Mahnı, musiqi qədər, incəsənət, mədəniyyət qədər insanları bir-birinə heç nə bağlamır. İncəsənətin, mədəniyyətin, xüsusən də, mahnının, musiqinin oynadığı rolu heç bir vasitə oynaya bilməz.

HEYDƏR ƏLİYEV
20.10.2018 13:13
Bakıda dünya şöhrətli keçə ustalarının master-klassları keçiriləcək 25-27 oktyabr 2018-ci il tarixində Mədəniyyət Nazirliyi və Azərbaycan Xalça Muzeyi tərəfindən Bakı şəhərində keçiriləcək “Keçə sənətində kəsişmə nöqtələri” mövzusunda III Beynəlxalq “Türk dünyasının ortaq dili – naxışlar” simpoziumu çərçivəsində dünya şöhrətli keçə ustalarının master-klassları təşkil ediləcək. Keçədən dəbli və gözəl aksessuarları öz əlləri ilə hazırlanma qaydasını öyrənmək istəyənlər aşağıda qeyd olunan master-klasslarda iştirak edə bilərlər. “Osmanlı” türk keçə texnikası üzrə ustad dərs Rəhbərlər: Mehmet və Teresa Girgiç Tarix: 25-26 oktyabr, saat 9:30  “Osmanlı” texnikası parça üzərinə (bir qayda olaraq ipək parça) keçə ornamentinin tətbiqindən ibarətdir. Bu üzəri mürəkkəb, fakturalı səthli məmulatlar yaratmağa imkan yaradır. Bu halda məmulatın rəngi bəzək elemeti olaraq vurğulanmır, yalnız “bərabər şərtlərlə“ fakturasını tamamlayır. Mehmet və Teresa Girgiç tərəfindən hazırlanan əsərlərin əsasında çox zaman Böyük İpək Yolunun ənənəvi tikmələrinə rast gəlinir. Ustad dərsində məhz onların yaradıcılığına xas olan bu növ əsərlər hazırlanacaq. *** “Kiyiz” keçə qırğız texnikası üzrə ustad dərs Rəhbərlər: Ayday Asanqulova və Nurcamal Asanqulova Tarix: 27 oktyabr, saat 10:00 Qonaqlara “BUKON” dizayn studiyasının keçə emalının üsulu nümayiş olunacaq. Rəssam-dizayner Ayday Asanqulovanın rəhbərlik etdiyi bu studiya gənc rəssam və tələbələri birləşdirir. Studiyanın vəzifələrindən biri, keçəçilərin beynəlxalq səviyyədə peşəkar və yaradıcı inkişafını təşviq etməkdir. Studiya ənənəvi qırğız texnikası olan “kiyiz”in ipək, yun və pambıq kimi materiallarla işlənərək yeni səviyyəyə yüksəlməsinə nail olub. Master-klass zamanı ipək üzərində keçədən şərf hazırlanacaq. *** Nano-keçə üzrə ustad dərs Rəhbər: Selçuk Gürışık Tarix: 27 oktyabr, saat 10:00 Selçuk Gürışık Böyük Britaniyanın, ABŞ və Türkiyədənin müxtəlif universitetlərində mühazirələr oxuyur, həmçinin, əsərlərində ənənəvi Anadolu keçəsinin tətqiqi nəzəriyyəsi və təcrübəsini birləşdirərək, dəbli aksessuarların tərtibatçısı və istehsalçısı kimi tanınır. Selçuk & Ali brendi altında o, və onun iş ortağı Ali Alev təbii xammaldan - yun, ipək və kəşmirdən istifadə edirək nano-keçə (parça üzərində keçə) istehsal edirlər. Master-klass zamanı Selçuk Gürışık keçə emal üsullarını paylaşacaq. Nəzərinizə çatdırırıq ki, hər bir ustad dərs üçün 8 nəfər nəzərdə tutulmuşdur. Qeydiyyat üçün Azərbaycan Xalça Muzeyinin rəsmi facebook səhifəsinə və ya aşağıda göstərilən əlaqə nömrəsinə müraciət edə bilərsiniz. (012) 497-20-57 ..
