Mahnı, musiqi qədər, incəsənət, mədəniyyət qədər insanları bir-birinə heç nə bağlamır. İncəsənətin, mədəniyyətin, xüsusən də, mahnının, musiqinin oynadığı rolu heç bir vasitə oynaya bilməz.

HEYDƏR ƏLİYEV
25.05.2022 17:05
“İlyas Əfəndiyev. Geriyə baxarkən” fotoalbomunun təqdimat mərasimi keçirildiMayın 25-də Azərbaycan Milli Kitabxanasında “İlyas Əfəndiyev. Geriyə baxarkən” fotoalbomunun təqdimat mərasimi keçirildi. Mədəniyyət Nazirliyi və Milli Kitabxananın birgə nəşri olan fotoalbom XX əsr Azərbaycan ədəbiyyatının görkəmli nümayəndəsi, Xalq yazıçısı İlyas Əfəndiyevə (1914-1996) həsr edilib. Tədbiri giriş sözü ilə açan Milli Kitabxananın direktoru, professor Kərim Tahirov nəşr haqqında məlumat verdi. Bildirdi ki, kitabda Azərbaycan ədəbiyyatının klassiki İlyas Əfəndiyevin ömür yolunun ən yaddaqalan anlarının fotoları, görkəmli mədəniyyət və incəsənət xadimlərinin, ədibin yaxın dostlarının sənətkar haqqında fikirləri, xatirələri, tanınmış şairlərin yazıçıya həsr etdiyi şeirlər, habelə  sənətkarın əsərlərinin tamaşalarından fotolar yer alıb: “Biz İlyas Əfəndiyevin “Geriyə baxma, qoca” və “Geriyə baxmağa dəyər” əsərlərinin adından ilhamlanaraq fotoalbomu “Geriyə baxarkən” adlandırmışıq”. Direktor qeyd etdi ki, ulu öndər Heydər Əliyev ədibin yaradıcılığını yüksək qiymətləndirib. Yazıçının yaradıcılığı ona görə həmişəyaşardır ki, bu əsərlərdə Azərbaycanın tarixi, mədəniyyəti, adət-ənənələri, milli-mənəvi dəyərlərimiz geniş şəkildə təsvir olunub. Müəllifin səhnələşdirilən əsərləri neçə-neçə aktyor, rejissor yetirib. Bu gün isə ədibin yolunu oğlu Xalq yazıçısı Elçin davam etdirir. Dövr, zaman dəyişsə də, İlyas Əfəndiyevin əsərləri daim oxunacaq və öz dəyərini qoruyub saxlayacaq. Tədbirdə çıxış edən mədəniyyət naziri Anar Kərimov bildirdi ki, bu gün ədəbiyyatımızın görkəmli nümayəndələrindən biri, Azərbaycan tarixi yaddaşının, milli məfkurəsinin inkişafında müstəsna xidmətləri olan İlyas Əfəndiyevin doğum günü ərəfəsində böyük sənətkarın həyat və yaradıcılığının maraqlı məqamlarının əks olunduğu fotoalbomun təqdimat mərasiminə toplaşmışıq. İlyas Əfəndiyev Azərbaycan ədəbiyyatı üçün çox önəmli irs qoyub gedib. O, sovet ideologiyası zamanı öz əsərlərində azərbaycançılıq və milli kimlik məsələlərinə işıq tutub. Gənclərimizin vətənpərvər ruhda yetişməsində onun əsərlərinin mühüm rolu var. İlyas Əfəndiyev yaradıcılığının ölkəmizlə yanaşı, xaricdə də tanındığını bildirən nazir dedi ki, Prezident İlham Əliyev İlyas Əfəndiyevin yaradıcılığına böyük dəyər verib. Ədibin 90 və 100 illik yubileylərinin qeyd olunması ilə bağlı dövlət başçısı tərəfindən 2004 və 2014-cü illərdə sərəncamlar imzalanıb. Yazıçının 100 illiyi UNESCO səviyyəsində də geniş qeyd olunub. İlyas Əfəndiyevin yaradıcılığını yüksək qiymətləndirən ulu öndər Heydər Əliyev ədibin Milli Dram Teatrında tamaşaya qoyulan pyeslərinin premyerasında iştirak edib. Təsadüfi deyil ki, uzun illərdir ki, Akademik Milli Dram Teatrı yeni mövsümünü məhz ədibin “Hökmdar və qızı” pyesi əsasında