Mahnı, musiqi qədər, incəsənət, mədəniyyət qədər insanları bir-birinə heç nə bağlamır. İncəsənətin, mədəniyyətin, xüsusən də, mahnının, musiqinin oynadığı rolu heç bir vasitə oynaya bilməz.

HEYDƏR ƏLİYEV
30.11.2021 14:25
Aşıq Ələsgərin abidəsinin ucaldılması haqqında Azərbaycan Respublikası Prezidentinin SərəncamıAzərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Azərbaycan aşıq yaradıcılığının görkəmli nümayəndəsi, böyük el sənətkarı Aşıq Ələsgərin xatirəsinin əbədiləşdirilməsi məqsədilə qərara alıram: 1. Bakı şəhərində ustad sənətkar Aşıq Ələsgərin abidəsi ucaldılsın. 2. Bakı Şəhər İcra Hakimiyyəti Azərbaycan Respublikasının Mədəniyyət Nazirliyi ilə birlikdə Aşıq Ələsgərin abidəsinin ucaldılması ilə bağlı tədbirlərin həyata keçirilməsini təmin etsin. 3. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.   İlham Əliyev Azərbaycan Respublikasının Prezidenti Bakı şəhəri, 30 noyabr 2021-ci il  ..
29.11.2021 19:18
“TAMMETRAJLI BƏDİİ FİLM LAYİHƏLƏRİNƏ DƏSTƏK – 2022” müsabiqəsi elan olunurAzərbaycan Respublikasının Mədəniyyət Nazirliyi (bundan sonra Nazirlik) milli kinematoqrafiya sahəsində fəaliyyət göstərən yaradıcı şəxslərə dəstək olmaq, bu istiqamətdə çalışan müstəqil prodüser mərkəzlərinin və istehsal şirkətlərinin fəaliyyətini stimullaşdırmaq, milli-mənəvi və ümumbəşəri dəyərləri filmlərlə təbliğ etmək, kino peşəkarlarının təcrübələrini daha da artırmaq məqsədilə “Tammetrajlı bədii film layihələrinə dəstək 2022” müsabiqəsini elan edir. Müsabiqənin reqlamenti ilə bu linkdən əldə etmək mümkündür: http://mct.gov.az/az/bfdestek2022 ..
29.11.2021 18:08
Bakıda “Müxtəlif dinlərin maddi-mənəvi irsi və dinlərdə musiqi” adlı konfrans keçirilibNoyabrın 29-da Mədəniyyət Nazirliyinin Mədəniyyət üzrə elmi-metodiki və ixtisasartırma mərkəzinin təşkilatçılığı ilə Bakıdakı Müqəddəs Məryəm Katolik Kilsəsində “Müxtəlif dinlərin maddi-mənəvi irsi (Qarabağ kontekstində) və dinlərdə musiqi” adlı konfrans keçirilib. Tədbirdə Azərbaycanda mövcud olan multikultural dəyərlər, konfessiyalararası sıx münasibət, ölkəmizdə qədim tarixə malik tolerantlıq, qarşılıqlı hörmət və anlaşma məsələləri müzakirə olunub. Mədəniyyət üzrə elmi-metodiki və ixtisasartırma mərkəzinin direktoru Səadət Xələfbəyli qonaqları salamlayaraq tədbirin əhəmiyyətini vurğulayıb. Bildirib ki, konfransın məqsədi konfessiyalararası əlaqələrin daha da möhkəmləndirilməsi və inkişaf etdirilməsinə töhfə verməkdir. Qeyd edib ki, konfrans müddətində işğaldan azad olunmuş maddi-mədəni irsimiz barədə çıxışlar dinləniləcək. Katolik Kilsəsinin Azərbaycandakı apostol prefekturasının keşişi Jozef Marek deyib: “Dünyada əgər hər şey yerində olsa qəlbimiz açılar. Ümid edirəm kilsədə səslənən dini musiqi də öz yerini tapır. İnsan arzuladığı bir yerə çatmaq istəyəndə Allah ona səbir və lazım olan xüsusiyyətləri bəxş edir. İnsanın bir şeyə can atması olduqca vacibdir. Musiqini ifa etmək gözəldir amma onu ifa edərkən Allahı axtarmaq fərqli bir məsələdir. Belə insanlar məni hər zaman heyran edib.” Konfransın aktual məsələyə həsr olunduğunu söyləyən Qafqaz Müsəlmanları İdarəsinin (QMİ) səlahiyyətli nümayəndəsi hacı Şahin Həsənli bildirib ki, Azərbaycan