Sabirabad rayon Mədəniyyət Mərkəzində 20 Yanvar şəhidlərinin əziz xatirəsinə həsr olunmuş tədbir keçirilmişdir
Azərbaycan xalqının tarixinə Qanlı Yanvar faciəsi kimi daxil olmuş 1990-cı il 20 Yanvar hadisələrindən artıq 28 il keçir.1990-cı il yanvarın 19-dan 20-nə keçən gecə Bakı şəhərinə keçmiş Sovet İttifaqının qoşun hissələri fövqəladə vəziyyət elan edilmədən yeridilmiş, dinc əhaliyə divan tutulmuş, yüzlərlə insan qətlə yetirilmiş, yaralanmış və itkin düşmüşdür. Həmin faciəli günlərdə öz ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək Şəhidlik zirvəsinə ucaldılar.
18 Yanvar 2018-ci il tarixində Sabirabad rayon Mədəniyyət Mərkəzində 1990-cı il 20 Yanvar şəhidlərinin əziz xatirəsinə həsr olunmuş tədbir keçirilmişdir.
Öncə Azərbaycanın azadlığı uğrunda şəhid olanların əziz xatirəsi bir dəqiqəlik sükutla yad edildi. Sabirabad Regional Mədəniyyət və Turizm İdarəsinin məsləhətçisi T.Əzimov 20 Yanvar faciəsindən söz açaraq bildirib ki, 20 Yanvar faciəsi Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuşdur. Həmin o məşəqqətli günlər hər birimizin yaddaşına əbədi həkk olunub. Həmin gün Azərbaycan tarixində qanla yazılmış bir səhifədir, amma faciə deyil. Bu tarix Azərbaycanın istiqlal yolunun zirvəsidir.
Digər çıxış edənlər də 20 Yanvar hadisələrini öz azadlığı, müstəqilliyi ölkəsinin ərazi bütövlüyü uğrunda mübarizə aparan xalqımızın tarixində şanlı səhifə kimi səciyyələndirmişlər.
Həmçinin Mərkəzin foyesində şəhidlərimizin əziz xatirəsinə həsr olunmuş fotostendlərdən və Mərkəzin nəzdində fəaliyyət göstərən rəsm dərnəyi üzvlərinin əl işlərindən ibarət guşə yaradılmışdır.