Cari ilin 19-20 noyabr tarixində Gürcüstanın paytaxtı Tbilisi şəhərində "Creative Spark" adlı proqramın rəsmi açılışı baş tutmuşdur. Açılışda yaradıcı sənayelərin iqtisadiyyatda rolu, təhsil sahəsində beynəlxalq əməkdaşlıq kimi mövzulara dair müzakirələr təşkil olunmuşdur.
Tədbirdə Azərbaycan Respublikasının Mədəniyyət Nazirliyini Beynəlxalq əməkdaşlıq və innovativ inkişaf şöbəsinin Beynəlxalq layihələr və innovasiyalar sektorunun müdiri Ramil Abbəkirov təmsil etmişdir.
"Creative Spark" proqramı yaradıcı iqtisadiyyatın inkişaf etdirilməsi istiqamətində universitetlərarası bilik və təcrübə mübadiləsinə dəstək məqsədilə Britaniya Şurası (British Council) tərəfindən həyata keçirilir. Proqram çərçivəsində Azərbaycan, Gürcüstan, Ermənistan, Ukrayna, Qazaxıstan, Qırğızıstan və Özbəkistandan olan ali təhsil müəssisələri Böyük Britaniyadan tərəfdaş universitet taparaq, layihə formalaşdırır və müraciət edirlər. Layihə seçildiyi halda, onun icrasına Britaniya Şurası tərəfindən 50 min funt sterlinq məbləğində vəsait ayrılır.
Məmnunluq hissi ilə qeyd edirik ki, AR Mədəniyyət Nazirliyinin dəstəyi ilə nüfuzlu London İncəsənət Universiteti və Azərbaycan Dövlət Mədəniyyət və İncəsənət Universitetinin birgə layihəsi təqdim edilmişdir. Layihə Azərbaycandan təqdim olunan 10 layihə arasından seçilən 3 layihədən biri olmuşdur. Layihənin icrasına “YARAT” təşkilatı da qoşulmuşdur.