hazırlanan “Qarabağnamə” tamaşası ilə açır. AMEA-nın vitse-prezidenti, Milli Məclisin deputatı, akademik İsa Həbibbəyli qeyd etdi ki, İlyas Əfəndiyev sovet dövrü Azərbaycan ədəbiyyatının görkəmli nümayəndəsidir. Sovet dövründə əsas olan sosializm realizmi kimi ideyalar onun əsərlərinə yaddır. Sovet ədəbiyyatı nikbin notlar üzərində qurulsa da, İlyas Əfəndiyevin əsərlərində həm nikbin, həm də nisgilli notlar hiss olunur. Yazıçı zamanı qabaqlayan bir şəxsiyyət olub. Onun yaradıcılığında lirik-psixoloji yanaşma özünəməxsus yer tutur. Üzeyir Hacıbəyli adına Bakı Musiqi Akademiyasının rektoru, Xalq artisti Fərhad Bədəlbəyli görkəmli yazıçı ilə bağlı xatirələrini bölüşdü. Diqqətə çatdırdı ki, həmişə arzu edirdik ki, Azərbaycan teatrı müasir olsun. Biz həmin müasirliyə İlyas Əfəndiyevin əsərləri sayəsində çatdıq. Rəssamlar İttifaqının sədri, Xalq rəssamı Fərhad Xəlilov bildirdi ki, İlyas Əfəndiyevin Azərbaycan ədəbiyyatına, teatrına verdiyi töhfələr heç vaxt unudulmayacaq. Milli Məclisin deputatı, Xalq şairi Sabir Rüstəmxanlı fotoalbomu ədəbi həyatımıza töhfə kimi dəyərləndirdi. Bildirdi ki, İlyas Əfəndiyev həm ədəbiyyatda, həm də teatrda məktəb yaradıb. Zamanın tələbələrinə əyilməyərək öz dəsti-xətti ilə seçilib. Ədib Azərbaycan tarixini, qadın azadlığı kimi məsələləri ədəbiyyatımıza gətirərək əsərlərində qadın baş qəhrəmanlarına daha çox yer ayırıb. Tədbirdə daha sonra Azərbaycan Yazıçılar Birliyinin sədri, Xalq yazıçısı Anar, Xalq şairi Ramiz Rövşən, Xalq artistləri Mərahim Fərzəlibəyov, Bəsti Cəfərova, Milli Məclisin deputatları Vüqar İsgəndərov, Aqil Abbas, AMEA Əlyazmalar İnstitutunun direktoru, akademik Teymur Kərimli, Beynəlxalq Türk Mədəniyyəti və İrsi Fondunun prezidenti Günay Əfəndiyeva, professor Rüstəm Kamal və başqaları İlyas Əfəndiyevin çoxşaxəli yaradıcılığından danışdılar. Çıxışlardan sonra Milli Kitabxananın əməkdaşları tərəfindən hazırlanan “Bədii fikir tariximizin fenomeni – Xalq yazıçısı İlyas Əfəndiyev” adlı elektron məlumat bazası təqdim olundu. Məlumat verildi ki, məlumat bazası “Rəsmi sənədlər”, “Sənətkarın yaşamaq haqqı”, “Həyat və fəaliyyətinin əsas tarixləri”, “Görkəmli şəxslər İlyas Əfəndiyev haqqında”, “Müdrik deyimləri”, “Ədəbiyyat və mədəniyyət xadimləri haqqında fikirləri”, “Əsərləri”, “Haqqında”, “Mükafatları”, “Xatirəsinin əbədiləşdirilməsi”, “Filmoqrafiya”, “Fotoqalereya” və “Videoqalereya” bölmələrindən ibarətdir. AYB-nin sədri, Xalq yazıçısı Anar çıxış edərək bildirdi ki, birlik tərəfidən “İlyas Əfəndiyev mükafatı” təsis edilib. İlk mükafatın Qarabağdan daha çox yazan millət vəkili, Əməkdar jurnalist Aqil Abbasa verilməsi barədə qərar qəbul etmişik. Sonra “İlyas Əfəndiyev mükafatı” A.Abbasa təqdim edildi. Görkəmli dramaturqun ailəsi adından çıxış edən Xalq yazıçısı Elçin fotoalbomun nəşri və tədbirin təşkilatçılığına görə Mədəniyyət Nazirliyinə və Milli Kitabxanaya təşəkkürünü bildirdi. Sonda tədbir iştirakçıları “Xalq yazıçısı İlyas Əfəndiyev” adlı kitab sərgisi ilə tanış oldular. ..
