İslam Əməkdaşlıq Təşkilatının (İƏT) İqtisadi və Ticarət Əməkdaşlığı Daimi Komitəsinin (COMCEC) Turizm üzrə İşçi Qrupunun 10-cu görüşü keçirilmişdir
2017-ci ilin 21 sentyabr tarixində Ankara şəhərində İslam Əməkdaşlıq Təşkilatının (İƏT) İqtisadi və Ticarət Əməkdaşlığı Daimi Komitəsinin (COMCEC) Turizm üzrə İşçi Qrupunun “Turizmdə sektorunda risk və böhranların idarə olunması: İƏT-ə üzv ölkələrdə böhranların aradan qaldırılması təcrübəsi” mövzusunda araşdırma hesabatı ilə bağlı 10-cu görüşü keçirilmişdir. Ölkəmizi tədbirdə Mədəniyyət və Turizm Nazirliyinin Turizm şöbəsinin məsləhətçisi Azər Orucov təmsil etmişdir.
Görüşdə dünyanın 14 ölkəsindən- Malayzia, İndoneziya, İran, Maldiv, Qambia, Seneqal, Somali, Mali və s. turizm sahəsində fəaliyyət göstərən dövlət qurumlarının nümayəndələri, eləcə də turizm sahəsində araşdırma, konsaltinq və səyahət xidmətləri üzrə ixtisaslaşmış Beynəlxalq Turizmin İnkişafı (TDİ), Dünya Səyahət və Turizm Şurası (WTTC), Tripfez şirkətlərinin ekspertləri iştirak etmişdir.
Tədbirdə “Risk və böhranın təsirlərinin aradan qaldırılması üçün strategiya və tədbirlər”, “Turizm sektorunda risk və böhranların idarə olunması: araşdırma aparılan ölkələrin təcrübəsi, əsas çətinliklər, tövsiyələr və perspektivlər” mövzusunda təqdimatlar nümayiş olunmuş və müzakirə edilmişdir
Həmçinin, tədbir çərçivəsində “Turizm sektorunda risk və böhranların idarə olunması və böhranların aradan qaldırılması üzrə siyasi imkanlar” ilə bağlı keçirilən sessiyada aparılan araşdırmaların nəticəsi, eləcə də üzv ölkələrinin təcrübəsinə əsasən COMCEC-in növbəti Nazirlər sammiti zamanı təsdiq olunması nəzərdə tutulan mövzu ilə əlaqədar siyasi tövsiyələrin hazırlanması məqsədi ilə müzakirələr aparılmışdır.