20.10.2018 12:44
Beynəlxalq Caz Festivalı çərçivəsində növbəti konsertOktyabrın 19-da “Rotunda Jazz Club”da Beynəlxalq Caz Festivalı çərçivəsində növbəti konsert reallaşıb. Gecədə Estoniyanı təmsil edən “Laura Poldvere Trio” qrupunun ifasında musiqilər səslənib. Qrupun üzvləri arasında həm Estoniya, həm də Azərbaycan musiqiçiləri yer alıb. “Laura Poldvere Trio” qrupunun çıxışı tamaşaçılar tərəfindən maraqla qarşılanıb. ..
20.10.2018 12:19
“Ana” pyesinin səhnə həyatı maraqla qarşılanıbOktyabrın 19-da Azərbaycan Dövlət Gənc Tamaşaçılar Teatrında böyük dramaturq Hüseyn Cavidin “Ana” pyesi əsasında hazırlanan eyniadlı səhnə əsəri tamaşaçılara təqdim olunub. Tamaşa ana rolunun ifaçısı, Əməkdar artist Nübar Novruzovanın 60 illik yubileyinə həsr edilib. Tamaşanın təqdimatından əvvəl aktrisanın həyat və yaradıcılığına həsr edilmiş videoçarx nümayiş olunub. Səhnə əsərinin quruluşçu rejissoru, Azərbaycan və Kalmıkiyanın Əməkdar incəsənət xadimi Bəhram Osmanov, quruluşçu rəssamı Telman Şıxıyev, musiqi tərtibatçısı Zaur Rəşidov, rejissor assistenti isə Sevda Hacışəmiyevadır. Teatrın istedadlı aktrisası, Əməkdar artist Nübar Novruzovanın benefis-tamaşası olan səhnə əsərində rolları Əməkdar artist Elnur Kərimov, aktyorlar İradə Rəşidova, Vahid Orucoğlu, Manaf Dadaşov, Ramiq Nəsirov, Elnur Şıxəliyev, Ramil Məmmədov, Simuzər Ağakişiyeva və Aydın Dəmirov ifa ediblər. Böyük dramaturq H.Cavidin “Ana” əsəri azərbaycanca yazılmış ilk mənzum dram sayılır. Şair-dramaturq həmin səhnə əsərini 1910-cu ildə tamamlayıb. Dramın qəhrəmanı Səlma ana obrazının timsalında mərdlik, mənəvi nəciblik, insani sədaqət duyğuları tərənnüm olunur. Humanist ideyaların carçısı olan ananın qəlbi sanki mərhəmətdən, insanpərvərlikdən yoğurulub. O, hətta oğlunun qatilini belə bağışlaya biləcək qədər geniş ürəyə malikdir. Pyesdə xeyirlə şər, qəddarlıqla mərhəmət üz-üzə qoyulub. ..
20.10.2018 12:00
Görkəmli opera müğənnisi Lütfiyar İmanovun xatirəsi anılıbOktyabrın 19-da M.Maqomayev adına Azərbaycan Dövlət Akademik Filarmoniyasında görkəmli opera müğənnisi, Xalq artisti Lütfiyar İmanovun anadan olmasının 90 illiyinə həsr edilmiş tədbir keçirilib. Respublikanın tanınmış mədəniyyət və incəsənət xadimlərinin iştirak etdiyi tədbir Mədəniyyət Nazirliyi və Filarmoniyanın birgə təşkilatçılığı ilə reallaşıb. Əməkdar incəsənət xadimi Zemfira Qafarova çıxış edərək unudulmaz sənətkarın həyat və yaradıcılığı haqqında məlumat verib, musiqi mədəniyyətimizin inkişafındakı xidmətlərindən danışıb. Bildirilib ki, müasir Azərbaycan mədəniyyətinin görkəmli nümayəndəsi Lütfiyar İmanov milli musiqinin inkişafında müstəsna xidmətləri olan sənətkarlarımızdandır. Onun klassik opera sənəti və xalq musiqisinin vəhdətindən bəhrələnən yüksək ifaçılıq məharəti Azərbaycan vokal sənəti tarixində yeni bir mərhələ təşkil edir. Sənətkarın adı opera səhnəmizdə aparıcı partiyaların mahir ifaçısı kimi həmişəlik həkk olunub. Vurğulanıb ki, ömrünün yarım əsrə yaxın bir dövrünü opera ifaçılığına həsr edən L.