“Xəzər” Universitetində Üzeyir Hacıbəyli IX Beynəlxalq Musiqi Festivalı çərçivəsində “Üzeyir Hacıbəyli alim, musiqişünas, ictimai xadim” mövzusunda konsert-konfrans keçirilib
20 sentyabr saat 15:00-da “Xəzər” Universitetində Üzeyir Hacıbəyli IX Beynəlxalq Musiqi Festivalı çərçivəsində “Üzeyir Hacıbəyli alim, musiqişünas, ictimai xadim” mövzusunda konsert-konfrans keçirildi.
Tədbirdə “Xəzər” Universitetinin Kamera Orkestri (dirijor Cavad Tağızadə) və Rəqs ansamblı (bədii rəhbər Zülfiyyə Sadıqova), “Xəzər” Universitetinin təsisçisi, professor Hamlet İsaxanlı, Xalq artisti, tarzən, professor Ramiz Quliyev, Azərbaycan Bəstəkarlar İttifaqının katibi, Əməkdar incəsənət xadimi, professor Zemfira Qafarova, Ü.Hacıbəyli Ev muzeyinin direktoru, Azərbaycan Bəstəkarlar İttifaqının katibi, Əməkdar incəsənət xadimi, professor Sərdar Fərəcov, Əməkdar incəsənət xadimi, professor Zümrüd Dadaşzadə, Bakı Musiqi Akademiyasının musiqişünaslıq fakültəsi üzrə magistr tələbələri Aysel Mirzəsoy, Fəriqə Məmmədzadə, Məkkə Rəsulzadə, Azərbaycan Dövlət Akademik Opera və Balet Teatrının solisti Taleh Yahyayev və Dövlət Xor Kapellasının solisti Məhsəti Cabbarova iştirak etdilər.
Tədbir Üzeyir Hacıbəyliyə həsr olunmuş sənədli filmin nümayişi ilə başladı. Dahi bəstəkarın arxiv videoçarxları tamaşaçılara təqdim olundu.
Konfransda Üzeyir Hacıbəyli dühasının Azərbaycan musiqi xəzinəsinə verdiyi töhfələrdən söz açıldı. Eyni zamanda tədbirdə Üzeyir Hacıbəyli IX Beynəlxalq Musiqi Festivalı, Azərbaycan bəstəkarları Müslüm Maqomayev, Aqşin Əlizadənin yaradıcılığı müzakirə olunaraq, gənc musiqişünaslara gələcək fəaliyyətləri üzrə yeni istiqamətlər verildi.
Musiqili proqramda “Xəzər” Universitetinin kamera orkestri və Rəqs ansamblı maraqlı musiqi və rəqs nümunələri ilə çıxış etdilər.