Mahnı, musiqi qədər, incəsənət, mədəniyyət qədər insanları bir-birinə heç nə bağlamır. İncəsənətin, mədəniyyətin, xüsusən də, mahnının, musiqinin oynadığı rolu heç bir vasitə oynaya bilməz.

HEYDƏR ƏLİYEV
10.12.2019 17:34
“Estrada sənəti” sinfinin inkişafı müzakirə olunubMusiqi məktəblərinin inkişafına Azərbaycanda reallaşan mədəniyyət siyasəti çərçivəsində xüsusi diqqət ayrılmaqdadır. Həmin məktəblərin tanıdılması və fəaliyyətinin yaxşılaşdırılması istiqamətində silsilə tədbirlər görünməkdədir. Mövcud istiqamətdə atılan növbəti addım estrada sinfinin inkişafı ilə bağlıdır. Dekabrın 10-da Q.Qarayev adına Mərkəzi İncəsənət Məktəbində tanınmış mütəxəssislərin iştirakı ilə ilk müzakirələr aparılıb. Müzakirədə məktəbin direktoru Əziz Qarayusifli, Azərbaycan Dövlət Mədəniyyət və İncəsənət Universitetinin “Estrada sənəti” kafedrasının müdiri, sənətşünaslıq üzrə fəlsəfə doktoru, professor, Əməkdar müəllim Məryəm Babayeva, Xalq artisti, Bakı Musiqi Akademiyasının “Vokal” kafedrasının professoru Natavan Şeyxova, Əməkdar İncəsənət Xadimi Rafiq Seyidzadə, Azərbaycan Milli Konservatoriyasının “Milli Vokal” kafedrasının baş müəllimi, caz festivalları laureatı Rövşən Rzayev və V.Mustafazadə adına 2 nömrəli Uşaq İncəsənət Məktəbinin direktoru, Əməkdar İncəsənət xadimi Akif Süleymanbəyli iştirak ediblər. Bədii təhsil şöbəsinin müdiri Sevil Ələkbərova tədbirin əhəmiyyətindən söz açıb. Təqdim olunmuş tədris planının layihəsi müzakirə və təhlil olunub, hər bir mütəxəssis ayrı-ayrılıqda yeni təkliflər irəli sürüb və tədris planına əlavələrin daxil edilməsi haqqında öz fikirlərini bildiriblər. Müzakirədə dəvət olunmuş mütəxəssislərlə yanaşı, məktəbdə Estrada ixtisası üzrə fəaliyyət göstərən gənc müəllimlər də iştirak edib. Sonda Mədəniyyət üzrə Elmi-Metodiki və İxtisasartırma Mərkəzinin direktoru, siyasi elmlər üzrə fəlsəfə doktoru Asif Usubəliyev qonaqlara təşəkkür edib, respublikada fəaliyyət göstərən uşaq musiqi və incəsənət məktəblərində “Estrada sənəti” sinfinin yaradılmasının müsbət rolundan, peşəkar mütəxəssislərlə birgə tədris proqramlarının yenilənməsi və bu ixtisasın inkişaf etdirilməsi üçün ustad dərslərin keçirilməsinə ehtiyac olduğunu vurğulayıb. ..
10.12.2019 17:09
Xalq artisti, kinorejissor Yalçın Əfəndiyev son mənzilə yola salındıDekabrın 10-da Təzə Pir məscidində tanınmış kinorejissor, Xalq artisti, professor Yalçın Əfəndiyevlə vida mərasimi keçirildi. Mərasimdən sonra mərhum II Fəxri xiyabanda torpağa tapşırıldı. Mərasimdə Mədəniyyət naziri Əbülfəs Qarayev, nazirliyin, “Azərbaycanfilm” kinostudiyasının əməkdaşları, mədəniyyət, incəsənət xadimləri iştirak edirdi. Yalçın Heydər oğlu Əfəndiyev 2019-cu il dekabrın 10-da ömrünün 82-ci ilində vəfat edib. 1937-ci il iyulun 24-də Bakıda anadan olan Yalçın Əfəndiyev 1960-cı ildə Bakı Dövlət Universitetinin Geologiya-coğrafiya fakültəsini, 1966-cı ildə Ümumittifaq Dövlət Kinematoqrafiya İnstitutunun (indiki Ümumrusiya Dövlət Kinematoqrafiya İnstitutu) Rejissorluq fakültəsini bitirib. 1966-cı ildən C.Cabbarlı adına “Azərbaycanfilm” kinostudiyasında çalışıb. Kinostudiyada sənədli filmlər birliyinin direktoru, 1991-1994-cü illərdə “Azərbaycantelefilm” Yaradıcılıq Birliyinin bədii rəhbəri işləyib. “Azərbaycanfilm” kinostudiyasında cizgi filmləri sexinin bərpasından sonra çəkilən ilk cizgi filmi Yalçın Əfəndiyevin adı ilə bağlıdır. Onun 1969-cu ildə çəkdiyi “Cırtdan” cizgi-applikasiya filmi ilə Azərbaycan kinosunda bu sahənin inkişafında yeni mərhələnin əsası qoyulub. Sənədli filmləri ilə Azərbaycan kinematoqrafiyasında xüsusi yer tutan Yalçın Əfəndiyev həmçinin “Xatirələr sahili” tammetrajlı bədii filminə quruluş verib. Azərbaycan Dövlət Mədəniyyət və İncəsənət Universitetində uzun illər dərs deyən professor Yalçın Əfəndiyev gənc kinematoqrafçılar nəslinin yetişməsində və peşəkar kadrların hazırlanmasında xüsusi xidmətlər göstərib. Allah rəhmət eləsin. ..