İmanov musiqi mədəniyyətimizdə daim öz dəst-xətti ilə seçilən bir mədəniyyət xadimi kimi tanınıb. Tanınmış sənətkarın yüksək səhnə mədəniyyəti, aktyorluq məharəti və güclü səsi ona geniş repertuarla çıxış etməyə imkan verib. Onun Azərbaycan və dünya klassiklərinin şah əsərlərində ifa etdiyi partiyalar, yaratdığı obrazlar öz dolğunluğu, kamilliyi və təbiiliyi ilə səciyyələnib. Sənət fəaliyyəti boyu təqdirəlayiq uğurlar əldə edən Lütfiyar İmanov milli və dünya klassik opera nümunələri ilə yanaşı, müxtəlif konsert proqramlarında kamera-vokal əsərləri, romansları və xalq mahnılarını zövq və ustalıqla ifa edib. İfaçısı olduğu əsərlərin üslub xüsusiyyətlərini dərindən duyma və onları özünəməxsus tərzdə məharətlə çatdırma qabiliyyəti Lütfiyar İmanova musiqisevərlərin rəğbət və məhəbbətini qazandırıb. O, milli musiqinin daha da zənginləşməsi naminə hədsiz sədaqətlə çalışaraq, dərin tarixi köklərə malik Azərbaycan ifaçılıq məktəbinin inkişafı yolunda istedad və bacarığını əsirgəməmişdir. Yaradıcılığının başlıca qayəsi xalq mənəviyyatına xidmətdən ibarət olan Lütfiyar İmanov ölkəmizin hüdudlarından xeyli uzaqlarda, dünyanın ayrı-ayrı guşələrində mötəbər konsert salonlarındakı çoxsaylı çıxışları ilə Azərbaycan mədəniyyətini daim layiqincə təmsil etmiş və ona şöhrət gətirib. Qeyd edilib ki, görkəmli müğənninin zəngin yaradıcılığı yeni sənətkarlar nəsli üçün əsl örnəkdir. O, uzun illər ərzində pedaqoji fəaliyyətlə məşğul olaraq, opera müğənnilərinin yetişdirilməsi işində diqqətəlayiq xidmətlər göstərmiş, ifaçılıq sənəti tarixində toplanmış zəngin təcrübənin gənc musiqiçilər nəslinə çatdırılması üçün böyük əmək sərf edib. Tədbir konsert proqramı ilə davam edib. ..
20.10.2018 11:40
Bakıda dünya şöhrətli nasir Çingiz Aytmatovun 90 illiyi qeyd olundu19 oktyabr 2018-ci il tarixində Səməd Vurğun adına Azərbaycan Dövlət Rus Dram Teatrında Beynəlxalq Türk Mədəniyyəti və İrsi Fondunun dəstəyi ilə Qırğızıstan SSR-in Xalq yazıçısı, Qazaxıstanın Xalq yazıçısı, Qırğız Respublikasının Qəhrəmanı, Qırğızıstan SSR Elmlər Akademiyasının akademiki, Sosialist Əməyi Qəhrəmanı, Lenin və SSRİ-nin üç Dövlət Mükafatı Laureatı Çingiz Aytmatovun “Cəmilə” povesti əsasında qırğız dilində tamaşa göstərilib. Tamaşadan əvvəl çıxış edən Beynəlxalq Türk Mədəniyyəti və İrsi Fondunun prezidenti Günay Əfəndiyeva premyeranın XX əsrin görkəmli söz ustası, türk dünyasının böyük oğlu Çingiz Aytmatovun 90 illiyinə həsr olunduğunu qeyd edib. O deyib ki, dahi yazıçının əsərləri vətənpərvərliklə yoğrulub, onlarda qırğız xalqının həyatı və istəklərindən bəhs olunub, Qırğızıstanın zəngin mədəniyyəti və adət-ənənələri öz əksini tapıb. Yazıçının əsərləri bütün dünyada maraqla oxunur. G.