tarixində heç zaman dini zəmində münaqişə baş verməyib. Hətta Azərbaycanda müxtəlif xalqların dini icma nümayəndələri Qarabağ müharibəsi zamanı xristian dünyasına müraciət ünvanlayaraq bildiriblər ki, Qarabağ tarixən Azərbaycan ərazisidir. Bu sənət tarix olaraq qalacaq”. Bildirib ki, bəzi ölkə rəhbərləri multikulturalizmin mövcud olmaması ilə bağlı çıxışlar edirlər. Ancaq Azərbaycanda vəziyyət tam fərqlidir. Azərbaycanda dinə sevgi və tolerantlıq hər zaman hiss olunub. Burada radikal düşünən insanlar yoxdur. Musiqidə bir harmoniya olduğunu söyləyən hacı Şahin deyib: “Ruha sirayət edə bilən, insanda mərhəmət hissi aşılayan musiqiyə hər zaman ehtiyac var”. Katolik kilsəsinin apostol prefekturasının məlumat şöbəsinin katibi Toral Ağayev bildirib ki, Azərbaycanda mövcud olan dini icmaların rəhbərləri çıxışlarını böyük yaradan Allahın adı ilə başlayırlar. Hər bir yaradıcı insan öz qabiliyyətini Allahdan alır. Allah xristianlıqda nizamsızlığı nizama salan bir qüvvə kimi göstərilir: “İnsan şüuruna təsir edən ən böyük qüvvə məhz incəsənətdir. Musiqi xristianlıq dinində xüsusi önəm kəsb edir. Xristianlıqda oxuyan ikiqat ibadət etmiş kimi sayılır. Bəzi alimlərin fikrincə insan nitqi danışmaq üçün deyil oxumaq üçün yaradılıb. Davud peyğəmbərin nəğməkar peyğəmbər olduğunu deyən T.Ağayev bildirib ki, bu ad yunan musiqi aləti olan arfa adından götürülüb. O rəsmlərdə musiqi alətilə birgə təsvir olunur. “Qürurverici haldır ki, dini yaradıcılıq tək ənənələrə söykənmir, əksinə, inkişaf edir. Tolerant mühit katolik icması arasında yaradıcılığa şərait yaradır”,- deyə Toral Ağayev əlavə edib. Mənəvi Dəyərlərin Təbliği Fondunun icraçı direktorunun müavini Hətəm Gülməmmədov bildirib ki, Azərbaycan dünyada tolerantlığın yaşandığı nadir ölkələrdən biridir. Azərbaycanda tarixən müsəlman, yəhudi, xristian və digər dini icmalar dostluq və əmin-əmanlıq şəraitində yaşayıb. O, din nümayəndələrinin bir-birlərinə hörmətlə yanaşması ilə bağlı misallar gətirib. Bildirib ki, Ramazan ayında Çotari kilsəsində xristian din icma nümayəndələrinin müsəlmanlar üçün iftar süfrəsi açması bir ənənəyə çevrilib. Qeyd edib ki, Astarada fəaliyyət göstərən məscidlərdə sünni və şiə nümayəndələri məhərrəmlik ayında bir yerə toplaşıb namaz qılırlar. Tolerantlıq dünyada hüquqi məsələ olduğundan qanunla nizamlanır və bu qanunu pozan şəxslər cinayət məsuliyyətinə cəlb olunur. Ancaq Azərbaycanda bu məsələ mənəvi məsələdir. Tolerantlıq dözümlülük olsa da bizim üçün sevgi məsələsidir. Azərbaycanda tolerantlığın nümunələrindən biri də Bakının mərkəzində qorunan Erməni kilsəsidir. Bildirib ki, həmin kilsədə hətta heç bir kitaba ziyan dəyməyib. Bu Azərbaycan xalqının dözümlü olduğunu sübut edir. Bu gün Azərbaycanın işğaldan azad olunmuş torpaqlarında kilsə və məscidlər fəaliyyət göstərir, din nümayəndələrinin ora səfərləri təşkil olunur. Daha sonra Rus Pravoslav kilsəsinin Bakı və Azərbaycan Yeparxiyasının nümayəndəsi Dionisiy Sveçnikov, İslam Universitetinin İctimai elmlər kafedrasının müdiri Elvin Talişinski, müstəqil araşdırmaçı-jurnalist, səyyah Ağa Mehdiyev çıxış ediblər. Tədbirin bədii hissəsində ümumbəşər dini musiqilər səsləndirilib. ..