25.05.2022 16:49
Mədəni gənclik bir gecəsini Paris Notr-Dama ithaf edibMədəniyyət Nazirliyinin “Mədəni gənclik” layihəsi çərçivəsində BDU tələbələrinin dünya və Azərbaycan klassikasının ən parlaq nümunələri ilə tanışlığı davam edir. Ötən həftə Akademik Milli Dram Teatrında dahi Mirzə Cəlilin “Ölülər” tragikomediyasının yeni səhnə təfsirinə tamaşa edən gənclər bu dəfə dünya mədəniyyətinin əvəzsiz inciləri ilə tanışlıq imkanı qazanıblar. Tələbələr may ayının 24-də Akademik Musiqili Teatrda “Paris Notr-Dama ithaf“ tamaşasına baxıblar. Dünya şöhrətli yazıçı Viktor Hüqonun “Paris Notr-Dam” əsərinin motivləri əsasında, rejissor Samir Qulamovun quruluşunda hazırlanmış tamaşa tələbələr tərəfindən maraqla qarşılanıb. Gənclər 2 saat ərzində incəsənət dünyasına qərq olmaq, XII-XIV əsrlərdə tikilmiş, bir çox tarixi hadisələrə şahidlik etmiş əsrarəngiz Notr-Dam kilsəsi, V.Hüqo qələminin möcüzəli toxunuşu ilə yaranmış əsərlə və bir-birindən gözəl musiqi nömrələri, parlaq aktyor ifaları ilə zəngin maraqlı tamaşayla tanış olmaq imkanı qazanıblar. Əsərin quruluşçu dirijoru və orkestrləşdirmənin müəllifi Əməkdar incəsənət xadimi Fəxrəddin Atayev, quruluşçu baletmeysterləri Əməkdar artistlər Zakir və Leyla Ağayevlər, xormeysteri Əməkdar artist Vaqif Məstanov, quruluşçu rəssamı Vüsal Rəhim, musiqi mətnlərinin müəllifi İlqar Fəhmidir. Tamaşadan sonra öz təəssüratlarını bölüşən tələbələr tamaşadan böyük zövq aldıqlarını, “Mədəni gənclik” layihəsi çərçivəsində qatıldıqları tədbirlərin onların dünyagörüşünün və mədəni zövqünün formalaşmasına böyük təsir göstərdiyini qeyd ediblər. Xatırladaq ki, gənclərin incəsənətə marağının artırılmasını əsas məqsəd kimi qarşıya qoyan layihə iyun ayının sonuna qədər davam edəcək. ..