10.12.2019 16:47
Ümummilli liderin xatirəsi Milli Kitabxanada da anılacaqDekabrın 11-də Mədəniyyət Nazirliyi, YAP Səbail rayon Təşkilatı Milli Kitabxana ilə birgə ümummilli lider Heydər Əliyevin xatirəsinə həsr olunmuş anım tədbiri keçirəcək. Tədbir çərçivəsində həmçinin “Müstəqil Azərbaycanın memarı” mövzusunda geniş kitab sərgisi nümayiş olunacaq. ..
10.12.2019 16:32
"Mən ağacam" tamaşası növbəti dəfə "Yuğ"un səhnəsindəDekabrın 28-də Azərbaycan Dövlət “Yuğ” Teatrının repertuarında yeni tamaşalardan olan “Mən ağacam” növbəti dəfə nümayiş ediləcək. Dünya şöhrətli yazıçı Orxan Pamukun “Mənim adım qırmızı” romanının motivləri əsasında hazırlanan tamaşanın quruluşçu rejissoru Əbdülqəni Əliyev, quruluşçu rəssamı Umay Həsənovadır. Tamaşada Xalq artisti Məmmədsəfa Qasımov və aktrisa Təranə Ocaqverdiyeva çıxış edəcək. Əsərdə Osmanlı hökmdarı III Muradın hakimiyyəti dövründə İstanbulda baş verən hadisələr təsvir edilir. İstanbulda bahalıq və qorxunun yaşandığı bir dövrdə xəttat və naqqaşlar çay evlərində toplaşır, hekayələrə qulaq asır və əylənirlər. Əsərin özünəməxsusluğu ondadır ki, roman qəhrəmanlarının öz dilindən danışılır, belə ki, ölülər və cansız əşyalar belə kitabın hekayəsini öz dilləri ilə danışırlar. Rejissor Əbdülqəni Əliyev əsərin əsas mətləblərini saxlasa da, romana tamamilə fərqli baxım bucağından yanaşıb. Radio aparıcıları Orxan Pamukun “Mənim adım qırmızı” romanını təhlil edirlər. Kişi ittihamçı, Qadın müdafiəçi mövqeyindən çıxış edir. Romanın təhlili zamanı Kişi və Qadın öz aralarındakı münasibətdən tutmuş, siyasi, sosial, psixoloji, sakral məsələlərə toxunur, romandakı gizli mənaları açmağa çalışırlar. ..
10.12.2019 16:08
Milli Kitabxanada “Nəbi Xəzri – 95” adlı kitab sərgisi açılıbDekabrın 10-da Milli Kitabxanada XX əsr Azərbaycan ədəbiyyatının görkəmli nümayəndəsi, Azərbaycanın Xalq şairi, nasir, dramaturq, tərcüməçi Nəbi Xəzrinin andan olmasının 95 illiyi münasibətilə “Nəbi Xəzri – 95” adlı geniş kitab sərgisi açılıb. Təqdim olunan sərgidə şairin Azərbaycan və digər dillərdə nəşr olunmuş əsərləri, “Ön söz” yazdığı, redaktoru olduğu, tərtib və tərcümə etdiyi, haqqında yazılmış kitablar və dövri mətbuat materialları nümayiş olunur. Sərgi bir həftə davam edəcək. ..