29.11.2021 16:38
Fransa mediasında Nizami Gəncəvi Beynəlxalq Forumu ilə bağlı yazılar dərc olunubFransanın “Musulmans en France” (musulmansenfrance.fr) xəbər portalında “Nizami Gəncəvi İli” çərçivəsində 24-26 noyabr tarixlərində Azərbaycan Respublikası Mədəniyyət Nazirliyinin təşkilatçılığı ilə dahi Azərbaycan mütəfəkkiri və şairi Nizami Gəncəvinin anadan olmasının 880 illiyinə həsr olunan “Nizami Gəncəvi: mədəniyyətlər arasında körpü” mövzusunda beynəlxalq forum ilə bağlı məqalələr yayımlanıb. Yazılarda Nizami Gəncəvi Beynəlxalq Forumu ilə bağlı geniş məlumat verilir. Diqqətə çatdırılır ki, Beynəlxalq Forumda 15 xarici ölkədən 40-dan çox alim, elm adamı və ekspertlər iştirak ediblər, Forum çərçivəsində müxtəlif panel müzakirələr, təqdimatlar, ikitərəfli görüşlər, kitab təqdimatı, mədəni və digər tədbirlərin təşkili həyata keçirilib. Materialda həmçinin dahi şairin yaradıcılığı və fəaliyyəti haqqında da ətraflı məlumat verilib. ..
29.11.2021 13:10
“Sonuncu” filmi daha iki mükafat qazanıbMədəniyyət Nazirliyinin dəstəyi ilə Bakı Media Mərkəzi və “Salnaməfilm” Studiyası tərəfindən istehsal olunmuş “Sonuncu” sənədli filmi 20-26 noyabr tarixlərində keçirilən 27-ci “Listapad” Minsk Beynəlxalq Film Festivalının (Belarus) sənədli filmlər üzrə müsabiqə bölməsində “Приз за верность жанру” (“Janra sədaqət”) mükafatına layiq görülüb. “Sonuncu” filmi, həmçinin 23–28 noyabr tarixlərində Polşanın Lodz şəhərində keçirilən 31-ci Media Festivalı – “Man in Danger”də polyak sənədli kinosunun klassiki Kazimierz Karabasz adına “Patient Eye“ (“Səbirli göz”) mükafatını qazanıb. Filmin baş prodüseri Arzu Əliyeva, prodüserləri Orman Əliyev və Nazim Hüseynov, rejissoru Fariz Əhmədov, ssenari müəllifləri Esmira Əyyub və Fariz Əhmədovdur. Filmin təsvir rejissoru polşalı kinematoqrafçı Mateuş Çuxnovskidir. Film Xəzər dənizindəki (Bakıdan 150 km cənubda) Kürdili yarımadasının sonuncu sakini Vitali Pronindən bəhs edir. 1981-ci ildə dənizdə suyun səviyyəsinin qalxması nəticəsində vaxtilə həyat qaynayan Kürdili adaya çevrilərək yaşayış üçün əlverişsiz hala gəldi. Əhalinin əksəriyyəti adadan köçdü. Qazsız, işıqsız və demək olar ki, insansız qalan ada tənhalaşdı, təbiəti, heyvanları vəhşiləşdi, evləri dağıldı. Daha orada heç kim yaşamırdı... 