Q.Qarayev adına Mərkəzi İncəsənət Məktəbində 20 yanvar faciəsinə həsr olunmuş anım tədbiri keçirildi
2018-ci il 19 yanvar tarixində Q.Qarayev adına Mərkəzi İncəsənət Məktəbində 1990-cı il 20 yanvar faciəsinə, tariximizin qəhrəmanlıq salnaməsinə həsr olunmuş anım tədbiri keçirildi. Tədbirdə 20 yanvar faciəsinin baş vermə səbəbləri, xalqımızın azadlıq mübarizəsi, sovet imperiyasının azadlıq hərəkatını boğmaq cəhdləri və bunun çox böyük faciələrə səbəb olması, Bakının faktiki olaraq sovet qoşunları tərəfindən misli görülməmiş bir qəddarlıqla işğal olunması, erməni lobbisinin, əsgər və zabitlərinin yanvar hadisələrində iştirakı faktları anım iştirakçılarının nəzərinə çatdırıldı. Xalqımızın o gecədə göstərdiyi rəşadətdən, qəhrəman dənizçilərimizin, həkimlərimizin fədakarlığından söhbət açıldı. Anım tədbiri Azərbaycan Respublikasının Dövlət Himni, Ü.Hacıbəylinin “Koroğlu uvertyurası”, X.R.Ulutürkün “Azadlığı istəmirəm” şeiri, S.Fərəcovun “Ulduzlu gecə” əsəri (Skripka: Nərgiz Hüseynova Aslanov, f-no: Sevinc Kərimova), Ş.Əlizamanlının “Cənab leytenant” əsgər mahnısı (İsgəndər İsmayılov, Aytac Zeynalov, Murad Qorçiyev), R.Rövşənin “Qapı” poeması ilə (Qiraət: Azərbaycan Mədəniyyət və İncəsənət Universitetinin tələbəsi Hüseynağa Aslanov, tar: Nəbi Quliyev) ilə müşaiyət olundu. 20 yanvar hadisələrini əks etdirən video xronika və şəkillər nümayiş olundu.
1990-cı il 20 yanvar hadisələri - xalqımızın azadlıq mübarizəsi heç vaxt unudulmur və unudulmayacaq. Çünki bu, faciəmizlə yanaşı, həm də Hürriyət yanğımız, qəhrəmanlıq savaşımız və fəxarət yerimizdir.
Tədbirin təşkilatçısı musiqi nəzəriyyəsi müəllimi Pərvin Səfərlidir.