10.12.2019 15:55
Sumqayıt Dövlət Dram Teatrı Yeni ilə hazırlaşır2019-cu il başa çatmaq üzrədir. Kiçikdən böyüyə hər kəs Yeni il ab-havasına köklənib. Bu il Sumqayıt üçün xüsusilə əlamətdar oldu. Şəhərin 70 illiyi çərçivəsində biri-birindən maraqlı, rəngarəng, yüksək məzmun və məna yükünə malik tədbirlər silsiləsi gerçəkləşdi. Nəhayət, dövlətimizin başçısı İlham Əliyev Sumqayıta gəldi, yeni mədəniyyət müəssisələrinin açılış mərasimində iştirak etdi. Şəhərin sosial-iqtisadi, mədəni inkişafına töhfə vermiş bir qrup şəxs mükafatlandırıldı.  “Sumqayıt Dövlət Dram Teatrının kollektivi məhz bu əzm və sevgi ilə fəaliyyətini davam etdirməkdədir”, deyən M.Həmidov dekabr ayının repertuarının yenə də zəngin olduğunu vurğulayıb. Ay ərzində Əli Əmirlinin “20 ildən sonra”, M.F.Axundzadənin “Müsyö Jordan və dərviş Məstəli şah”, “Hacı Qara”, Elçinin “Qatil” axşam tamaşaları oynanılacaq. Repertuarda, eyni zamanda, uşaq tamaşaları da yer alır. Bunlar Abdulla Şaiqin “Qaraca qız” və ərəb xalq nağılı əsasında səhnələşdirilən “Əlibaba və 40 quldur” tamaşalarıdır. Yaradıcı heyət məktəblilərin qış tətilini də yaddan çıxarmayıb. Odur ki, dekabrın 29-dan yanvarın 3-dək  “İlin şahı” adlı Yeni il tamaşası nümayiş olunacaq. ..
10.12.2019 14:06
Birinci Beynəlxalq Orqan musiqi festivalı başa çatıbÜzeyir Hacıbəyli adına Bakı Musiqi Akademiyasında (BMA) “Barokkodan müasir dövrə qədər” adlı I Beynəlxalq Orqan musiqi festivalının bağlanış konserti keçirilib. Konsertdə Cavad Tağızadənin dirijorluğu və “Baku Chamber orchestra”nın müşayiətilə Q.F.Hendelin və E.Bossinin əsərləri səsləndirilib. Festivalın bağlanış konserti tamaşaçıların gurultulu alqışları ilə başa çatıb. ..
10.12.2019 14:03
"Paris Notr-Dama ithaf" tamaşası növbəti dəfə nümayiş ediləcəkDekabrın 14-də Azərbaycan Dövlət Akademik Musiqili Teatrında böyük fransız yazıçısı, dramaturq Viktor Hüqonun “Paris Notr-Dam kilsəsi” romanının motivləri əsasında librettosu və quruluşu gənc rejissor Samir Qulamova məxsus olan “Paris Notr-Dama ithaf” tamaşası növbəti dəfə təqdim olunacaq. İdeya müəllifi və bədii rəhbəri Əməkdar incəsənət xadimi Əliqismət Lalayev olan bu tamaşa bəşəriyyətin ən nadir tarixi memarlıq incisi, Avropanın əzəmətli simvollarından biri Paris Notr-Dam kilsəsində 2019-cu ilin aprelin 15-də baş vermiş yanğın hadisəsinə ithaf olunub. Səhnə əsərinin süjet xəttinin mərkəzində fransız ədəbiyyatında tarixi roman janrının zirvəsi hesab olunan Viktor Hüqonun 1831-ci ildə qələmə aldığı “Paris Notr-Dam kilsəsi” romanının ölməz qəhrəmanları dayanır. Əsas qayəsində xeyirxahlıq, təmənnasız sevgi və mərhəmət hisslərinin təcəssümü əks olunan məşhur əsər indiyə qədər dünyanın bir çox adlı-sanlı teatr məkanlarında, müxtəlif rejissorların yozumlarında “Paris Notr-Dam kilsəsi” və ya “Notr-damlı Qozbel” adları ilə dəfələrlə səhnələşdirilib. Tamaşada “Notre-Dame de Paris” müziklına görə “Ginnesin rekordlar kitabı”na düşən Riçard Konçiantenin və dünya şöhrətli bəstəkarların - Rixard Ştraus, Tomaso Albinoni, Jorj Bize, Samuel Barberin əsərlərindən istifadə edilib. Qeyd edək ki, möhtəşəm əsərin quruluşçu dirijoru və orkestrləşdirmənin müəllifi Əməkdar incəsənət xadimi Fəxrəddin Atayev, quruluşçu baletmeysterləri Əməkdar artistlər – Zakir və Yelena Ağayevlər, xormeysteri, Əməkdar artist Vaqif Məstanov, quruluşçu rəssamı, gənc rəssam Vüsal Rəhim, musiqi mətnlərinin müəllifi Azərbaycan Yazıçılar Birliyinin katibi, şair İlqar Fəhmi, dirijoru Səməd Süleymanlı, konsertmeysteri Kamil Həsənov, rejissor assistentləri Sevinc Məmmədova və Əmrah Dadaşovdur. Səhnə əsərində rolları Xalq artisti Pərviz Məmmədrzayev, Əməkdar artistlər – Nadir Xasıyev, Səidə Şərifəliyeva, aktyorlar – Mehriban Zalıyeva, Aydan Həsənova, Əmrah Dadaşov, Nicat Əli, İbrahim Əlizadə, Emin Zeynallı, Hidayət Əliyev, Elxan İsmayılov, Hüseyn Əlili, Əliməmməd Novruzov, Səmədzadə Xasıyev, Şaban Cəfərov, Telnaz Hüseynova, Murad Əliyev, Fərid Rzayev, Eleanora Mehdiyeva, Zaur Əliyev, Əli Kərimov və başqaları ifa edəcəklər. ..