25.05.2022 16:29
“Yeni adlar” layihəsinin növbəti konserti keçirildiMədəniyyət Nazirliyi tərəfindən bu ilin mart ayından həyata keçirilən “Yeni adlar” layihəsi davam edir. Layihə üzrə növbəti musiqi axşamı mayın 24-də M.Maqomayev adına Azərbaycan Dövlət Akademik Filarmoniyasında gerçəkləşdi. Gənc musiqiçilər – respublika və beynəlxalq müsabiqələr laureatları Tahir Əmrahov (tar) və Cahandar Xanlarovun (kamança) iştirakı ilə konsert proqramı təqdim olundu. Musiqiçiləri Azərbaycan Dövlət Xalq Çalğı Alətləri Orkestri (dirijor – Əməkdar artist İlahə Hüseynova) müşayiət edirdi. Musiqi axşamının tamaşaçıları arasında Mədəniyyət Nazirliyinin İncəsənət və qeyri-maddi mədəni irs şöbəsi Musiqi sektorunun müdiri Vüqar Hümbətov, mədəniyyət və incəsənət xadimləri vardı. Proqramda Tofiq Bakıxanovun tar və orkestr üçün 1 nömrəli konserti və Hacı Xanməmmədovun kamança və orkestr üçün konserti ifa olundu. Çıxışlar alqışlarla qarşılandı. *** “Yeni adlar”ın budəfəki iştirakçılarını yaxından tanıyaq. Tahir Əmrahov 1993-cü ildə Sabirabad rayonunda anadan olub. 2009-cu ildə Ş.Ələkbərova adına 20 nömrəli onbirillik musiqi məktəbini tar sinfi üzrə bitirərək həmin ildə Azərbaycan Milli Konservatoriyası (AMK) nəzdində Musiqi Kollecinə, 2006-cı ildə Azərbaycan Milli Konservatoriyasına qəbul olunub. T. Əmrahov 2005-ci ildə H.Xanməmmədov adına Vll Bakı uşaq musiqi müsabiqəsində ll yer, 2008-ci ildə ümummilli lider Heydər Əliyevin anadan olmasının 85 illik yubileyinə həsr olunmuş l Respublika müsabiqəsində ll yer, həmin ildə Xalq çalğı alətləri üzrə respublika müsabiqəsində l yer, 2010-cu ildə N. Əliverdibəyov adına Gənc ifaçılarının V ümumşəhər müsabiqəsində lll yerə layiq görülüb. 2011-ci ildə dövlət müstəqilliyinin bərpasının 20-ci ildönümünə həsr olunmuş Milli musiqi alətləri ifaçılarının Respublika festivalında l yerin qalibi, 2012-ci ildə görkəmli tarzən, Xalq artisti Ə. Bakıxanovun anadan olmasının 120 illik yubileyinə həsr olunmuş Musiqi Kolleci tələbələri arasında Tar ifaçılarının muğam müsabiqəsinin qalibi, 2012-ci ildə görkəmli bəstəkar, SSRİ Xalq artisti F.Əmirovun anadan olmasının 90 illik yubileyinə həsr olunmuş Orta ixtisas musiqi məktəbləri arasında gənc ifaçılarının Respublika müsabiqəsində l yerin qalibi olub, milli musiqi alətləri ifaçıları və xanəndələrin Bülbül adına müsabiqəsində lll yerə layiq görülüb. O, S.Ələsgərov Mədəniyyət Fondu tərəfindən mükafat və təqaüdə layiq görülüb, 2013-cü ildə ümummilli lider Heydər Əliyevin anadan olmasının 90 illik yubileyi münasibətilə Ali təhsil müəssisələri tələbləri arasında musiqi ifaçılarının müsabiqəsində l yer, 2019-cu ildə Qazaxıstanda keçirilən “Fiestalonia-Almaty” Beynəlxalq müsabiqəsində l yerin qalibi olub, həmin ildə dünya şöhrətli müğənni Sami Yusufla uğurlu konsert çıxışına görə Mədəniyyət Nazirliyi tərəfindən fəxri fərmanla təltif edilib. Cahandar Xanlarov 1997-ci ildə Bakı şəhərində anadan olub. 2014-cü ildə L.və M.Rostropoviçlər adına 21 nömrəli onbirillik musiqi məktəbini kamança sinfi üzrə bitirərək həmin ildə Azərbaycan Milli Konservatoriyasına daxili olub, 2016-cı ildən bakalavr təhsilini Azərbaycan Dövlət Mədəniyyət və İncəsənət Universitetində davam etdirib. 2018-ci ildə həmin universitetdə magistr təhsili almağa başlayıb, 2020-ci ildə təhsilini başa vurub. C.Xanlarov 2010-cu ildə Mədəniyyət Nazirliyinin təşəbbüsü ilə keçirilən ll Respublika müsabiqəsində l dərəcəli diploma layiq görülüb, 2010-cu ildə Mərakeşin Rabat şəhərində keçirilən Mədəniyyət və incəsənət festivalının qalibi olub. 2011-ci ildə müstəqilliyimizin bərpasının 20-ci il dönümünə həsr olunmuş festivalda l dərəcəli diplom, 2013-cü ildə milli musiqi alətləri ifaçıları və xanəndələrin Bülbül adına müsabiqəsində l dərəcəli diplomla təltif edilib, 2013-cü ildə ümummilli lider Heydər Əliyevin anadan olmasının 90 illik yubileyinə həsr olunmuş “Azərbaycan səninlədir – Sənsiz deyil” lll yaradıcılıq müsabiqəsinin qalibi olub. 2013-cü ildə C.Xanlarovun adı Azərbaycanın gənc istedadlarının “Qızıl kitabı”na yazılıb və Azərbaycan Respublikası Prezidentinin xüsusi aylıq təqaüdünə layiq görülüb. 2015-ci ildə Rusiya Federasiyasının Həştərxan şəhərində keçirilən “Qolosa Zolotoy stepi” adlı Beynəlxalq müsabiqəsində ll dərəcəli diplom, 2016-cı ildə İspaniyanın Lloret de Mar şəhərində keçirilən “Qran Flesta” Beynəlxalq incəsənət festivalı və müsabiqəsində ll dərəcəli diplomla təltif edilib, 2017-ci ildə Qəbələ Beynəlxalq Musiqi Festivalının iştirakçısı olub. ..
