İsmayıllı Regional Mədəniyyət və Turizm İdarəsinin tabeliyində fəaliyyət göstərən müəssisələrdə Xalq şairi Mirvarid Dilbazinin anadan olmasının 105 illiyinə həsr olunmuş tədbirlər keçirilib.
Şairin anadan olmasının 105 illiyi münasibəti ilə Ağsu rayon Mərkəzi kitabxanasında mütaliə günü təşkil olunub. Mərkəzi kitabxananın əməkdaşları Mirvarid Dilbazinin zəngin poeziya dünyası haqqında oxuculara məlumat veriblər.
Çıxışlarda bildirilib ki, Mirvarid Dilbazi 1912-ci il avqustun 19-da Qazax rayonunda dünyaya gəlib. Onun “Qadınların hürriyyəti” adlı ilk şeiri 1927-ci ildə nəşr olunub. Şairənin müxtəlif illərdə çapdan çıxan “Bizim səsimiz”, “Vətən eşqi”, “Sənətkarın xəyalı”, “Xatirələr olan yerdə”, “Həyat lövhələri” və başqa kitablarında xalqımızın tarixi və müqəddəs dəyərləri, xalqa bağlılıq duyğuları böyük məhəbbətlə tərənnüm edilir. Vurğulanıb ki, Mirvarid Dilbazinin əsərləri bu gün də sevilə-sevilə oxunur.
Daha sonra oxucular Mirvarid Dilbazinin kitabları, eyni zamanda, kitabxananın fonduna yeni daxil edilmiş kitablarla tanış olublar.
Qobustan rayon Mərkəzi kitabxanasında da Mirvarid Dilbazinin anadan olmasının 105 illiyi münasibəti ilə tədbir keçirilib. Şairin həyat və yaradıcılığı haqqında oxuculara geniş məlumat verilib. Həmçinin tədbir iştirakçıları Mirvarid Dilbazinin anadan olmasının 105 illiyinə həsr olunmuş sərgi ilə tanış olublar.