68 yaşlı Vitalidən başqa… O, adayla nəfəs alır. Son nəfəsini də adada alır… Elə kamera qarşısında. “Sonuncu” filmi bu il premyerasını 50-ci Rotterdam Beynəlxalq Film Festivalında etdikdən sonra müxtəlif ölkələrdə film festivallarında iştirak edib. Bosniya-Herseqovinada keçirilən 15-ci “Jahorina Film Festivalı”nda “Ən yaxşı sənədli film” nominasiyası üzrə “Golden Maple” (“Qızıl ağcaqayın”), Polşada keçirilən “OFF CINEMA” 25-ci Beynəlxalq Sənədli Film Festivalında “Bronze Castle” (“Bürünc qəsr”), 5-ci “DokuBaku” Beynəlxalq Sənədli Film Festivalında “Ən yaxşı yerli sənədli film“ nominasiyaları üzrə mükafatlara layiq görülüb. Ekran əsəri Polşanın Torun şəhərində keçirilən 29-cu “EnergaCAMERIMAGE” Beynəlxalq Film Festivalının sənədli filmlər üzrə əsas müsabiqə bölməsində də iştirak edib. Qeyd edək ki, filmin rejissoru Fariz Əhmədov hazırda “Azərbaycanfilm” Kinostudiyasının direktorudur. Linklər: 27-ci “Listapad” – Minsk Beynəlxalq Film Festivalı (Minsk, Belarus) http://listapad.org/news/4029/ 31-ci Media Festivalı “Man in Danger” (Lodz, Polşa) https://www.facebook.com/146013755438541/posts/4813540208685849/ Filmin treyleri: https://youtu.be/FN2WkhZwvkY Filmin “Facebook” səhifəsi: https://www.facebook.com/thelastonefilm2021/ Filmin “İnstagram” səhifəsi: https://www.instagram.com/thelastonefilm2021 ..
29.11.2021 11:58
Aşıq Ələsgər yaradıcılığının dərindən öyrənilməsi və mənimsənilməsi bütün türk dünyası üçün vacibdirAnkarada Azərbaycanın böyük el sənətkarı, saz və söz sərrafı Aşıq Ələsgərin 200 illik yubileyinə həsr olunmuş mərasim və “Aşıq Ələsgərin seçilmiş şeirləri” kitabının təqdimatı keçirilib. Beynəlxalq Türk Mədəniyyəti Təşkilatının (TÜRKSOY) Mərkəzi Qərargahında keçirilən tədbirin rəsmi hissəsində TÜRKSOY-un baş katibi Düsen Kaseinov, Azərbaycan Milli Məclisinin Mədəniyyət komitəsinin sədri Qənirə Paşayeva, Azərbaycanın Türkiyədəki səfirliyinin birinci katibi Elxan Zeynalov və Azərbaycan Mədəniyyət Nazirliyinin nümayəndəsi Nərmin İsmayılova çıxış ediblər. Çıxışlarda 2021-ci ildə Azərbaycan aşıq sənətinin görkəmli nümayəndəsi, qüdrətli söz ustadı Aşıq Ələsgərin anadan olmasının 200 illiyi tamam olması ilə bağlı Azərbaycan Prezidentinin müvafiq Sərəncamından irəli gələn vəzifələr çərçivəsində görülən işlər yüksək dəyərləndirilib. Aşıq Ələsgər yaradıcılığının əhəmiyyəti, söz və saz sənatkarının fəaliyyətinin araşdırılması, Azərbaycanda Ələsgər sənətinə və onun inkişafına göstərilən diqqət və qayğı, türk dünyasında daha geniş tanıdılmasının vacibliyi məsələlərinə toxunulub. Türk dünyasının görkəmli şəxsiyyətlərinin tanıdılması istiqamətində TÜRKSOY-un həyata keçirdiyi layihələrdən bəhs edən baş katib Düsen Kaseinov bildirib ki, rəhbərlik etdiyi təşkilat hər zaman Azərbaycanın tarixi şəxsiyyətlərinin və onların yaradıcılığının təbliğinə diqqətlə yanaşıb. Aşıq Ələsgər həm görkəmli el sənətkarı, həm də ürəkləri oxşayan yüksəkkeyfiyyətli