11 aprel 2019-cu il tarixind
ə Xaçmaz-Tarix Diyarşünaşlıq muzeyində Aprel döyüşlərinə və Vətən uğrunda həlak olmuş Şəhidlərimizin xatirəsinə həsr olunmuş "Vətən Naminə" adlı tədbir keçirildi.Tədbirdə, Şəhid ailələri, Qarabağ müharibəsi iştirakçıları, məktəblilər, Səfərbərlik və Hərbi xidmətə Çağırış üzrə Dövlət Xidmətinin Xaçmaz şöbəsinin nümayəndəsi Rəqib Eyvazov və digər müəssisələrin nümayəndələri iştirak edirdilər. Tədbirdə şanlı hərb tariximizə qızıl hərflərlə yazılmış Aprel döyüşlərinin Azərbaycan xalqının həmrəyliyini bir daha nümayiş etdirdiyi qeyd olunub. Bildirilib ki, Aprel döyüşləri zamanı siyasi mövqeyindən, sosial durumundan, maddi vəziyyətindən, əqidəsindən asılı olmayaraq hər kəs öz vətəndaşlıq mövqeyini göstərmişdir. Aprel döyüşləri Azərbaycan gənclərinin yeni ruhunu ortaya qoymuşdur.
Tədbirdə Xaçmaz Regional Mədəniyyət İdarəsinin rəis müavini Elxan Məhərrəmov, Qarabağ Veteranları və Əlilləri İctimai cəmiyyətinin Xaçmaz Komitəsinin sədri Şövlət Dadaşzadə, Şəhid Elvin Mirzəyevin valideynləri, "Şahinlər" hərbi komandasının rəhbəri, Gödəkli kənd orta məktəbinin müəllimi Elnur Saidov və muzeyin direktoru Pakizə Mehdiyeva mövzu ilə bağlı çıxış etdilər.
Tədbir məktəblilərin səsləndirdiyi şeir və mahnılarla davam etdi. Zona yarışlarında birinci yerə layiq görülmüş "Şahinlər" komandasının hərbi təlimi və tədbirin bağlanışı olan hərbi paradı iştirakçıların böyük marağına səbəb oldu.
Tədbirdən sonra qonaqlarla birgə Xaçmaz rayonundan olan Şəhid Elvin Azadxan oğlu Mirzəyevin qəbri ziyarət olundu.
