2018-ci il 18 dekabr tarixində Türkiyə Respublikasının Kastamonu şəhərində türkdilli ölkələrin mədəniyyət nazirləri Daimi Şurasının 36-cı Dönəm Toplantısı keçirilib. Tədbirdə Mədəniyyət Nazirliyinin Beynəlxalq əməkdaşlıq və innovativ inkişaf şöbəsinin əməkdaşı iştirak edib.
Türkiyə Respublikasının mədəniyyət və turizm naziri Mehmet Nuri Ersoy, TÜRKSOY təşkilatının baş katibi Düsen Kaseinov, TÜRKSOY üzv ölkələrinin mədəniyyət nazirlərinin müavinləri və nümayəndə heyətlərinin rəhbər şəxsləri açılış nitqi ilə çıxış etdilər. Daha sonra 2018-ci ildə TÜRKSOY təşkilatının yaradılmasının 25-ci ildönümünün tamam olması münasibətilə türk mədəniyyətinin ınkişafında xidməti olan şəxslərə medallar təqdim edildi. Açılış mərasiminin ardınca TÜRKSOY-un 25-ci ildönümü münasibətilə kitab və rəsm sərgilərinin açılısı oldu.
Toplantının işçi sessiyasında TÜRKSOY-un 2018-ci il üzrə fəaliyyətinə dair hesabat və maliyyə hesabatı, həmçinin təşkilatın 2019-cu il üçün Tədbirlər Planı təsdiq edildi, 2018-ci il ərzində Kastamonu şəhərində keçirilən tədbirlər haqqında məlumat təqdim olundu.
TÜRKSOY mədəniyyət nazirləri Daimi Şurasının 36-cı Dönəm Toplantısının qərarlarına əsasən Qırğız Respublıkasının Oş şəhəri 2019-cu il uzrə türk dünyasının mədəniyyət paytaxtı elan olundu.
Bununla yanaşı Azərbaycan və Türkiyənin təkliflərinə əsasən dahi Azərbaycan şairi və mütəfəkkiri İmadəddin Nəsiminin anadan olmasının 650 illik və Aşıq Veysəlin anadan olmasının 125 illik yubileyləri münasibətilə 2019-cu il TÜRKSOY çərçivəsində İmadəddin Nəsimi və Aşıq Veysəl ili elan olundu.
İclasın sonunda TÜRKSOY mədəniyyət nazirləri Daimi Şurasının 37-il toplantısının 2019-cu ildə Qırğız Respublikasının Oş şəhərinde keçirilməsi qərara alındı.
Sonda TÜRKSOY mədəniyyət nazirləri Daimi Şurasının 36-cı toplantısının Qərarları və Yekun Bəyannaməsi imzalandı.
Toplantıdan sonra “Kastamonu – türk dünyasının mədəniyyət paytaxtı 2018” mədəniyyət ilinin bağlanış mərasimi keçiriləcəkdir. Konsertdə türk dünyasının incəsənət ustalarının iştirakı gözlənilir. Tədbirdə ölkəmizi Azerbaycan Dövlət Rəqs Ansamblının üzvləri təmsil edəcəkdir.