Əfəndiyeva yubiley tədbirinin keçirilməsinə göstərdikləri dəstəyə görə Azərbaycan Mədəniyyət Nazirliyinə, Yazıçılar İttifaqına, Qırğız Respublikasının ölkəmizdəki səfirliyinə və Türkdilli Dövlətlərin Parlament Assambleyasına (TürkPA) təşəkkürünü bildirib. Mədəniyyət naziri Əbülfəs Qarayev görkəmli yazıçının xatirə gecəsinin təşkilinə görə Beynəlxalq Türk Mədəniyyəti və İrsi Fonduna təşəkkür edərək vurğulayıb ki, bu cür tədbirlər qardaş türk xalqlarını daha da yaxınlaşdırır. “Çingiz Terekuloviç dahi nasir idi. Oxucuların pərəstiş etdiyi bu şəxsiyyət özündən sonra böyük irs qoyub, onun xatirəsi əbədi yaşayacaq. O, Azərbaycanı çox sevirdi, xalqımıza böyük sevgi hissləri bəsləyirdi, tez-tez ölkəmizə gəlirdi. Azərbaycan Mədəniyyət Nazirliyi də böyük yazıçının 90 illiyi münasibətilə dekabr ayında nəzərdə tutulmuş genişmiqyaslı tədbirlərə hazırlaşır. Qeyd etmək istəyirəm ki, mənim Çingiz Aytmatovla şəxsi tanışlığım olub, o, çox gözəl insan idi. Bu dahi yazıçı türk dünyasının fəxridir. Onunla vida mərasimində iştirakımı xatırlayıram. Bu, əvəzedilməz itkidir”, - deyə nazir əlavə edib. Xalq yazıçısı, Azərbaycan Yazıçılar Birliyinin sədri Anar Çingiz Aytmatovla bağlı xatirələrini bölüşərək deyib ki, dahi qələm ustası dünyaya çoxlu sayda məşhur əsərlər bəxş edib. Onun istedadı Allah vergisi idi. “Çingizin uşaqlıq və yeniyetməlik illəri ağır keçib, onun atası Stalin repressiyalarının qurbanı olub. Bu, yazıçının yaradıcılığına da təsirsiz ötüşməyib, onun mənəvi dəyərlərin ön planda olduğu bütün əsərləri oxucuda dərin təəssürat doğurur. Biz Çingiz Terekuloviçlə Bakıda, Bişkekdə, Ankarada və digər şəhərlərdə dəfələrlə görüşmüşük, onunla öz düşüncələrimi bölüşmüşəm və həmişə dəstək görmüşəm”, - deyə Anar bildirib. Çingiz Aytmatovun oğlu, qırğız diplomatı və dövlət xadimi Əskər Aytmatov atası haqqında xatirələrini bölüşüb, dahi yazıçının xatirəsini əziz tutduqları üçün tədbirin təşkilatçılarına və iştirakçılara təşəkkür edib. “Xatırlayıram, uşaqlıq illərimdə, 8 yaşım olanda atam məni özü ilə Bakıya ezamiyyətə apardı. Bu, mənim xarici ölkəyə ilk səfərim idi. Mən hələ o vaxt Bakını və Azərbaycanı sevdim və bu sevgini həyatım boyu yaşadıram. Bilirəm ki, sizin ölkənizdə atamın yaradıcılığının pərəstişkarı çoxdur. Bu, mənim üçün böyük şərəfdir. Əminəm ki, bugünkü tamaşa da böyük uğur qazanacaq, axı məhəbbət haqqında ballada olan “Cəmilə” povesti Çingiz Aytmatovun ən populyar əsərlərindən biridir. Bu gün bizimlə burada olan hər kəsə təşəkkürümü bildirirəm”, - deyə Ə.Aytmatov əlavə edib. Tamaşanın baş prodüseri “ASSOL” Holdinqin direktoru Assol Moldokmatova “Çingiz