Xaçmaz Regional Mədəniyyət və Turizm İdarəsinin tabeliyində fəaliyyət göstərən mədəniyyət müəssisələrində 20 Yanvar faciəsinə həsr edilmiş silsilə tədbirlər keçirilib
Xaçmaz Heydər Əliyev Mərkəzində YAP Xaçmaz rayon təşkilatı ilə birgə 20 Yanvar faciəsinin 28 - ci ildönümü ilə əlaqədar "Müstəqilliyə aparan yol" mövzusunda tədbir keçirildi. İlk öncə tədbir iştirakçıları Şəhidlərimizin xatirəsini bir dəqiqəlik sükutla yad etdilər. Mərkəzin nəznində fəaliyyət göstərən "bədii qiraət" dərnəyinin üzvlərinin ifasında şəhidlərimizə həsr olunmuş şeirlər səsləndirildi, Xaçmaz Uşaq İncəsənət Məktəbinin şagirdlərinin əl işlərindən ibarət "Qan yaddaşımız" mövzusunda hazırladıqları rəsm sərgisinə baxış keçirildi.
Quba rayon MKS-nin mərkəzi kitabxanasının oxuculara xidmət şöbəsinin oxu zalında 20 Yanvar faciəsinin 28-ci ildönümünə həsr olunmuş “Qəhrəmanlıq tarixinin 20 yanvar zirvəsi” adlı tədbir keçirildi. Sonda 20 yanvar faciəsinin 28-ci ildönümünə həsr olunmuş slayd izləndi, “Şəhidlər ölməz, vətən bölünməz!” adlı sərgiyə baxış keçirildi.
Qusar rayon uşaq incəsənət məktəbində 20 yanvar faciəsinə həsr olunmuş tədbir bir dəqiqəlik sükütla başlanmışdır. Məktəbin müəllim və şagird heyətinin timsalında faciəyə həsr olunmuş rəsm və əl işləri nümayiş etdirilmiş,şeirlər söylənmiş, həzin musiqi nömrələri ifa olunmuşdur.
Şabran rayon Mərkəzi Kitabxanada 20 Yanvar Ümumxalq hüzn günü ilə əlaqədar “Daima ürəklərdə yaşayan şəhidlər” adlı ədəbi-bədii kompozisiya keçirildi. Tədbirin sonunda 20 Yanvar faciəsi qurbanlarının xatirəsinə həsr olunan “Tarixin qan yaddaşı” adlı kitab sərgisi nümayiş olundu.
Siyəzən rayon Mədəniyyət Mərkəzində “Müstəqilliyimizə gedən yol 20 Yanvar faciəsindən keçir” mövzusunda dəyirmi masa keçirilmişdir. Tədbirdə 20 Yanvar hadisələrindən bəhs edən videoçarx nümayiş etdirilmişdir.
Keçirilən tədbirlərdə çıxış edənlər faciə haqqında məlumat verərək, bu qanlı hadisənin yaddaşlardan heç vaxt silinməyəcəyini, faciə qurbanlarının vətən yolunda qəhrəmanlıq göstərdiklərini, onların hər zaman qəlbimizdə yaşayacaqlarını bildirdilər.