Xoreqrafiya Akademiyasının təşkilatçılığı ilə ümummilli lider Heydər Əliyevin anadan olmasının 96 illiyinə həsr olunmuş tədbir keçirilib
Azərbaycan Dövlət Akademik Musiqili Teatrında Bakı Xoreoqrafiya Akademiyasının kolleci ulu öndər Heydər Əliyevin anadan olmasının 96-cı ildönümünə həsr olunmuş konsert proqramı ilə çıxış edib.
Tədbirdə mədəniyyət və ictimai xadimlər, xarici ölkələrin diplomatik nümayəndələri, mətbuat nümayəndələri və akademiyanın professor-müəllim heyəti iştirak edib.
Konsertin əvvəlində ümummilli lider Heydər Əliyevin mədəniyyətə, incəsənətə, xüsusilə də xoreoqrafiya sənətinə, balet və milli rəqs sahəsində çalışan sənət adamlarına diqqət və qayğısından danışılıb və keçirilən konsertin Heydər Əliyev şəxsiyyətinə, onun ölçüyəgəlməz xidmətlərinə olan hörmət və ehtiramın mücəssəməsi olduğu qeyd edilib.
Konsertdə Əməkdar artist Sənan Hüseynlinin quruluş verdiyi “Qazağı” xalq rəqsi, Əməkdar artist Tamilla Məmmədovanın quruluş verdiyi Qara Qarayevin “Yeddi gözəl” baletindən “Şərq” rəqsi, Xalq artisti Yusif Qasımovun quruluş verdiyi Üzeyir Hacıbəylinin “Koroğlu” operasından rəqs, Xalq artisti Kamilla Hüseynovanın quruluş verdiyi Şarl Qunonun “Faust” operasından variasiya, Əməkdar müəllim Pullumb Aqallıyayın V. A. Motsartın musiqisinə quruluş verdiyi “Divertisment”, Əməkdar artist Eteri Cəfərovanın quruluş verdiyi “Tənhalığın tanqosu” müasir rəqs, Elza İbrahimovanın “Gecələr bulaq başı” mahnısı əsasında Əməkdar artist Səbinə Qasımovanın quruluş verdiyi rəqs, Xalq artisti “Şöhrət” ordeni kavaleri Roza Cəlilovanın quruluş verdiyi Emin Sabitoğlunun “Ağ çiçəyim” rəqsi, Əməkdar mədəniyyət işçisi Sergey Boqdanovun quruluş verdiyi Əfrasiyab Bədəlbəylinin “Qız qalası” baletindən Poladın variasiyasından rəqs parçası, eləcə də müəllim-xoreoqraflar Cəmilə Musayevanın, Yelena Çernousovanın, baş müəllim Mehriban Nəzərovanın quruluşunda bir sıra rəqs parçaları akademiyanın tələbələri tərəfindən ifa olunub.
Konsert böyük maraqla və alqışlarla qarşılanıb.