şəxsiyyət və insan kimi təbliği, onun yaradıcılıq nümunələrinin müxtəlif dillərə tərcüməsi və nəşri olduqca vacib bir məsələdir. Çıxışında Azərbaycanın tarixi şəxsiyyətlərinin zəngin yaradıcılığının müqayisəli təhlilinə geniş yer ayıran Milli Məclisin komitə sədri Qənirə Paşayeva Müzəffər Ali Baş Komandan İlham Əliyevin rəhbərliyi ilə yenilməz Azərbaycan Ordusunun rəşadətli Qarabağ Qələbəsindən bəhs edərək vurğulayıb ki, xalqımız işğal altındakı ərazilərini düşməndən geri almaqla həm də böyük bir mədəniyyətlə mədəniyyətsizliyə qarşı tarixi Zəfər qazanıb. Türkiyədəki səfirliyimizin birinci katibi Elxan Zeynalov görkəmli simaların tanıdılması və təbliği, yaradıcı şəxslərin əsərlərinin nəşri və dünyada yayılmasının Azərbaycanda mühüm dövlət siyasəti olduğunu diqqətə çatdıraraq vurğulayıb ki, aşıq Ələsgər həm yüksək insani keyfiyyətləri, həm də nadir yaradıcılığı ilə hər zaman sevilib və böyük məhəbbətlə xatırlanıb. Mədəniyyət Nazirliyinin nümayəndəsi Nərmin İsmayılova görkəmli şəxsiyyətlərin tanıdılması, təbliği və əsərlərinin nəşri ilə bağlı Azərbaycanda görülən işlər, həyata keçirilən strateji mədəniyyət layihələri, o cümlədən mühüm nəşrlər barədə geniş məlumat verib. Rəsmi çıxışlardan sonra “Ulu Göyçə” sənədli filmi göstərilib. Sonra tədbir panel iclaslarla davam edib. “Dədə Ələsgər Ocağı” İctimai Birliyinin sədri, Aşıq Ələsgərin nəticəsi Xətai Ələsgərli, “Ozan dünyası-aşıq yaradıcılığının təbliği” İctimai Birliyinin sədri Musa Nəbioğlu, araşdırmaçı-yazıçı Songül Dündar, “Dünya söz akademiyası” dərnəyinin sədri, professor Hayrettin İvgin və tanınmış ədəbiyyatçısı və tərcüməçi Kənan Çarboğa ustad aşıq Ələsgər yaradıcılığının ayrı-ayrı istiqamətləri barədə çıxış ediblər. Diqqətə çatdırılıb ki, XIX əsrin sonu, XX əsrin əvvəllərində Azərbaycan aşıq ədəbiyyatında söz və saz sərrafı Aşıq Ələsgər möcüzəvi yaradıcılıq fəaliyyəti ilə ədəbi kəlamın yeni ömrü başlayıb. Dədə Ələsgər kimi xalq arasında sayılıb seçilən sənətkar “Haqq aşığı” adını qazanıb və hamı tərəfindən sevilib. Hələ uşaq yaşlarından fitri istedadı, iti yaddaşı, yüksək şəxsi keyfiyyətləri ilə hamının rəğbətini və məhəbbətini qazanan Ələsgər yorulmaz fəaliyyəti ilə saz dünyasının yeni sirlərini açmağa nail olub. O, müəllim və ustadlarının əməyini dərindən mənimsəməklə bərabər, onların adını həmişə ucada tutub. Çıxışlarda vurğulanıb ki, Aşıq Ələsgər yaradıcılığı təkcə Azərbaycanda deyil, bütün türk dünyasında el sənətkarları, eləcə də şifahi və yazılı xalq ədəbiyyatının tədqiqatçıları üçün hər zaman cəlbedici olub. Əminliklə qeyd olunub ki, türk dünyasının