Məlum olduğu kimi, ölkə başçısının müvafiq sərəncamı ilə bu ilin noyabr ayında Sumqayıtın şəhər statusu almasının 70 illiyi xüsusi qeyd olunacaqdır.
Sumqayıt Dövlət Dram Teatrının yaradıcı heyəti tanınmış dramaturq Əli Əmirlinin şəhərin 70 illik yubileyinə həsr olunmuş “Sevgilim Sumqayıt” lirik-psixoloji dramını hazırlayaraq tamaşaçıların ixtiyarına vermişdir.İyulun 19-da teatr 50-ci mövsümünü həmin tamaşanın premyerası ilə başa vurdu. Qeyd edək ki, Sumqayıt Dövlət Dram Teatrı yubiley mövsümündə bir sıra uğurlu layihələrə imza atdı.
Bağlanış mərasimində iştirak edən ziyalıları, mətbuat nümayəndələrini, qonaqları salamlayaraq sözə başlayan teatrın direktoru, Əməkdar artist Mübariz Həmidov dövlətin teatr sahəsinə dəstəyini xüsusi vurğuladı. Görülən işləri, yaradıcılıq imkanlarının yaxşılaşdırılmasını kollektivdə ruh yüksəkliyinin artmasına rəvac verən əsas amil hesab edən direktor yubiley mövsümündə Sumqayıt teatrındakı canlanmanın növbəti teatr mövsümündə də davam edəcəyini söylədi. Daha sonra teatrın baş rejissoru Xalq artisti Firudin Məhərrəmov söz aldı. Baş rejissor müxtəlif janrlı tamaşaların ərsəyə gəlməsilə yanaşı rəhbərliyin təbliğat yönümlü ideyalar irəli sürərək teatra tamaşaçı axınının güclənməsinə nail olduğunu qeyd etdi. Bildirdi ki, cari mövsümdə repertuara daxil edilən “Tıq-tıq xanım”, “Danışan gəlincik”, “Dəfn edilməmiş ölülər”, “Mamoy kişinin yuxuları”, “Sevgilim Sumqayıt” kimi uğurlu tamaşaların rəğbət görməsi həyata keçirilən PR kompaniyaları ilə də bağlıdır.
Sumqayıt Dövlət Dram Teatrının direktoru Əməkdar artist Mübariz Həmidov quruluş verilən tamaşaların, maarifləndirici proqramların, sosial layihələrin qənaətbəxş nəticələnməsində il ərzində bizimlə əməkdaşlıq edən, teatrımızda baş verən ədəbi hadisələri KİV-də yayımlamaqda dəstəyini əsirgəməyən jurnalistlərin əməyinin əhəmiyyətini vurğuladı. Daha sonra tamaşa teatrsevərlərə təqdim edildi.
