Respublikamızın şəhər (rayon) Mədəniyyət Mərkəzlərində “20 Yanvar - xalqımızın qan yaddaşı unudulmur” silsilə tədbirləri təşkil edilmişdir
Azərbaycan xalqının qəhrəmanlıq səlnaməsi olan 20 Yanvar 1990-cı il hadisələrində şəhid olmuş insanların xatirəsi xalqımız tərəfindən əziz tutulur. Respublikamızın bütün şəhər (rayon) mədəniyyət mərkəzlərində və filiallarında, digər mədəniyyət evləri və klublarında hər il boyunca, xüsusilə 20 yanvar ərəfəsində həmin hadisələrin mahiyyəti, xalqımızın azadlıq mücadiləsi barədə geniş kütləyə müxtəlif tədbirlər, seminarlar dəyirmi masalar vasitəsilə əhaliyə məlumatlar verilir, şəhid olmuş insanların xatirəsi yad edilir.
Cari ilin 15-23 yanvar tarixlərində 20 Yanvar hadisələrinin 28-ci il dönümü ərəfəsində şəhər (rayon) mədəniyyət mərkəzlərində və filiallarında, digər mədəniyyət evləri və klublarında anım tədbirləri keçirilmişdir. Tədbirlərdə şəhidlərin əziz xatirəsi sükutla yad edilmiş, həmin müəssisələrin rəhbərləri, mədəni təşkilatçıları və digər əməkdaşları tərəfindən mühazirələr oxunmuş, bədii kompozisiyalar nümayiş etdirilmiş, Bakı şəhəri və rayonlarda olan şəhidlər xiyabanları ziyarət edilmişdir. Təşkil edilmiş tədbirlərdə gənclər, məktəblilər xüsusi fəallıqla iştirak etmişlər. Regionlarda fəaliyyət göstərən xalq teatrları tərəfindən mövzu ilə əlaqəli tamaşalar göstərilmişdir. Vurğulanmışdır ki, 1990-cı il yanvarın 19-dan 20-nə keçən gecə, saat 23.30-da Bakı şəhərinə keçmiş Sovet İttifaqının qoşun hissələri fövqəladə vəziyyət elan edilmədən yeridilmiş, dinc əhaliyə divan tutulmuş, yüzlərlə insan qətlə yetirilmiş, yaralanmış və itkin düşmüşdür. Sovet ordusunun, xüsusi təyinatlı dəstələrin və daxili qoşunların iri kontingentinin Bakını zəbt etməsi xüsusi qəddarlıq və misli görünməmiş vəhşiliklərlə müşayiət edilmişdir.
Tərbirlərdə 20 Yanvar hadisələrinə ilk siyasi qiymətin və reaksiyasının o zamankı gərgin durumda ümummilli lider Heydər Əliyev tərəfindən Moskvada verildiyi bildirilmişdir. Qeyd edilmişdir ki, ulu öndər həmin hadisələrin Azərbaycan xalqına qarşı tərədilmiş hərbi və siyasi cinayət olduğunu dünya ictimaiyyətinə çatdırmış, hadisənin səbəbkarlarını kəskin şəkildə qınamış və bu faciənin beynəlxalq hüququn bütün prinsiplərinə zidd olduğunu vurğulamışdır.
Azərbaycan Respublikasının Prezidenti cənab İlham Əliyev xalqımızın azadlığı, o cümlədən torpaqlarımız uğurunda şəhid olanların xatirəsini əziz tutur və müvafiq dövlət qayğısı göstərilir. Hər il cənab Prezident Şəhidlər Xiyabanına ziyarətə gedərək şəhidlərin ruhuna dərin ehtiramını bildirir.
Çıxış edən ziyalılar, gənclər 20 Yanvar-ın xalqımız üçün faciə olduğu qədər həm də bütün şəhidlərimiz kimi qürur mənbəyi olduğunu qeyd etmiş, və ali baş komandan cənab İlham Əliyevin göstərişi ilə işğal altında olan torpaqlarımızı düşmən tapdağından azad etməyə daim hazır olduqlarını bildirmişlər.