birliyi və sürətlə inteqrasiyası bütün sahələrdə olduğu kimi mədəni əlaqələrin inkşafında da dinamik yüksəlişin qorunmasına müstəsna təsir göstərəcəkdir ki, bu da aşıq sənətini tarixi ənənələrin və müasir vəziyyətinin təhlilinə və öyrənilməsinə təkan verəcəkdir. Qeyd olunub ki, Dədə Ələsgər yaradıcılığının bütün istiqamətlərinin dərindən öyrənilməsi, ustad el sənətkarın yaradıcılıq sirlərinin, onun təcrübə və irsinin müasir sənətçilər tərəfindən mənimsənilməsi bütün türk dünyası üçün vacib və əhəmiyyətlidir. Tədbir çərçivəsində görkəmli saz və söz ustası Aşıq Ələsgər yaradıcılığına həsr olunan musiqili bədii hissə təqdim olunub. Azərbaycanlı aşıq Ramin Qarayev və türkiyəli el sənətkarı aşıq Səlahəddin Dündar sazın və sözün qüdrəti ilə mərasimi daha da təravətləndiriblər. Tədbir Azərbaycanın Mədəniyyət Nazirliyi, Türkiyənin Mədəniyyət və Turizm Nazirliyi, Azərbaycanın Türkiyədəki səfirliyi, Milli Məclisin Mədəniyyət komitəsi, Azərbaycan Aşıqlar Birliyi və TÜRKSOY-u birgə təşkilatçılığı ilə keçirilib. Qeyd edək ki, “Aşıq Ələsgərin seçilmiş şeirləri” kitabı Türkiyənin tanınmış ədəbiyyatçısı Kənan Çarboğa tərəfindən tərcümə edilib. ..
26.11.2021 17:47
"Yaradanlar" filmi təqdim olunacaqRejissor Şamil Əliyevin “Yaradanlar” sənədli filmi ölkədə ilk dəfə nümayiş olunacaq. Azərbaycanın müasir memarlığının banilərindən olan Mikayıl Hüseynov və Sadıq Dadaşovun həyat və yaradıcılığından bəhs edən film Memarlar İttifaqının təşəbbüsü, Mədəniyyət Nazirliyinin sifarişi ilə 2020-ci ildə “Salnaməfilm” studiyasında istehsal olunub. Filmin ideya müəllifi Elbay Qasımzadə, ssenari müəllifi Natiq Rəsulzadə, təsvir rejissoru Rüfət Süleymanov, bəstəkarı Azər Hacıəsgərli, prodüseri Nazim Hüseynovdur. Film görkəmli memarlar Mikayıl Hüseynov və Sadıq Dadaşovun həyat və yaradıcılığı fonunda XX əsrdə kommunist ideologiyasının Azərbaycan mədəni irsinə, əxlaqına vurduğu amansız zərbənin araşdırılmasından bəhs edir. 1937-ci il repressiyasında onların qohumlarından olan ziyalıların əksəriyyəti məhv edildi. Mikayıl Hüseynov və Sadıq Dadaşov ömürlərinin bir hissəsini qorxu və mənəvi sıxıntılarla yaşamağa məcbur oldular. Filmdə o da diqqətə çatdırılır ki, ulu öndər Heydər Əliyev Azərbaycana rəhbərlik etdiyi dövrdə ziyalıları rejimin təqiblərindən qoruyaraq onların yaşayıb-yaratması üçün qayğısını əsirgəməyib. İl ərzində müxtəlif beynəlxalq festivallarda iştirak edərək mükafatalara layiq görülmüş filmin ölkədə ilk nümayişi 3 dekabr 2021-ci il tarixində Nizami Kino Mərkəzində baş tutacaq.   Filmin treyleri: https://www.youtube.com/watch?v=oy9rCabaRAM ..
