Mingəçevir Turizm Kollecində görkəmli bəstəkar Qara Qarayevin 100 illik yubileyi münasibəti ilə Bilik yarışı keçirilib
Azərbaycanın görkəmli bəstəkarı Qara Qarayevin anadan olmasının 100 illiyi münasibəti ilə Mingəçevir Turizm Kollecində keçirilən tədbirlər sırasına daha biri əlavə olundu. “Qara Qarayevin incəsənətimizdə qoyduğu iz” adlı intellektual yarış keçirildi. Yarış kollecin fənn müəllimləri Eldar Dərişov, Elnarə İsmayılova və kollecin tələbə - gənclər təşkilatının fəallarının təşəbbüsü ilə təşkil edilmişdir. Bilik mübarizəsində ayrı-ayrı ixtisas qruplarının tələbələrindən ibarət 6 komanda iştirak edirdi. Eyni zamanda yarışa əyani şöbələrin tələbələri ilə yanaşı qiyabiçi tələbələrdən təşkil olunmuş komandalar da qoşulmuşdu.
Müəyyən edilmiş qaydalara uyğun olaraq intellektual yarış üç mərhələyə bölünmüşdür. Hər mərhələdə komandalara Qara Qarayevin həyat və yaradıcılığı mövzusunda 10 sual ünvanlanırdı. Yarışın tamaşaçıları komandalar arasında bərabər və gərgin mübarizə aparılmasının şahidi oldular. İştirakçıların nümayiş etdirdiyi biliklər tələbə gənclərin Azərbaycan musiqi sənəti, xüsusilə də görkəmli bəstəkar Qara Qarayevin yaradıcılığı haqqında kifayət qədər məlumatlı olduğunu göstərdi. Münsiflər heyəti komandaların fəallığını cavablardakı dəqiqlik və dolğunluğu nəzərə alaraq müvafiq ballarla qiymətləndirdi. Qeyd edək ki, komandaların dəstək qrupları da öz yoldaşlarını sonadək dəstəkləyir və onları uğura həvəsləndirirdi. Üç mərhələdən ibarət yarışın nəticəsinə görə “Real” komandası qalib adına layiq görüldü. Qalib komandaların üzvlərinin fəxri fərmanla təltif olunması nəzərdə tutulub. Mükafatların təqdimatı görkəmli bəstəkarın 100 illik yubileyinə həsr olunmuş yekun tədbirdə həyata keçiriləcək.