil edilən tədbirlərdə müvafiq region üzrə icra hakimiyyətinin və regional mədəniyyət idarələrinin rəhbərliyi və nümayəndələri, şəhərlərdə (rayonlarda) çalışan mədəniyyət və təhsil işçiləri, ziyalılar və şəhər (rayon) sakinləri iştirak etmişdir.
Tədbirlərdə Milli Qurtuluş Günü barədə ətraflı məlumat verilmiş və bu günün əhəmiyyətini əks etdirən faktlar tədbir iştirakçılarının diqqətinə çatdırılmışdır.
Rəsmi hissədən sonra tədbirlər konsert proqramları ilə davam edib. Konsertlərdə Azərbaycan və xarici ölkə bəstəkarlarının əsərləri, xalq mahnıları səsləndirilib, milli rəqslərimiz və musiqi alətlərimiz ifa olunub.
Tədbirlər iştirakçıların marağına səbəb olub, alqışlarla qarşılanıb.