üçün ağı” şeirini söyləyib, vurğulayıb ki, Çingiz Aytmatov incə qəlbli insan kimi həmişə dostlarının köməyinə çatırdı, dinləməyi bacarırdı. “Cəmilə” əsərinə heç kim biganə qala bilməz. Bu, məhəbbət himni, qırğız qadının himnidir. Çox şadam ki, bu gün biz bakılı tamaşaçıları əsərlə daha yaxından tanış edəcəyik”, - deyə qonaq bildirib. Sonra Assol Moldokmatova və Günay Əfəndiyeva bir-birinə xatirə hədiyyələri təqdim ediblər. G.Əfəndiyeva qonağa Çingiz Aytmatovun əsərlərinin bütün dünyada təbliğinə görə Beynəlxalq Türk Mədəniyyəti və İrsi Fondunun təsis etdiyi fəxri diplomu təqdim edib. Fondun sədri Əskər Aytmatova türk dünyasının inkişafına verdiyi töhfəyə görə fəxri diplom təqdim edib və atasının portretini hədiyyə edib. Sonra tədbir iştirakçıları tamaşaya baxıblar. Baş rolları Aynura Akılbek qızı (Cəmilə), Ruslan Kurmanaliyev (Daniyar) və Sancar Sabırcan uulu (Seit) ifa ediblər. Qeyd edək ki, “Cəmilə” povestində hadisələr Böyük Vətən müharibəsi dövründə və qırğız aulunda cərəyan edir. Cəmilə bu əhvalatı nəql edən Seitin böyük qardaşının arvadıdır. Heç kimin incitməyə cəsarət etmədiyi bu qamətli, gözəl, tündxasiyyət və qoçaq qadın insanlarla açıq ünsiyyət qurmağı bacarır. Cəmilə varlı ailəyə gəlin gedir. Bütün kişilər müharibəyə getdiklərindən ailəyə qaynana başçılıq edir. Kişi əməyi çatışmadığından Cəmiləyə də ağır iş – stansiyaya taxıl daşımaq həvalə olunur. Onun köməkçiləri qaynı Seit və müharibədən əlil qayıtmış əsgər Daniyardır. Keçmiş əsgər əvvəlcə çox sakit və qapalı adam təsiri bağışlayır. Cəmilə tez-tez onu ələ salır, amma Daniyar buna dözür və qadına heyranlıqla baxır. Onların arasında səmimi hisslər yaranır və əsərin baş qəhrəmanı Daniyarla birlikdə yeni həyata başlamaq üçün aulu tərk edir. Kənd camaatı onun bu hərəkətini qınayır, Seit isə gəlinin seçiminə haqq qazandırır. O, əsl məhəbbətin nə olduğunu anlaya bilir. Premyera tamaşaçılarda dərin təəssürat yaradıb. Tədbirdə diplomatlar, mədəniyyət və incəsənət xadimləri iştirak ediblər. ..
19.10.2018 16:01
Tanınmış kinorejissor Oqtay Mirqasımovun 75 illik yubileyinə həsr olunmuş “KİNO HƏYATIN BIR ZƏRRƏSİDİR” adlı tədbir keçirilib.Oktyabrın 18-də Bakı Şəhər Mədəniyyət Baş İdarəsinin təşkilatçılığı ilə Yasamal rayon Heydər Əliyev Mərkəzində xalq artisti, tanınmış kinorejissor Oqtay Mirqasımovun 75 illik yubileyinə həsr olunmuş “Kino həyatın bir zərrəsidir” adlı tədbir keçirilib. Tədbiri giriş sözü ilə Yasamal rayon MKS-nin direktoru, tarix elmləri üzrə fəlsəfə doktoru Lətifə Məmmədova açaraq, qonaqları salamlayıb. O, kinorejissorun yaradıcılıq fəaliyyəti haqqında maraqlı faktlar söyləyib və qeyd edib ki, Oqtay Mirqasımovun yaradıcılığı Azərbaycanın kino tarixində xüsusi yer tutur. Tədbirdə Milli Məclisin deputatı  Aydın Mirzəzadə, əməkdar