“Qara Qarayevin “Yeddi gözəl” baleti. Səhnə həyatının tarixi” adlı kitabın təqdimatı keçirildi
Fevralın 4-də Qara Qarayevin ev-muzeyində dahi bəstəkarın anadan olmasının (5 fevral) 101-ci ildönümü münasibətilə tədbir keçirildi. Tədbir çərçivəsində həmçinin “Qara Qarayevin “Yeddi gözəl” baleti. Səhnə həyatının tarixi” adlı kitabın təqdimatı oldu.
Mərasimdə mədəniyyət nazirinin müavini Sevda Məmmədəliyeva, Azərbaycan Bəstəkarlar İttifaqının sədri, Xalq artisti Firəngiz Əlizadə və musiqi xadimləri iştirak edirdi.
Azərbaycan Musiqi Mədəniyyəti Dövlət Muzeyinin təşkilatçılığı ilə reallaşan tədbirdə əvvəlcə iştirakçılar sənətkarın həyat və yaradıcılığından ibarət fotosərgiyə baxdılar.
Tədbiri giriş sözü ilə açan Musiqi Mədəniyyəti Dövlət Muzeyinin direktoru, Əməkdar mədəniyyət işçisi Alla Bayramova SSRİ Xalq artisti Qara Qarayevin (1918-1982) musiqi mədəniyyətimizin inkişafındakı xidmətlərindən söhbət açdı. Bildirdi ki, ötən il Prezident İlham Əliyevin sərəncamı ilə Qara Qarayevin 100 illik yubileyi ölkəmizdə və xaricdə silsilə tədbirlərlə qeyd olunub.
Qeyd olundu ki, dünya şöhrətli bəstəkarın əsərləri keçmiş SSRİ respublikalarında, ABŞ, Polşa, Misir, İspaniya, İtaliya, Fransa, Yaponiya, Almaniya və digər ölkələrdə keçirilən musiqi tədbirlərində müvəffəqiyyətlə səsləndirilib. Onun Nizami Gəncəvinin “Yeddi gözəl” poemasından bəhrələnərək yaratdığı “Yeddi gözəl” və Cənubi Afrika yazıçısı Piter Abrahamsın romanı əsasında yazdığı “İldırımlı yollarla” baletləri dünyanın bir sıra ölkələrində uğurla nümayiş olunmaqdadır.
Bəstəkarın qızı, tanınmış pianoçu Züleyxa Qarayeva kitabın məziyyətləri barədə danışdı. Bildirdi ki, sənətşünaslıq üzrə fəlsəfə doktoru Natalya Dadaşovanın müəllifi olduğu kitabda “Yeddi gözəl” baletinin premyerasında günümüzə qədər səhnə həyatı təsvir edilir, tanınmış balet ustaları, dirijorlar, rəssamlar haqqında məlumatlar, həmçinin səhnə əsəri ilə bağlı ötən illərdə çap olunmuş afişalar, proqramlar, tamaşalardan fotolar təqdim edilir.
Azərbaycan Bəstəkarlar İttifaqının katibi, professor Zemfira Qafarova çıxış edərək hələ məktəbli ikən “Yeddi gözəl” baletinin tamaşasına baxdığını dedi: “Əsərə ilk dəfə tamaşa edərkən bir anlıq keçmişə, uşaqlıq illərinə qayıtdım. O günləri sevinclərlə yaşamışıq. “Yeddi gözəl” bizim uşaqlığımız, gəncliyimiz, eləcə də bu günümüz və sabahımızdır. Bu əsər, doğrudan da, Azərbaycan musiqi mədəniyyətinin ən parlaq səhifələrindədir”.
Kitabı yüksək qiymətləndirən Zemfira Qafarova bildirdi ki, çox nəfis şəkildə çap olun nəşrdə “Yeddi gözəl” baletinin hansı ölkədə və şəhərlərdə nə zaman tamaşaya qoyulduğu dolğunluqla verilib.
Sonda çıxış edən kitabın müəllifi, sənətşünaslıq üzrə fəlsəfə doktoru Natalya Dadaşova nəşr barədə məlumat verdi və tədbirin təşkilatçılarına və iştirakçılarına təşəkkürünü bildirdi.
Çıxışlar arası “Yeddi gözəl” baletindən video-fraqmentlər nümayiş olundu.