10.12.2019 11:48
Görkəmli kinorejissor, Azərbaycan Respublikasının Xalq artisti, Əməkdar incəsənət xadimi, professor Yalçın Heydər oğlu Əfəndiyev vəfat etmişdirAzərbaycan mədəniyyətinə ağır itki üz vermişdir. Görkəmli kinorejissor, Azərbaycan Respublikasının Xalq artisti, Əməkdar incəsənət xadimi, professor Yalçın Heydər oğlu Əfəndiyev 2019-cu il dekabrın 10-da ömrünün 82-ci ilində vəfat etmişdir. Yalçın Əfəndiyev 1937-ci il iyul ayının 24-də Bakı şəhərində anadan olmuşdur. Bakıdakı 6 nömrəli məktəbdə orta təhsil alan sənətkar 1960-cı ildə Azərbaycan Dövlət Universitetinin (indiki Bakı Dövlət Universiteti) Geologiya-coğrafiya fakültəsini, 1966-cı ildə isə Ümumittifaq Dövlət Kinematoqrafiya İnstitutunun (indiki Ümumrusiya Dövlət Kinematoqrafiya İnstitutu) Rejissorluq fakültəsini bitirmişdir. Əmək fəaliyyətinə 1960-cı ildə başlayan Y.Əfəndiyev 1966-cı ildən Cəfər Cabbarlı adına “Azərbaycanfilm” kinostudiyasında çalışmış, 1983-1986-cı illərdə kinostudiyada sənədli filmlər birliyinin direktoru, 1991-1994-cü illərdə “Azərbaycantelefilm” Yaradıcılıq Birliyinin bədii rəhbəri vəzifələrində işləmişdir. Azərbaycan Dövlət Mədəniyyət və İncəsənət Universitetində uzun illər dərs deyən professor Y.Əfəndiyev gənc kinematoqrafçılar nəslinin yetişməsində və yüksək ixtisaslı peşəkar kadrların hazırlanmasında xüsusi xidmətlər göstərmişdir. Azərbaycan kinorejissorluq məktəbinin görkəmli nümayəndəsi Yalçın Əfəndiyev milli kinematoqrafiyamızın inkişafında əhəmiyyətli rol oynamış sənətkarlardandır. Onun özünəməxsus yaradıcılığı Azərbaycanın zəngin kino sənəti salnaməsinin parlaq səhifələrindən birini təşkil edir. Dünya kino irsinin nailiyyətlərindən uğurla bəhrələnərək ayrı-ayrı illərdə yaratdığı qiymətli ekran əsərləri Y.Əfəndiyevə şöhrət qazandırmışdır.  Y.Əfəndiyevin Azərbaycan kinematoqrafiyasının qızıl fondunu təşkil edən filmləri öz kinematoqrafik zənginliyi, ifadə vasitələrinin rəngarəngliyi və məzmun dolğunluğu ilə tamaşaçıların zövqünün formalaşdırılmasına xidmət etmiş, milli kinematoqrafiyanın təqdirəlayiq nümunələri olaraq yüksək dəyərləndirilmişdir. Rejissorun Azərbaycan kinematoqrafiyasının inkişafı və təbliği sahəsindəki uzunmüddətli səmərəli fəaliyyəti yüksək qiymətləndirilmiş, o, Azərbaycan Respublikasının Xalq artisti, Əməkdar incəsənət xadimi fəxri adlarına layiq görülmüş, “Azərbaycan Komsomolu mükafatı” ilə təltif olunmuşdur. Görkəmli kinorejissor, gözəl pedaqoq və səmimi insan Yalçın Heydər oğlu Əfəndiyevin xatirəsi onu tanıyanların qəlbində daim yaşayacaqdır. Allah rəhmət eləsin! ..