Zaqatala və Balakəndə Şəki şəhər uşaq musiqi məktəbinin şagirdlərinin konserti keçirilib
Şəki şəhər 2 nömrəli Uşaq Musiqi Məktəbinin kollektivi Zaqatalada və Balakəndə musiqi proqramı ilə çıxış ediblər. Tədris ili ərzində qazanılmış bilgilərini sərgiləyən şagirdlərin ifalarında yerli və xarici ölkə bəstəkarlarının əsərləri, muğam dəstgahları və vokal nümunələr səsləndirilib.
Bu kimi tədbirlərin təşkil olunması musiqi kollektivlərinin bir-birilərini daha yaxından tanımasına, təcrübə mübadiləsinə və qarşılıqlı əlaqələrin daha da möhkəmləndirilməsinə şərait yaradır.
Bu sözləri Zaqatala şəhər Uşaq İncəsənət Məktəbinin direktoru Fərhad Acırqayev və Balakən Uşaq İncəsənət Məktəbinin direktoru Arifə Tagıyeva tədbirlə bağlı öz fikirlərini bölüşərkən deyiblər. Həmçinin, məktəb şagirdlərinin ifaları tədbir iştirakçıları tərəfindən alqışlarla qarşılanıb.
Şəki şəhər 2 nömrəli Uşaq Musiqi Məktəbinin direktoru Tərlan Məmmədov konsertin keçirilməsinə şərait yaratdıqları üçün Zaqatala və Balakən məktəblərinin rəhbərliyinə öz təşəkkürünü bildirmişdir.