25.05.2022 15:35
Türkiyə ilə mədəni əməkdaşlıq məsələləri müzakirə olunubMayın 25-də mədəniyyət nazirinin birinci müavini Elnur Əliyev ölkəmizdə səfərdə olan Türkiyənin mədəniyyət və turizm nazirinin müavini Nadir Alpaslanla görüşüb. Qonağı salamlayan Elnur Əliyev Mədəniyyət Nazirliyi tərəfindən həyata keçirilən yeni layihələr haqqında məlumat verib. 44 günlük Vətən müharibəsi haqqında söz açan nazirin birinci müavini bildirib ki, şanlı Ordumuz 30 illik işğala son qoyaraq torpaqlarımızı işğaldan azad edib: “Bu gün azad olunmuş torpaqlara mədəniyyətin qaytarılması və bu qədim bölgəmizin mədəni irsinin təbliği istiqamətində ardıcıl iş aparılır. Vətən müharibəsində olduğu kimi, Qarabağın mədəni quruculuğunda da qardaş Türkiyəni yanımızda görmək istəyirik”. Türkiyə mədəniyyət və turizm nazirinin müavini Nadir Alpaslan səmimi qəbula görə Elnur Əliyevə təşəkkürünü bildirib. O, Türkiyə olaraq hər zaman Azərbaycana dəstək olduqlarını və bundan sonra da bu dəstəyin davam edəcəyini vurğulayıb. Bildirib ki, son 30 ildə iki ölkə arasında bütün sahələrdə uğurlu əməkdaşlıq əlaqələri qurulub. Mədəniyyətin müxtəlif sahələri üzrə əməkdaşlığın daha da genişləndirilməsi üçün daha böyük imkanlar var. Bunun üçün müvafiq mütəxəssislər arasında təcrübə mübadiləsi əhəmiyyətli olar. Azərbaycan rəqslərinin özünəməxsusluğu haqqında fikirlərini bölüşən Nadir Alpaslan bu sahədə əlaqələrin inkişaf etdirilməsi üçün yeni layihələr haqqında düşündüklərini diqqətə çatdırıb. Qeyd edib ki, Azərbaycanda hər rəqsin öz libası, öz elementləri var və xalq bu rəqsləri çox sevir, yüksək dəyərləndirir. Azərbaycanın qədim Şuşa şəhərinin 2023-cü ildə “Türk Dünyasının Mədəniyyət Paytaxtı” seçilməsini məmnunluqla qarşıladıqlarını bildirən Nadir Alpaslan bununla bağlı yeni konsepsiyanın hazırlanıb təqdim ediləcəyini vurğulayıb. O, iki ölkə arasında müştərək filmin hazırlandığını da bildirib. Nadir Alpaslan 30 illik işğal zamanı Ermənistan tərəfindən dağıdılmış tarix-mədəniyyət abidələrinin tanıdılması istiqamətində bundan sonra da dəstək göstərəcəklərini diqqətə çatdırıb.     Türkiyəli qonaq mədəniyyətin bir sıra sahələrində yeni layihələrinin hazırlanmasını düşündüklərini bildirən Nadir Alpaslan, bu sahədə müştərək layihələrin davam edəcəyini söyləyib. Ermənilərin Azərbaycan musiqi və rəqslərini öz adlarına çıxdıqlarını, beynəlxalq aləmdə bunun təbliğatını apardıqlarını diqqətə çatdıran Elnur Əliyev bu problemin qarşısının alınmasında təbliğatın mühüm rol oynadığını deyib. Qeyd edib ki, bəzən məlumatsızlıq səbəbindən hətta qardaş Türkiyədə belə musiqi və rəqslərimiz Qafqaz və ya “anonim” adı ilə təqdim olunur. Buna görə də iki ölkənin bu sahədə də daha yaxın əməkdaşlığına ehtiyac var. Daha sonra görüşdə qarşılıqlı maraq doğuran digər məsələlər ətrafında fikir mübadiləsi aparılıb. ..