26.11.2021 17:05
Nizami Gəncəvi Beynəlxalq Forumu başa çatdı24-26 noyabr tarixində Bakıda keçirilən Nizami Gəncəvi Beynəlxalq Forumu “Sovet dövründə Nizami tədqiqatları” mövzusu üzrə panel iclasla başa çatdı. Mədəniyyət Nazirliyinin təşkilatçılığı və Bakı Şəhər İcra Hakimiyyətinin dəstəyi ilə “Nizami Gəncəvi: mədəniyyətlər arasında körpü” mövzusunda gerçəkləşən beynəlxalq tədbir dahi Azərbaycan şairinin zəngin yaradıcılığı ilə bağlı maraqlı müzakirələrlə yadda qaldı. Azərbaycan İlahiyyat İnstitutunun rektoru Aqil Şirinovun moderatorluğu ilə noyabrın 26-da keçirilən son panel iclasda Tbilisi Dövlət Universitetinin əməkdaşı İrma Ratiani “Sovet və postsovet dövründə Nizami yaradıcılığı gürcü tədqiqatçılığında” adlı məruzəsini təqdim etdi. Məruzəçinin çıxışından əvvəl moderator mövzu ilə əlaqədar qeyd etdi ki, sovet dövründə Nizami irsi ilə bağlı çoxsaylı aparılan tədqiqatlar əsasən ideoloji meyarlara söykənirdi. Əksər hallarda Nizami düşüncələri ideoloji tərəfdən yanaşılaraq təqdim edilirdi. İrma Ratiani sovet dövründə Ş.Rustaveli və Nizami Gəncəvi irsinin geniş araşdırılması ilə bağlı gürcü alimlərinin məqalələrindən söz açdı. Bildirdi ki, qədim gürcü çoxcildli ədəbiyyatında yer alan əsərlərdə Nizami adına tez-tez rast gəlinir. Tədqiqatçılar bildirirlər ki, Rustavelinin təsvir etdiyi eşqlə müqayisədə Nizami bu mənada tamam başqa bir dünya yaradır və onun eşqi daha böyükdür. Mirzə Uluqbəy adına Özbəkistan Dövlət Universitetinin Özbək ədəbiyyatı kafedrasının müdiri Hamidulla Baltabayev “Nizami Gəncəvi “Xəmsə”sinin özbək ədəbiyyatşünaslığında öyrənilməsi” adlı məruzəsində qeyd etdi ki, Özbəkistan Nizaminin tədqiqi baxımından öndə olan ölkələrdəndir. Bildirildi ki, təsadüfi deyil ki, Nizami “Xəmsə“sinin ən qədim variantı Özbəkistan Əlyazmalar Fondundan əldə edilib. Nizami “Xəmsə“si Özbəkistanın da qiymətli ədəbi xəzinəsi sayılır. Yazıçı-dramaturq Kamil Yaşen yazır ki, böyük şairin vəfatından on illərlə sonra Orta Asiyanın monqollar tərəfindən işğal olunduğu dövrdə Xarəzmdə naməlum özbək müəllif “Müftah ül-ədl“ (“Ədalətin açarı”) adlı bədii əsər yaratmışdı. Bu əsərin əsasını Nizaminin “Şah və iki bayquş“ haqqında hekayəti təşkil edirdi. Özbəkistanda müxtəlif zamanlarda müxtəlif elmi mənbələrdə Nizami yaradıcılığı, onun ayrı-ayrı əsərləri haqqında elmi-tənqidi məqalələr, araşdırmalar nəşr olunub. 1940-cı illərdə Nizami və Nəvainin yubiley günləri çərçivəsində bu səpgidə xeyli elmi məqalələr işıq üzü görüb. Özbək ədəbiyyatının klassiki, azərbaycanlı şair, tərcüməçi, ədəbiyyatşünas, pedaqoq Maqsud Şeyxzadənin (1908-1967) yetirməsi olan filologiya elmləri doktoru, professor Natan Mallayevin “Nizami Gəncəvinin irsi və onun təlim-tərbiyəvi əhəmiyyəti“ adlı monoqrafiyası bu baxımdan xüsusi əhəmiyyət kəsb edir. Hazırda Özbəkistanın muzey fondlarında Nizami haqqında 30-a yaxın əlyazma saxlanılır. Bunlardan 12-si “Xəmsə”yə aiddir. Panelin son məruzəçisi, Özbəkistanın “Darakchi” nəşriyyat evinin direktoru Rustamjon