incəsənət xadimi Aydın Kazımzadə, Yasamal rayon İcra Hakimiyyətinin Humanitar şöbəsinin müdiri Zöhrab Cəfərov, “Dünya azərbaycanlılarının həmrəyliyinə dəstək” QHT-nın prezidenti Tofiq Əlizadə, “ELS - Müstəqil Araşdırmalar Mərkəzi” ictimai birliyinin rəhbəri İradə Yaqubova,  digər  ziyalılar və ictimaiyyət nümayəndələri iştirak ediblər. Oqtay Mirqasımovun filmlərinin əhəmiyyətindən danışan Milli Məclisin deputatı Aydın Mirzəzadə vurğulayıb ki, bu filmlərdə vətənpərvərlik mövzusu, cəsarət və mərdlik hissləri qabarıq şəkildə təqdim edilir. Qeyd edib ki, kinorejissor O.Mirqasımov vətənə, onun tarixinə, adət-ənənələrinə böyük məhəbbətlə yanaşır, istedadlı insanları öz əsərlərində əbədiləşdirir. Prezident təqaüdçüsü, görkəmli kino tənqidçisi Aydın Kazımzadə çıxışında rejissorun tərcümüyi-halına, keçdiyi həyat yoluna və şəcərəsinə nəzər salıb, O.Mirqasımov haqqında maraqlı faktlar söyləyib. Qeyd edib ki, Oqtay Mirqasımov bir neçə sənədli, bədii filmlərin quruluşçu rejissoru və ssenari müəllifidir, filmlərin çəkilişində musiqiyə böyük əhəmiyyət verir. Onun görkəmli incəsənət xadimləri Qara Qarayev və Rəşid Behbudov haqqında çəkdiyi filmlər öz orjinallığı ilə seçilir. Sonra Təbrizli həmyerlimiz Hədyə Zəhra Əhmədi dahi Füzulinin qəzəllərini və ustad Şəhriyarın şeirlərini səsləndirib.  Yubiley gecəsində kinorejissorun həyat və yaradıcılığına həsr edilmiş “Oktay Mir-Qasım–75” adlı virtual fotoalbom nümayiş olunub, onun “Это звуки истины”, “Ovsunçu”, “Qisas almadan ölmə”, “1001 qastrol”, “Günaydın, Mələyim”, «Чертик под лобовым стеклом» filmlərindən fraqmentlər göstərilib. Tədbir Azərbaycan Milli Konservatoriyasının tələbəsi, Beynəlxalq müsabiqələr laureatı İslam Qasımovun “1001 qastrol” sənədli filmindən Rəşid Behbudovun “Ey, Vətən” mahnısının canlı ifası ilə bitib.   ..
19.10.2018 15:47
18 oktyabr Milli qürur günüdürDövlət Müstəqilliyi günü ilə əlaqədar Balakən rayon Mədəniyyət Mərkəzində “Dönməz və əbədi müstəqilliyimiz” adlı ədəbi-bədii konsert proqramı təşkil edilmişdir   Azərbaycan xalqının tarixində 18 oktyabr Milli qürur günüdür. 27 il öncə məhz həmin Azərbaycan özünün Dövlət Müstəliyini bərpa etmişdir. Azərbaycanın dövlət müstəqilliyinin daimi olacağına inam tükənməzdir. 18 oktyabr tarixində Dövlət Müstəqilliyi günü ilə əlaqədar Balakən rayon Mədəniyyət Mərkəzində “Dönməz və əbədi müstəqilliyimiz” adlı ədəbi-bədii konsert proqramı təşkil edilmişdir. Rayon ictimaiyyəti əvvəlcə həmin gün münasibəti ilə Heydər Əliyev abidəsinə ziyarət etmiş, sonra Mədəniyyət Mərkəzinin foyesində təşkil olunmuş Azərbaycanın Müstəqillik illərinə həsr olunmuş sərgi və filmə baxış keçirmiş, mədəniyyət işçiləri tərəfindən hazırlanmış Azərbaycanın müstəqilliyini tərənnüm edən ədəbi-bədii kompozisiyaya tamaşa etmişlər. ..