25.05.2022 12:22
“Vətənin özü tarixin gözü ilə” layihəsinə start verilirAzərbaycan Respublikası Mədəniyyət Nazirliyi “Şuşa İli”nə töhfə olaraq “Vətənin özü tarixin gözü ilə” layihəsinə start verir. Layihə çərçivəsində mütəmadi olaraq Mədəniyyət nazirliyinin sosial media hesablarında yayımlanacaq fotoşəkillərdə Şuşanın tarixi və mədəni obyektlərinin işğaldan öncə, işğal dövrünə və hazırki vəziyyətinə dair fotolarının müqayisəli təsviri və həmin obyektlər haqqında maarifləndirici məlumatların verilməsi nəzərdə tutulur. ..
23.05.2022 17:58
“EU4Culture” qrant müsabiqəsi çərçivəsində I Regional Şəbəkə Konfransı baş tutubCari ilin 19-20 may tarixlərində Tbilisi şəhərində Azərbaycan Respublikasının Mədəniyyət Nazirliyinin və Şəki, Lənkəran və Xırdalan şəhərlərinin nümayəndələrinin, o cümlədən yerli ekspertlərin iştirakı ilə “EU4Culture” (“Avropa İttifaqı Mədəniyyət naminə”) qrant müsabiqəsi çərçivəsində I Regional Şəbəkə Konfransı baş tutmuşdur. Tədbirdə Avropa İttifaqının Qonşuluq Siyasəti və Genişləndirmə Danışıqları üzrə Baş Direktorluğu, Avropa İttifaqının və Almaniyanın Höte İnstitutunun Gürcüstandakı Nümayəndəlikəri, yerli ekspertlər, layihə komandası və tərəfdaşları (Höte İnstitutu, Danimarka Mədəniyyət İnstitutu, Çex Mərkəzləri və Gürcüstan Fransız İnstitutu), o cümlədən media nümayəndələri iştirak etmişdirlər. Tədbir çərçivəsində açılış nitqləri, qalib şəhərlərin təqdimatları, “EU4Culture” Regional Şəbəkə konsepsiyası, mümkün fəaliyyət istiqamətləri və maliyyələşmə imkanlarının müzakirəsi, Gürcüstanın mədəniyyət və yaradıcı sənayelər üzrə dövlət-özəl tərəfdaşlıq modelləri ilə bağlı çıxışlar baş tutmuşdur. Tərbirdə həmçinin Şərq Tərəfdaşlığı regionu üzrə fəal donor təşkilatların mədəniyyət sahəsi üzrə mümkün maliyyələşmə proqramlarının təqdimatı və hər ölkə üçün siyasət quruculuğu və tənzimləyici mexanizmlərə dair ayrıca təlim proqramı təşkil olunmuşdur. Qeyd edək ki, Avropa İttifaqı ilə əməkdaşlıq çərçivəsində “Şərq Tərəfdaşlığı Mədəniyyət Proqramı” artıq bir neçə ildir icra olunur. Sözügedən mədəni əməkdaşlığın növbəti mərhələsi kimi 2021-ci ilin iyun ayında Avropa İttifaqı tərəfindən Şərq Tərəfdaşlığı ölkələrinin qeyri-paytaxt şəhərləri üçün “EU4Culture” (“Avropa İttifaqı Mədəniyyət naminə”) qrant müsabiqəsi elan olunmuşdur. Müsabiqədə Azərbaycandan bir sıra şəhərlər iştirak etmiş, nəticədə Lənkəran, Xırdalan və Şəki şəhərləri bir neçə mərhələni keçərək qalib şəhər seçilmişlər. ..
