17 aprel tarixində Zərdab rayon Heydər Əliyev Mərkəzində Mədəniyyətşünaslıq üzrə Elmi-Metodiki Mərkəzin təşkilatçılığı, Ağdaş Regional Mədəniyyət və Turizm İdarəsinin dəstəyi ilə gənc mədəniyyət işçilərinin növbəti regional görüşü keçirilmişdir.
Qeyd edək ki, tədbirdə Ağdaş, Göyçay, Ucar və Zərdab rayonlarının müxtəlif təyinatlı mədəniyyət müəssisələrində çalışan gənc mədəniyyət işçiləri iştirak etmişdir. Xatırladaq ki, Gənc Mədəniyyət İşçilərinin Koordinasiya Kreativ qrupu Azərbaycan Respublikası Mədəniyyət və Turizm Nazirliyinin təşəbbüsü ilə 2016-ci ildə yaradılmışdır.
Ötən müddət ərzində sözügedən qrup tərəfindən bir sıra müxtəlif təyinatlı layihələr icra olunmuşdur. Qrupun yaradılmasında əsas səbəb sahədə təşəbbüskarlıq mühitinin dəstəklənməsi və gənc mədəniyyət işçilərinin fəaliyyətinin stimullaşdırılmasından ibarətdir.
Beləki, 17 aprel tarixində keçirilmiş tədbir əsasən birgə icra oluna biləcək layihələrin müzakirəsinə həsr olunmuşdur. Tədbir zamanı milli mədəniyyətin təbliğində müasir informasiya texnologiyalarından istifadə, müxtəlif müəssisələrdə çalışan əməkdaşların fəaliyyətinin koordinasiyası və əlavə gəlirlərin əldə etmə mexanizmləri müzakirə edilmişdir. Mədəniyyət sahəsi üzrə beynəlxalq təcrübədən danışan tədbir iştirakçıları müasir qloballaşma şəraitində mədəniyyətin ideoloji əhəmiyyətini xüsusi olaraq vurğulamışdılar.
Eyni zamanda bildirilmişdir ki, əlavə gəlir mənbəyini təmin etmək üçün mədəniyyət və turizm kimi sahələrin funksional inteqrasiyasının təmin edilməsi zəruridir. Bu mənada Mədəniyyətşünaslıq üzrə Elmi-Metodiki Mərkəzin direktoru Asif Usubəliyev animatorluq fəaliyyətinin inkişaf etdirilməsinin vacib olduğunu bildirmişdir. Bu məqsədlə gənc mədəniyyət işçilərindən ibarət məlumat bazasının yaradılmasına dair qərar qəbul edilmişdir. Bundan əlavə mədəniyyət müəssisələrinin populyarlaşdırılması və gənc mədəniyyət işçilərinin fəaliyyətinin geniş işıqlandırılması üçün fərqli təyinatlı virtual layihələrin də birgə işlənib hazırlanmasına dair razılıq əldə edilmişdir.
Yaradıcı və kreativ keyfiyyətlərin mədəniyyət işçiləri arasında inkişaf etdirilməsi məqsədilə müxtəlif səpkili xüsusi kursların təşkili də təqdirəlayiq hesab edilmişdir. Qeyd edək ki, bu məqsədlə Mədəniyyətşünaslıq üzrə Elmi-Metodiki Mərkəzin nəzdində “Kreativ təlimlər laboratoriyası”nın yaradılması nəzərdə tutulmuşdur. Həmin laboratoriyanın əsas təyinatı mədəniyyət işçiləri arasında müasir peşə səriştələrinin formalaşdırılmasından ibarətdir.
Bu səpkidə görüşlərin daha intensiv şəkildə təşkilinin vacib olduğunu bildirən tədbir iştirakçıları arasında geniş fikir mübadiləsi aparılmışdır.