19.10.2018 15:31
Beynəlxalq Muzeylər Şurasının komitə prezidenti:Xalça Muzeyi bütün standartlara cavab verirAzərbaycan Xalça Muzeyində Beynəlxalq Muzeylər Şurasının (ICOM) iki beynəlxalq komitəsinin – Dekorativ sənət, dizayn muzeyləri və kolleksiyaları (ICDAD) və Tarixi ev-muzeyləri üzrə beynəlxalq komitələrinin (DEMHIST) “Dekorativ sənət və interyer” adlı konfransına qatılan bir sıra xarici ölkələrin nümayəndələri ölkəmiz haqqında yüksək təəssüratlarını bölüşüblər. Beynəlxalq Muzeylər Şurasının Tarixi ev-muzeyləri beynəlxalq komitəsinin prezidenti Elza Rodrigez bildirib ki, Azərbaycana səfər etmədən öncə ölkəmiz haqqında internet vasitəsilə müəyyən bilgilər əldə edib. Bakıda olduqdan məmnunluğunu deyən qonaq Azərbaycan Xalça Muzeyinə heyranlığını gizlətməyib: “Xalça Muzeyi bütün standartlara cavab verir. Ümumiyyətlə, gördüyüm qədər bütün muzeylər kifayət qədər yaxşıdır”, - deyə o bildirib. Bakının, eyni zamanda, bir sıra digər mədəni və tarixi məkanlarına da səfər etdiyini bildirən Elza Rodrigez şəhərimizi bəyəndiyini deyib. “İçərişəhəri və onun müasir memarlıqla qarşılığını çox sevdim. Digər ölkələrdə belə bir fərqliliyi tapmaq çox çətindir. Bu, ruha çox yaxın, amma deyim ki, bir o qədər də fərqlidir”, - deyə qonaq qeyd edib. Azərbaycana ilk dəfə səfər edən Beynəlxalq Muzeylər Şurasının Dekorativ sənət, dizayn muzeyləri və kolleksiyaları beynəlxalq komitəsinin idarə heyətinin üzvü Kai Lobjakas deyib ki, Azərbaycan haqqında eşitmişdim və uşaqlıqdan buraya gəlmək arzusunda idim. Gözləyirdim ki, müəyyən bir yaşa çatdıqda valideynlərim məni buraya gətirəcəklər, amma bu, baş vermədi, buna görə bu, mənim Bakıya ilk səfərimdir. “Ancaq ölkənizi bir az xalça və qədim xalçaçılıq ənənələri, çayı, ənənələrinizin digər tərəfi kimi də tanıyırdım. Həm də keçmiş Prezidentinizin həyat yoldaşı akademik Zərifə Əliyeva vaxtilə Estoniyada təhsil alıb, o, həkim idi və Tallinn şəhərində akademik Zərifə Əliyeva adına Şərq Mədəniyyəti Xalq Universiteti var. Estoniyada səhnələşdirilən bir pyesi və orada rol almış Kəbirlinski soyadlı bir aktyoru da xatırlayıram, amma pyesin adı yadımda deyil. Bunlar Azərbaycanla bağlı ölkənizə gələnə qədər olan bildiklərim və xatirələrimdir”, - deyə o əlavə edib. Bakıda söhbətləşdiyi insanların öz ölkələri haqqında danışdıqlarından riqqətə gəldiyini deyən qonaq söyləyib: “Ölkənizin insanları çox gözəl ünsiyyət qururlar, sahib olduqları ilə qürur duyurlar. Bu hissi mən danışdığım hər bir insanda hiss etdim, mənə elə gəlir ki, güclü identikliyiniz var”. Kai Lobjakas Bakıda bir neçə ev-muzeylərində, o cümlədən Qara Qarayevin ev-muzeyində və Xalça Muzeyində xoş təəssüratlar əldə etdiyini diqqətə çatdırıb. “Qara Qarayevin ev-muzeyi məndə çox gözəl təəssürat yaratdı. Müasir ev-muzeyinin necə təqdim olunmasının canlı bir nümunəsinə çevrildi. Eyni fikirlər Xalça Muzeyinə də aiddir, hətta daha yüksək dərəcədə. Çünki muzey daha böyükdür, fikrimcə, hər iki muzey gözəldir. Onlar irəliləyişin istiqamətini göstərir, buna görə çox şanslısınız!”, - deyə qonaq vurğulayıb. Qeyd edək ki, oktyabrın 10-12-də keçirilən beynəlxalq konfransda Azərbaycan, Avstriya, İtaliya, Portuqaliya, Almaniya, Livan, Niderland, Yaponiya, ABŞ, Hindistan, Misir, Çexiya, Gürcüstan, Türkiyə olmaqla, 14 ölkədən 42 nümayəndə iştirak edib.   ..