23.05.2022 17:48
Akademik Milli Dram Teatrı “Mədəni gənclik” layihəsinə ev sahibliyi edibTeatrdan verilən məlumata görə, layihə çərçivəsində Cəlil Məmmədquluzadənin “Ölülər” əsəri əsasında Xalq artisti Azər Paşa Nemətovun quruluşunda hazırlanan eyniadlı tamaşa nümayiş olunub. Bakı Dövlət Universitetinin tələbələri dahi Mirzə Cəlilin qələmindən çıxan ölməz əsərin müasir səhnə interpretasiyası ilə tanış olub, tamaşadan sonra təəssüratlarını bölüşüblər.    Mədəniyyət Nazirliyinin sifarişi ilə hazırlanan səhnə əsərində görkəmli bəstəkar, Xalq artisti Qara Qarayevin “Ölülər” əsəri üçün bəstələdiyi musiqi yeni versiyada təqdim olunub. “Ölülər”in Şeyx Nəsrullahı Xalq artisti Nurəddin Mehdixanlı, Kefli İsgəndəri isə Əməkdar artist Anar Heybətovdur. Tamaşada digər rolları Xalq artistləri Laləzar Mustafayeva, Rafiq Əzimov, Hacı İsmayılov, Kazım Abdullayev, Sabir Məmmədov, Əli Nur, əməkdar artistlər Aslan Şirin, Elşən Rüstəmov, Elxan Quliyev, Məzahir Cəlilov, Kazım Həsənquliyev, Mirzə Ağabəyli, Mətləb Abdullayev, aktyorlar Elçin Əfəndi, Ramin Şıxəliyev, Vüsal Mustafayev, Canəli Canəliyev, Elnur Qədirov, Rüstəm Rüstəmov, Xədicə Novruzlu, Ləman İmanova, Rada Nəsibova və Firuzə Balayeva canlandırırlar. Əsərdəki mənəvi əsarət, fanatizm və cəhalət aktyorların ifasında özünəməxsus çalarlarla açılır. Yaradıcı heyət Cəlil Məmmədquluzadə düşüncələrini yüksək məharətlə ifa edərək, XX əsrin əvvəllərində Azərbaycanda baş verən prosesləri, mövhumat və cahilliyin poetik və dramatik lövhələrini dolğun təcəssüm etdirə bilirlər. Qeyd edək ki, Mədəniyyət Nazirliyi tərəfindən həyata keçirilən “Mədəni gənclik” layihəsinin məqsədi gənclərin incəsənətə marağının artırılması, onların ölkənin mədəni proseslərinə cəlb edilməsi, Azərbaycan gənci və mədəniyyətimiz arasında körpü salmaq, mədəni dəyərlərimizə sahib çıxacaq nəslin yetişdirilməsinə töhfə verməkdir. ..
23.05.2022 17:39
Nazir Anar Kərimov Özbəkistan Respublikasının Baş Nazirinin müavini ilə görüşübMədəniyyət naziri Anar Kərimov mayın 23-də Özbəkistan Respublikasının Baş Nazirinin müavini, turizm və idman naziri Aziz Abduxakimov ilə görüşüb.   Görüşdə iki ölkə arasında mədəniyyət sahəsi üzrə əməkdaşlığın mövcud vəziyyəti və perspektivlərinə dair fikir mübadiləsi aparılıb, birgə layihələrin həyata keçirilməsi imkanları müzakirə edilib. Nazir Anar Kərimov 2022-ci ildə hər iki ölkənin musiqi kollektivlərinin qarşılıqlı olaraq Azərbaycan və Özbəkistanda təşkil olunan festivallarda iştirakını xüsusi olaraq vurğulayıb. 12-14 may tarixlərində Şuşada keçirilən V “Xarıbülbül” Beynəlxalq Folklor Festivalında Özbəkistanın “Baxor” Dövlət Rəqs Ansamblının çıxışlarını yüksək qiymətləndirən Anar Kərimov yaradıcı kollektivin bu sənət bayramında fəal iştirakına görə təşəkkürünü bildirib.  Səmimi qəbula və xoş sözlərə görə nazirə minnətdarlıq edən Aziz Abduxakimov bildirib ki, iki ölkə arasında həm beynəlxalq təşkilatlar, həm də ikitərəfli əlaqələrin mövcudluğu birgə əməkdaşlığın daha da genişləndirilməsinə imkan verir. Aziz Abduxakimov Şuşa şəhərinin 2023-cü ildə “Türk Dünyasının Mədəniyyət Paytaxtı” elan edilməsi ilə əlaqədar həyata keçiriləcək tədbirlərdə Özbəkistanın birgə əməkdaşlığa hazır olduğunu bildirib. Görüş mədəniyyət və incəsənətin müxtəlif sahələrində əlaqələrin genişləndirilməsi, qarşılıqlı mədəniyyət günləri və təcrübə mübadiləsinin həyata keçirilməsi, eləcə də mədəni irsə dair bir sıra layihələrin təşkili məsələləri müzakirəsi ilə davam edib. ..
