24 sentyabr saat 16.00-da
“Xəzər” Universitetinin Fikrət Əmirov adına konfrans-konsert salonunda (ünvan: Bəşir Səfəroğlu küç. 122) SSRİ Xalq artisti, görkəmli bəstəkar Murad Kajlayev ilə yaradıcı görüş təşkil olunacaqdır.Tədbirdə bəstəkar Murad Kajlayevin sənət dostları Xalq artistləri Rauf Babayev, Tofiq Bakıxanov, Natəvan Şeyxova, “Xəzər” Universitetinin təsisçisi, Direktorlar və Qəyyumlar Şurasının sədri, professor Hamlet İsaxanlı, Əməkdar incəsənət xadimləri Rafiq Seyidzadə, Sərdar Fərəcov, Telman Hacıyev və başqaları çıxış edəcəklər.
Tədbirin bədii hissəsində Xalq artisti Fəxrəddin Kərimovun dirijorluğu ilə “Xəzər” Universitetinin kamera orkestri (bədii rəhbər Zülfiyyə Sadıqova), solistlər Səbinə Vahabzadə (vokalçı), Culiya Behbudova (vokalçı), İsrafil Rəsulov (truba ifaçısı), Səidə Tağızadə (pianoçu) və Azər Dəmirov (violin ifaçısı, ABŞ) maraqlı musiqi nömrələrini tədbir iştirakçılarına təqdim edəcəklər.
Murad Kajlayev Dağıstan musiqisinin banilərindən biridir. Bəstəkarın yaradıcılığı vətəninin musiqisi, tarixi, zəngin folkloru ilə ayrılmaz surətdə bağlıdır. O, 1931-ci ildə Bakıda anadan olmuşdur. Musiqi istedadı üzə çıxdıqdan sonra Bülbül adına Orta İxtisas Musiqi Məktəbinə daxil olmuşdur. Artıq 12 yaşında Böyük Vətən Müharibəsi illərində hospitallarda yaralı əsgərlər qarşısında ilk əsəri ilə fortepianoda çıxış etmişdir. 1955-ci ildə Azərbaycan Dövlət Konservatoriyasını bəstəkarlıq ixtisası üzrə (professor B.İ.Zeydmanın sinfi) bitirmişdir. Eyni zamanda dirijorluq ixtisası üzrə ilk təcrübəsini Niyazidən almışdır. Təhsil aldığı illərdə Azərbaycan Bəstəkarlar İttifaqının üzvü olmuş və əsərləri konsert proqramlarında ifa olunmağa başlamışdır. Murad Kajlayev 68 il bəstəkarlıq fəaliyyətinə malik ictimai xadimdir. Onun əsərləri dünyanın bir çox ölkələrində səslənir.