19.10.2018 15:24
Türkiyədən ölkəmizə hədiyyə olunan kitabların təqdimatı keçirildiOktyabrın 19-da Azərbaycan Milli Kitabxanasında Türkiyə Mədəniyyət və Turizm Nazirliyi və İLESAM (Türkiyə Elm və Ədəbi Əsər sahibləri Birliyi) tərəfindən toplanaraq ölkəmizə gətirilən kitabların təqdimat mərasimi keçirildi. Tədbir Azərbaycan Mədəniyyət Nazirliyi, Yazıçılar Birliyi və Milli Kitabxananın birgə təşkilatçılığı ilə gerçəkləşdi. Tədbiri Milli Kitabxananın direktoru, professor Kərim Tahirov açaraq qonaqları salamladı və bu mötəbər aksiyaya görə təşkilatçılara öz dərin təşəkkürünü bildirdi.  Qeyd etdi ki, ölkəmizə gətirilən 15 min kitabın 2000 nüsxəsi Milli Kitabxanaya hədiyyə olunub. Bu nəşrlərdən Milli Kitabxananın oxucuları ilə yanaşı, ölkəmizin digər şəhər və rayon kitabxanalarının oxucuları da faydalanacaq. Mərasimdə çıxış edən mədəniyyət nazirinin birinci müavini Vaqif Əliyev əhəmiyyətli təşəbbüsə görə qardaş ölkənin Mədəniyyət və Turizm Nazirliyinə, Türkiyənin Azərbaycandakı səfirliyinə və İLESAM təşkilatına minnətdarlığını bildirdi, bu cür təşəbbüslərin qarşılıqlı və davamlı olacağını vurğuladı. Vaqif Əliyev türk dilində müxtəlif kitabların ölkəmizə hədiyyə edilməsi elmi tədqiqatlar üçün faydalı olacaq, eyni zamanda iki ölkə arasında ədəbi-mədəni əlaqələrin daha da möhkəmlənməsinə xidmət edəcək: “Layihə həmçinin ümummilli lider Heydər Əliyevin “Bir millət, iki dövlət” kəlamına uyğun olaraq qardaşlığımızın gözəl nümunəsidir. İki dövlət hər zaman bir-birinə dəstək olub, mədəniyyət və ədəbiyyat sahəsində də bu qardaşlığın təzahürü ürəkaçan hadisədir”. Beynəlxalq Türk Mədəniyyəti və İrsi Fondunun prezidenti Günay Əfəndiyeva çıxış edərək türk dünyasının maddi və mədəni irsinin zənginliyindən, bu irsin qorunub öyrənilməsindən danışdı. O, bu qədər kitabın ölkəmizin kitabxanalarına paylanmasını mötəbər addım kimi dəyərləndirdi.  Türkiyə Azərbaycandakı səfirliyinin mədəniyyət və tanıtım müşaviri İrfan Çiftçi iki qardaş xalqın eyni tarixi və mədəni köklərə malik olduğunu vurğuladı. Böyük mütəfəkkir dramaturq Mirzə Fətəli Axundzadənin adını daşıyan kitabxanada türk dünyası yazarlarının kitablarının yer almasının tarixi hadisə olduğunu dedi. İLESAM-ın sədri Mehmet Nuri Parmaksız bu cür tədbirlərin türk dünyasının yazarları arasındakı mənəvi bağlılığı gücləndirəcəyini, eləcə də türkiyəli müəlliflərin əsərlərinin Azərbaycan oxucusuna tanıdılmasında mühüm rol oynayacağını bildirdi. Vurğulandı ki, təqdim olunan 15 min kitab 6 min yazarın əsərlərindən ibarətdir. Ortaq mədəniyyəti paylaşan xalqların bir-birini tanıması vacibdir. Sədr göstərdiyi təşkilatı dəstəyə görə Mədəniyyət Nazirliyinə təşəkkür etdi. Tədbirdə çıxış edən Azərbaycan Dövlət Pedaqoji Universiteti nəzdində fəaliyyət göstərən Türk Mədəniyyəti Mərkəzinin rəhbəri, professor Elman Quliyev, Bakı Dövlət Universiteti Türkologiya kafedrasının müdiri, professor Ramiz Əskər, Bakıdakı Yunus Əmrə İnstitutunun müdiri Cihan Özdemir, İLESAM-ın Azərbaycan üzrə nümayəndəsi, Yazıçılar Birliyinin mətbuat katibi Xəyal Rza kitabların ölkəmizə hədiyyə olunmasının əhəmiyyətini vurğuladılar. ..