23.05.2022 12:19
“Şuşa mədəniyyətinin inciləri”: Mehmandarovların malikanə kompleksiMədəniyyət Nazirliyi tərəfindən “Şuşa İli” münasibətilə həyata keçirilən “Şuşa mədəniyyətinin inciləri” layihəsi yeni təqdimatlarla davam edir. Layihənin “Şuşanın memarlıq salnaməsi” bölməsi üzrə növbəti təqdimat qala-şəhərimizin Mehmandarovların malikanə kompleksinə həsr olunub. Şuşada yerləşən Mehmandarovların malikanə kompleksi Mehmandarovlar ailəsinə məxsusdur və Azərbaycanın tarix-memarlıq abidələrindən biridir. Azərbaycan xanlıqlarının, o cümlədən, Qarabağ xanlığının idaretmə sistemində bir çox mülki və hərbi vəzifələri yerinə yetirən Mehmandarov nəslinin nümayəndələri tərəfindən XVIII əsrin tarixi-memarlıq abidəsi sayılan Mehmandarovların malikanə kompleksi inşa olunub. Şuşa şəhərində yerləşən Mehmandarovların malikanə kompleksinə böyük yaşayış evi, kiçik yaşayış evi və məscid daxildir. Həmçinin daha sonralar məscidə gedən yolun üstündə bulaq tikilib. Mehmandarovların malikanə kompleksi ilk dəfə 1977-78-ci illərdə Azərbaycan SSR Mədəniyyət Nazirliyi tərəfindən pasportlaşdırılıb. Mehmandarovların böyük yaşayış binası sovet dönəmində Şuşa Şəhər Xəstəxanası kimi fəaliyyət göstərib. 19 may 1987-ci il tarixindən vaxtilə Mehmandarovlar ailəsinə məxsus olan yaşayış kompleksində Azərbaycan Xalçası və Xalq Tətbiqi Sənəti Dövlət Muzeyinin (indiki Azərbaycan Milli Xalça Muzeyi) Şuşa filialı fəaliyyətə başlayıb. 1992-ci ildə filialdakı daşınması mümkün olan eksponatlar təxliyyə olunaraq Bakıya gətirilib. Müharibə dövründə Mehmandarovların malikanə kompleksinə də ciddi ziyan dəyib, dağıntılar törədilib. Mülkdə olan əksər tikililər yerləyeksan edilib. Mehmandarovların kiçik yaşayış binası isə ermənilər tərəfindən Şuşa Tarix Muzeyi kimi fəaliyyət göstərirdi. Kompleks ərazisindəki məscid isə ermənilər tərəfindən mənimsənilmiş və Geologiya Muzeyinə çevrilmişdi. İşğaldan azad olunan ərazilərimizdə Azərbaycan dövləti tərəfindən həyata keçirilən nəhəng yenidənqurma işləri, o cümlədən Şuşada aparılan bərpa və quruculuq prosesi Şuşanın orijinal memarlıq üslubuna uyğun olaraq gerçəkləşdirilir. Həyata keçirilən işlər çərçivəsində Mehmandarovların malikanə kompleksi də bərpa edilir. ..