Cabbarovun çıxışı xüsusilə maraqlı oldu. R.Cabbarov Azərbaycan dilində səlis çıxış edərək Nizami irsinə aydın baxışı ilə tədbir iştirakçılarının alqış və təqdirini qazandı. * * * Diskussiyalardan sonra forumun bağlanışı olduu. Mədəniyyət nazirinin birinci müavini Elnur Əliyev çıxış edərək üç gün davam edən foruma qatılan hər kəsə təşəkkürünü bildirdi: “Forumun adından da məlum olduğu kimi, Nizami Gəncəvi nəsillər arasında bir körpüdür. O səbəbdən forumun son günü gənclərin aktiv iştirakından çox şadıq. Nazirlik olaraq məqsədimiz mədəniyyəti sadəcə teatr, konsert kimi dar çərçivədə təbliğ etmək deyil, biz mədəniyyətin daha geniş anlamda tanıdılmasının əhəmiyyətli olduğunu qəbul edirik. Mədəniyyət həm də bəşəri dəyərdir. Nizami Gəncəvi də bizim mədəni dəyərimizdir. Nizami Gəncəvi Gəncədən doğan bir günəşdir. Səkkiz əsr keçməsinə baxmayaraq, Nizami öz hikmətləri ilə bu gün də böyük bir coğrafiyaya işıq saçır. Bütün dünya fəlsəfəsi bu günəşdən işıq alır və bu da bizim məsuliyyətimizi artırır. Biz xalq olaraq Nizaminin ideyalarını yaşatmalıyıq. Xalqımızın multikultural dünyagörüşünün formalaşmasında Nizaminin də rolu vardır”. Forumun əhəmiyyətini yüksək qiymətləndirən Elnur Əliyev bildirdi ki, beynəlxalq tədbir həm də Nizaminin bəşəri şair olduğunu bir daha sübuta yetirdi. Nazirin birinci müavini çıxışının sonunda forumda iştirak edən, dəyərli fikirlərini bölüşən qonaqlara təşəkkürünü bildirdi: “Gələcəkdə bir daha Nizami Gəncəvi çətiri altında görüşmək arzusu ilə sizlərə uğurlar arzulayıram”. Bununla da Nizami soraqlı daha bir tədbir tarixə qovuşdu. İnsanlıq var olduqca Nizami ideyaları da yaşayacaq, böyük söz ustadı bizim müasirimiz olaraq qalacaq. Çünki dahi Azərbaycan şairinin bəşəriyyəti sülhə, əmin-amanlığa, birliyə, bərabərliyə, inkişafa, yeniliyə səsləyən idealları hər zaman aktualdır, gərəklidir. ..
26.11.2021 15:59
I Gəncə Kitab Sərgisi keçirilir“Azərbaycan Nəşriyyatları” İctimai Birliyinin (ANİB) təşkilatçılığı, Azərbaycan Respublikası Mədəniyyət Nazirliyi və Gəncə Regional Mədəniyyət İdarəsinin dəstəyi ilə Gəncə Dövlət Filarmoniyasında I Gəncə Kitab Sərgisi keçirilir. “Nizami Gəncəvi İli”nə həsr olunan sərginin cari ilin noyabrın 26-da açılış mərasimi baş tutub. Açılış mərasimində çıxış edən Xalq şairi Sabir Rüstəmxanlı, Gəncə Şəhər İcra Hakimiyyətinin başçısı Niyazi Bayramov, ANİB-in sədri Şəmil Sadiq və Mədəniyyət Nazirliyinin əməkdaşı Kamran Musayev tədbir iştirakçılarını salamlayıblar. Ölkəmizin 30-dan artıq nəşriyyatı və 10-dan çox kitab evi 100 mindən çox kitabla sərgiyə qatılıblar. 28 noyabr tarixinədək davam edəcək sərgidə məşhur şair və yazıçıların təqdimatında imza mərasimləri, uşaqlar üçün nağıl saatları, müxtəlif sənət nümayəndələrinin əsərlərindən ibarət sərgilərin təşkili və bədii proqramların keçirilməsi nəzərdə tutulub. Eyni zamanda sərgidə qurulan “Qarabağa kitabla gedək” stendində işğaldan azad olunmuş ərazilərimizdə yaradılacaq kitabxanalar üçün nəşrlər toplanır. ..